1 He"a Apu Dios ya ammunay madayaw an bokon da'min tatagu.

Te munnananong nan pamhodmu ya pangipapto'mu i da'mi.

2 Mu tanganu on alyon nadan tataguh udum hi boble di,

Daan bohnay aton nan Dios an dayawonyu?

3 Hi Apu Dios an dayawonmi ya wah ad abunyan.

Ya hanan pohdonan ma'at ya hiyay atona.

4 Hanada'en tataguh udum hi boble ya hanadan iniphod di tagu an umat hi balitu' onu silber di diosda.

5 Manu te waday to'oda mu adida humapit.

Ya waday matada mu adida tumigo.

6 Ya waday ingada mu adida donglon.

Ya waday olongda mu ma''id ha hunghungonda.

7 Ya waday ta'leda mu ma''id ha li'naonda.

Ya waday hukida mu adi midallan.

Ya ma"id ni'mo ha madngol hi malpuh aluguugda.

8 Ot hanadan manganapyah atathidi ya ta'on on hanadan mangidinol i dadiye ya umatda i dadiyen dayawonda.

9 Ot da'yun i'iba an tinanud Israel ya maphod on hi Apu Dios di pundinolan ta'u hi bumoddang ya mangipapto' i dita'un namin.

10 Ya ta'on on da'yun papadi an holag Aaron ya hanat mundinol ayu i Apu Dios te hiyay bumoddang ya mangipapto' nimpe i dita'un namin.

11 Ta dita'un namin an mangun'unud i Apu Dios ya hanat mundinol ta'un hiya te hiyay bumoddang ya mangipapto' i dita'u.

12 Ot ma"id ha bahhonan wagahan dita'un holag Israel i hiya ya ta'on on da'yun padi an holag Aaron te nanongnan nomnomnomon dita'u i hiya an Dios.

13 Ta wagahan dita'un mangun'unud i hiya an ta'on on nadan nawotwot onu kadangyan.

14 Ot hanat punholagon dita'u ta dumakol ta'u ya ta'on on nadan tanudan ta'u.

15 Ya hanat wagahan dita'u nimpe i Apu Dios an nunlumu hi ad abunyan ya tun luta.

16 Hi ad abunyan ya bagin Apu Dios mu tun luta ya indatnan dita'un tatagu.

17 Hanada'en numpun'ate ya adida dayawon hi Apu Dios te wahdidah awadan nadan numpun'ate.

18 Ot dita'un mataguy mundayaw i hiya hi ingga'inggana.

Madayaw hi Apu Dios.