1 He"a an apgohan an babai, ni'ibbagay nayya nan sandalmuh nan mapmaphod an hukim.

Ya mapmaphod di tigon di hukim an umatda i ha iniphod di nala'ing an mangiphod hi kumpulnan usal.

2 Ya maphod di namutum an ay waha taug hinan way puhogmu an paddungnay mamattuwan hi ma'inum.

Ya mapmaphod boy nangadolmu an umat i ha nabto' an dagami an nali'mut hi ha'ha'lung.

3 Ya mapmaphod boy palagpagmu an ayda wahdi ha duwah nundinommang an inlum di ulha.

4 Ya mapmaphod nan bagangmu an umat i ha mapmaphod an natagen bale.

Ya atbohdi nan matam an umat hinan nahitalan an lobong an humili an umat hinan lobong an nungngadan hi Hesbon an nihaggon hinan geyt hi ad Bat-Rabim.

Ya immontong di olongmu an umat hinadan billid an nungngadan hi Lebanon an matangad hi ad Damaskus.

5 Ya mapmaphod boy tigon di ulum an umat hinan nabillid an nungngadan hi Karmel.

Ya madongya nan mangitit an ibu'mu.

Ta kumpulnan patul ya pohpohdonan tigtiggon.

6 Te nunhiglan apgohan'a an umipa'amlong'an ha"on.

7 Ya maphod nimpey nangadolmu an umat'a i ha natagen niyug ya nan palagpagmu'e ya paddungnay wahdi ha duwah bungana.

8 Ta pohdo' ahan tayyan e kayaton ta e' dapaon dadiyen bungana.

Te dadiyen bungana ya umat i ha nabungul an greyp.

Ya hanan yahyahmu ya nabanglu an umat hi banglun di mansanas.

9 Ta hiya nan hanan em pangawalan i ha"on ya umipa'amlong mu hay e panginuman hinan maphod an bayah.

Ot onha mi'aliga' hi bayah ya hanat inumona' ta pa'attamtamona'.

10 Ot ma"id ha udum hi umaya' hi'on bokon he"a ya abuh.

Te innila' an nunhiglay naminhodmun ha"on.

11 Ot ma'a ta eta mundaldallanan ta ta'on on malo'tahdih nan awadan di dakol an habhabung.

12 Ta nabigat'e ya immetah nan natanoman ta eta tigon hi'on himmaping nadan greyp ya hi'on himmabung nadan pomegranet.

Ta hidiy pangipali'naa' hi naminhod'un he"a.

13 Ya ta etandi anu hunghunghungon nadan nabanglun habhabung hidi.

Te ta'on on hidih nan nunlini"odan nan eta umohnongan ya dakol di indadaan'un mun'aphod an bungbunga''an an ini'ihhod'un he"a.