I Thessalonians
Hay Aat Ten Liblu
Hay Nangitudo' eten Liblu: hi Apostoles Paul di nangipitudo', ya da Silas ay Timothy di nangitudo' (1:1).
Hay Nangitud'anda eten Liblu: nan kimmulug ad Thessalonica (1:1).
Hay Pohdon nan Ngadan ten Liblun Ibaga: hiyay ngadan di ohan siudad ad Macedonia hinan babluy hi ad Greece.
Hay Gutud hi Nangitud'andan ten Liblu: mid mapto' ya hidin 52 A.D.
Hay Teman ten Liblu: nan himba'an ad Thessalonica.
Hay Outline ten Liblu:
Hay MANGIPAꞋINNILAH nan himba'an ad Thessalonica (1:1)
Hay PUNYAMANAN hinan himba'an ad Thessalonica (1:2-10)
Hay NANGETE"AH nan himba'an ad Thessalonica (2:1-16) — hi Apostoles Paul di nangete"an ten himba'an
Hay MUMBIHHITAH nan himba'an ad Thessalonica (2:17—3:13)
Hay ATON nan himba'an ad Thessalonica (4:1—5:28)
Hay atonda ni' ahan ya adida aton nan umipabain (4:1-8)
Hay atonda ni' ahan ya mumpopohhodanda (4:9-10)
Hay atonda ni' ahan ya ihihi'alday tamuda (4:11-12)
Hay atonda ni' ahan ya al'alu'onday munlungdayan waday matoy an ibbada (4:13-17)
Hay atonda ni' ahan ya mundadaandah nan pumbangngadan Kristuh pidwa (5:1-11)
Hay atonda ni' ahan ya e'gonanda nan muntudtudun dida (5:12-13)
Hay atonda ni' ahan ya adida munhohongngel (5:13)
Hay atonda ni' ahan ya padananda nan adi mangngol (5:14)
Hay atonda ni' ahan ya tugunonda nan munhinnumnong (5:14)
Hay atonda ni' ahan ya badanganda nan adi umday pangulugdan Apo Dios (5:14)
Hay atonda ni' ahan ya ma'ma'ullaydah nan tatagu (5:14)
Hay atonda ni' ahan ya adida iballoh (5:15)
Hay atonda ni' ahan ya atonday maphod hinan tatagu (5:15)
Hay atonda ni' ahan ya umamlo'amlongda (5:16)
Hay atonda ni' ahan ya lumuwaluwaludan Apo Dios (5:17)
Hay atonda ni' ahan ya mundenolda (5:18)
Hay atonda ni' ahan ya adida ibahhaw di pohdon nan Na'abuniyanan an Lennawa (5:19)
Hay atonda ni' ahan ya adida pahiwon di itudun nan tagun intudun Apo Dios di hapitona (5:20)
Hay atonda ni' ahan ya hamadondan amin di itudun di tatagu (5:21)
Hay atonda ni' ahan ya adida kulugon nan nappuhi (5:22)
Hay HOGAT hi aton nan himba'an ad Thessalonica (5:23-28).
1
1 Heten tudo' ya nalpun da'min Paul ay Silas,* Hay oha goh an ngadana ya Silvanus. ya hi Timothy. Ya itud'anmi da'yun iThessalonica an kimmulug ay Apo Dios an hi Ama tu'u ya hi Apu tu'un hi Jesu Kristu.
Hi Apo Dios ni' di mangipadutu' ya mangipalenggop ay da'yu.† Inusal Apostoles Paul nan duwan kalahin di apnga eden timpu. Nan nahhun an inalina an mangipadutu' ay da'yu (unu charis) ya apngan di iGreece, ya nan netob an inalina an mangipalenggop ay da'yu (unu shalom) ya apngan di Hudyu.
Hay Aat di Pangulug nan iThessalonica
2 Iluwaluanmi da'yun amin, ya alyonmiy maphod ti impaphod da'yun Apo Dios. Ya gunmi da'yu iddum hinan punluwaluanmi. 3 Ya inilan Apo Dios an hi Ama tu'u an gunmi nomnomon nan ina'inatyu an hiyay attigan di pangulugyu, ya ni'nomnommi goh nan tamuyu ti hiyay attigan di pamhodyu, ya umat goh hinan nangedpolanyu ti hiyay attigan di panahalimidanyun Apu tu'un hi Jesu Kristu. 4 Ya inilami, i'ibba, an pohdon da'yun Apo Dios, at pento' da'yun Hiya. 5 Ya inulgudmi nan Maphod an Ulgud Apo Dios ay da'yu. Ya henen Ulgud ya adi umat hinan udumnan ulgud ti hay aatna ya nunheglay umal'alu'ana ti bumadang nan Na'abuniyanan an Lennawa, at inimmatunanyu an makulug an adi ayu ahan munduwaduwa. Ya innilayuy aatmih din nihinanmin da'yu ti impaphodmiy aatmi an da'yuy dimmalat. 6 Ya inanungyuy aatmi ya hi Apu tu'u. Ya inabulutyuy Hapit Apo Dios, at nunheglay nipaligligatanyu. Mu ta"on ya mun'am'amlong ayuh nan nangabulutanyuh nan Hapitna an dumalat di badang nan Na'abuniyanan an Lennawa. 7 At da'yuy anungon an amin nan mangulug ay Apo Dios hinan duwan provincia an ad Macedonia ya ad Achaia. 8 Nan Hapit Apu tu'un inul'ulgudyu ya nundongol hi ad Macedonia ya ad Achaia. Mu bo'on hidi ya anggay ti an amin hinan abablubabluy ya na'ulgud nan aat di pangulugyu, at undan gahin unmi ulgudon di aatyu. 9 Ya inulgud nan nangngol di aat nan nangabulutanyun da'mih din numbihhitanmin da'yu. Ti din'ugyu nan bululyu ta inunudyuh Apo Dios ti nuntamuon da'yuh tamuna an Hiyay makulug an adi matmattoy. 10 At hodonyuy umalian nan Imbaluynan malpud abuniyan an Hiyay minahuan Apo Dios an nalpuh nan way nun'atoy an hi Jesus an mamaliw ay ditu'uh din agtudan di atata'ot an punhumalyaan Apo Dios.