23
Hay Angunuh di Hinapit David
1 Hiyatuy angunuh hi hinapit David an inalinay,
“Ha"in an hi David an hina' Jesse di numbalinon Apo Dios hi me'gonan di hapitona,
at pento'a' goh ta ha"in di ali,
ya nala'enga' goh an mun'ammah kanta ta way ikanta tu'un holag Israel.
2 Ya nan Na'abuniyanan an Lennawa di gun mangipa'innilan ha"in hinan Hapitna,
at hiyay ipa'innila'.*II Pet. 1:21.
3 Hiya an Dios tu'un holag Israel ya umat hi batun ihi'ugan tu'u.
Ya inalinan ha"in di,
Nan Ali an hi Apo Dios di unudona,
ya nahamad di pangatna ti ita'otnah Apo Dios,
4 ya umat hi potang an pa'abbuhu' hinan helhelong an mi'id di bunutna,
ya umat goh hinan pumatalanah nan alpahan di udan
an hiyay mangipalangtah holo' hitun luta.
5 Ya nan holag'uy wagahan Apo Dios
ti ha"in di nangalyanah nan adi malumluman ya minaynayun an planuna.
Ya immannung an ibaliwa',
ya ipa'annungnan amin nan penhod'un ma'at.
6 Mu nan tatagun nappuhiy pangatda ya umatdah hubit an mitapal
ti adi nonongan dinapa ti tumli'.
7 Mu daluduwon hi un amungon ya genhob.”
Nan Na'attulid an Tindalun David
(I Chron. 11:10-41)
Nan Tulun Nun'atulid an Tindalu
8 Ya waday tulun nun'atulid an tindalun David:
Hay natultulid ay dida ya hi Josheb-Basshebeth an iTahkemon ti din namenghan hi ni'gubatana ya waluy gahut di numpatoynah buhulda an hay inusalna ya nan gayangna.
9 Ya hay nehnod ya hi Eleazar an hina' Dodai an holag Ahoh. Wada han namenghan ya niddum ay da David hidin nangabakandah nan iPhilistia an na'amung hi nundadaan an ni'gubat ad Pas Dammim, ya din holag Israel ya timma'otda, ya numpangalayawda. 10 Mu intutulidnan ni'gubat hinan iPhilistia ta engganay un na"ablay an immodhol di ngamayna, at adina ipogonan din hanggapna. Ya henen algaw ya binadangan Apo Dios dida, at nangabakona dida. Ya unat goh nalpah nan gubat ya numbangngad nan holag Israel hinan wadan Eleazar an nun'alada din almas din nun'atoy.
11 Ya wa han namenghan hi na'amung nan iPhilistia hinan galden an natamman hi danggu, ya timma'otda nan holag Israel, at numpangalayawda. 12 Mu hi Shammah ya wah nan gagwan di galden an inlalaputanan ni'gubat ta binaliwana didan numpatoyna din iPhilistia. At henen na'at ya hi Apo Dios di bimmadang hinan nidugah an nangabakanda.
13 Ya wa han ahiboto' goh ya nan tuluh nan tulumpulun nun'atulid an tindalu ya immuydan David hinan liyang ad Adullam. Ya hay nungkampuan nan iPhilistia ya hinan Nundotal an Rephaim. 14 Mu wah David hinan liyang an naligat hi hogpon nan buhulna. Ya nan udum an iPhilistia ya hinakupdad Bethlehem. 15 Ya hi David ya nonomnomonad Bethlehem, at namaag ya gun munhapit an o"oha hiya an inalinay, “Maphod un way umuy an humagub hinan bubun an neheggon hinan pantaw ad Bethlehem ta inumo'!” 16 Ya dengngol nan tulun nun'atulid an tindaluna, at inlaputdan henggop di nungkampuan nan iPhilistia ta immuyda himmagub hinan bubun an neheggon hinan pantaw ad Bethlehem, ya imbangngaddan inyuy ay David. Mu agguyna ininum ti unnaat inhiit hinan luta ta e'nongnan Apo Dios. 17 Ya inalinay, “Apo Dios, adi mabalin hi inumo' ti paddungnay un dalan nan tatagun nangihuyu' hi nitaguanda!”
At hiyanay inat din Tulun Nun'atulid an Tindaluh nangipattigandah anatulidda.
Nan Nangipangpanguluh nan Tulun Nun'atulid an Tindalu
18 Ya hay nangipangpanguluh din Tulun Nun'atulid an Tindalu ya hi Abishai an pogtang Joab an hina' Zeruiah. Hiya ya nundongol di aatna ti pinatoynay tuluy gahut an tatagu an hay gayangnay inusalna. 19 At hiyay numbalin hi mangipangpanguluh nan Tulun Nun'atulid an Tindalu. Mu agguy nibilang hinan Tulun Nun'atulid an Tindalu.
Nan Ap'apun nan Guwalyan David
20 Ya hi Benaiah an hina' Jehoiadah an iKabzeel di oha goh an na'atullid an tindalu ti do'ol goh damdamay inatna an dumalat nan anatulidna. Hay oha ya pinatoyna din duwan nun'atulid an iMoab. Ya din gutud di immudananan manalallu ya immuy immugpah hidin bitu, ya pinatoyna din atata'ot an layon. 21 Ya pinatoyna goh han ongol di alala'inan i'Egypt. Ya henen i'Egypt ya waday gayangna, mu hi Benaiah ya un pang'ul, at immuyna penloh din gayang han i'Egypt ta hiyay namatoynan hiya. 22 At hanan inat Benaiah an hina' Jehoiadah di mangipa'innilah anatulidnan umat hinan tulun tindalu. 23 Ya hiyay nundongol hi nidugdugah di a'e'gonana ay dida an Tulumpulu, mu hiya ya agguy niddum hinan Tulu. At pento' David hi ap'apun nan guwalyana.
Nan Ma'alih Nan Tulumpulu
24 Didatuy ngadan nan udum an tindalun nibilang hinan Tulumpulu:
Hi Asahel an pogtang Joab,
ya hi Elhanan an hina' Dodo an iBethlehem,
25 ya da Shammah ay Elika an iHarod,
26 ya hi Helez an iPalti,
ya hi Ira an hina' Ikkesh an iTekoa,
27 ya hi Abiezer an i'Anathoth,
ya hi Mebunnai an iHusha,
28 ya hi Zalmon an i'Ahoh,
ya hi Maharai an iNetophah,
29 ya hi Heled an hina' Baanah an iNetophah goh,
ya hi Ithai an hina' Ribai an nalpud Gibeah an holag Benjamin,
30 ya hi Benaiah an iPirathon,
ya hi Hiddai an bimmabluy hinan nundotal an neheggon hinan duntug ad Gaash,
31 ya hi Abi-Albon an i'Arabah,
ya hi Azmaveth an iBahurim,
32 ya hi Eliahba an iShaalbon,
ya nan imbabaluy Jashen,†Duwadan linala'i (bahaom nan footnote di 23:39 ta innilaom di gapuna).
ya hi Jonathan 33 an imbaluy Shammah,
ya hi Ahiam an imbaluy Sharar an didanay iHarar,
34 ya hi Eliphelet an imbaluy Ahasbai an iMaakah,
ya hi Eliam an hina' Ahithophel an iGilo,
35 ya hi Hezro an iCarmel,
ya hi Paarai an i'Arbi,
36 ya hi Igal an imbaluy Nathan an iZobah,
ya nan imbaluy Hagri,‡Mahapul an un oha hiyan imbaluy Hagri (bahaom nan footnote di 23:39 ta innilaom di gapuna).
37 ya hi Zelek an holag Ammon,
ya hi Naharai an iBeerot an hiyay mun'od'odon hi hapiaw Joab an hina' Zeruiah,
38 ya da Ira ay Gareb an i'Ithri,
39 ya hi Uriah an holag Heth.
Hay uyap daten amin an nun'atulid an titindalu ya tulumpulu ta pitu.§Manu ay tulumpulu ta pituda an ta"on hi unda Tulumpulu ti (1) hiyah ne nin di hopap di uyapdah din hopapna, ya (2) gun na'udman nan udumnan tindalun ten grupu ti wada goh di himpulu ta onom an ngadan an nitudo' hi I Chron. 11:26-47 an agguy niddum eten nitudo' ti natoy di udum, mu wada goh di niddum. (3) Ya hay ohan gapuna ya tulumpulu ta pitudan natulid an titindalun nitudo' hinan Chapter 23 an Nan Tulu (an da Josheb-Basshebeth ay Eleazar, ya hi Shammah), ya da Abishai ay Benaiah, ya Nan Tulumpuluh un waday duwan imbabaluy Jashen (verse 32). At makulug an ustuy uyapda ahan!
*23:2 II Pet. 1:21.
†23:32 Duwadan linala'i (bahaom nan footnote di 23:39 ta innilaom di gapuna).
‡23:36 Mahapul an un oha hiyan imbaluy Hagri (bahaom nan footnote di 23:39 ta innilaom di gapuna).
§23:39 Manu ay tulumpulu ta pituda an ta"on hi unda Tulumpulu ti (1) hiyah ne nin di hopap di uyapdah din hopapna, ya (2) gun na'udman nan udumnan tindalun ten grupu ti wada goh di himpulu ta onom an ngadan an nitudo' hi I Chron. 11:26-47 an agguy niddum eten nitudo' ti natoy di udum, mu wada goh di niddum. (3) Ya hay ohan gapuna ya tulumpulu ta pitudan natulid an titindalun nitudo' hinan Chapter 23 an Nan Tulu (an da Josheb-Basshebeth ay Eleazar, ya hi Shammah), ya da Abishai ay Benaiah, ya Nan Tulumpuluh un waday duwan imbabaluy Jashen (verse 32). At makulug an ustuy uyapda ahan!