II Thessalonians
Hay Aat Ten Liblu
Hay Nangitudo' eten Liblu: hi Apostoles Paul di nangipitudo', ya da Silas ay Timothy di nangitudo' (1:1).
Hay Nangitud'anda eten Liblu: nan kimmulug ad Thessalonica (1:1).
Hay Pohdon nan Ngadan ten Liblun Ibaga: hiyay ngadan di ohan siudad ad Macedonia hinan babluy hi ad Greece.
Hay Gutud hi Nangitud'andan ten Liblu: mid mapto' ya hidin 52 A.D.
Hay Teman ten Liblu: nan tulu an doctrinan mahapul an innilaon nan iThessalonica ya nan udumnan maphod hi atonda.
Hay Outline ten Liblu:
Hay DOCTRINAN di kimmulug (1:1—2:17)
Hay doctrinah aat di punhumalyaan Apo Dios (1:1-12)
Hay doctrinah aat AntiKristuh nan Punligatan di Tatagu (2:1-12)
Hay doctrinah aat di napto'an nan iThessalonica (2:13-17)
Hay ATON nan kimmulug (3:1-18)
Hay atonda ni' ahan ya munluwaluda (3:1-5)
Hay atonda ni' ahan ya adida napayad an muntamu (3:6-12)
Hay atonda ni' ahan ya adida humigan mangat hi maphod (3:13)
Hay atonda ni' ahan ya hamadonday kimmulug an adi mangunud hinan Hapit Apo Dios (3:14-15)
Hay atonda ni' ahan ya abulutonday wagah ay dida (3:16-18)
Hay atonda ni' ahan ya hamadondah un immannung an Hapit Apo Dios nan ibahada (3:17).
1
Heten tudo' ya nalpun da'min Paul ay Silas,* Hay ohah ngadana ya Silvanus. ya hi Timothy. Ya ten itud'anmi da'yun iThessalonica an ma'amu'amung an ipapto' Apo Dios an hi Ama tu'u ya hi Apu tu'un hi Jesu Kristu.
Hi Apo Dios an hi Ama tu'u ya hi Apu tu'un hi Jesu Kristu di mangipadutu' ya mangipalenggop ni' ay da'yu. Inusal Apostoles Paul nan duwan kalahin di apnga eden gutud. Nan nahhun an inalina an mangipadutu' ay da'yu (unu charis) ya apngan di iGreece, ya nan netob an inalinan mangipalenggop ni' ay da'yu (unu shalom) ya apngan di Hudyu.
Hay Aat di Punhumalyaan Jesus hi Pumbangngadana
I'ibba', mahapul an edenolmi da'yun Apo Dios, ya manu ay mahapul an atonmi ti nen gun dumo'do"ol di pangulugyu ya nan pumpopohhodanyu. Ya hiyaat unmi da'yu iyamlah nan tatagun Apo Dios an ma'amu'amung hinan himpapangili. An gunmi alyon di innaynayunyuy pangulugyu an ta"on hi un do'ol di umi'ingol ya mangipaligligat ay da'yu.
Ya henen ina'inatyu ya hiyay pangimmatunan hinan punhumalyaan Apo Dios, ya ibilang da'yun middum hinan pumpapto'ana an hiyay dimmalat hi ipaligligatanyu. Mu nahamad di aton Apo Dios, at ibollohnay inat nan mangipaligligat ay da'yu ta ipaligligatna goh dida. Mu ditu'un mipaligligat ya ipadinong Apo Dios di ligat tu'uh awnih pumbangngadan da Apu tu'un hi Jesus ya nan nun'abagtun a'anghelnan malpud abuniyan ta mumpattigda. Ya waday mabnang an apuy an nunle'woh ay Hiya, at moltaona nan agguy kimmulug ay Apo Dios ya nan adi mangunud hinan Maphod an Ulgud an hay aat Apu tu'un hi Jesus. Ya hay pummoltanan dida ya munligligatdah mid pogpogna, at milahhindan Apo Dios, ya adida tigon nan nidugah an amaphodan di aat di anabagbagtun nan abalinana. 10 Ya henen algaw an pumbangngadana ya ulgudon nan tatagun pento'nay anabagtuna, ya an amin nan mangunud ay Hiya ya dayawonda Hiya. At middum ayu goh ti inunudyu din impa'innilamin da'yu.
11 Ya hiyaat unmi da'yu iluwaluwaluan. Ya da'yuy pento' Apo Dios an mangunud ay Hiya, at ten ihapihapitmi da'yun Hiya ta ipaphodnay aatyu ti pohdonan mihamad. Ya ihapitmi goh ta ipa'annungnay amaphodanyu an hiyah ne popohdonyu, ya ta ipa'annungna goh nan tinamuanyu an dumalat nan pangulugyu. 12 Ya nan aatyuy pangimmatunan hi anabagtun Apu tu'un hi Jesus. Ya ipabagtu goh da'yu ti ipadutu' da'yun Apo Dios ya hi Apu tu'un hi Jesu Kristu.

*1:1 Hay ohah ngadana ya Silvanus.

1:2 Inusal Apostoles Paul nan duwan kalahin di apnga eden gutud. Nan nahhun an inalina an mangipadutu' ay da'yu (unu charis) ya apngan di iGreece, ya nan netob an inalinan mangipalenggop ni' ay da'yu (unu shalom) ya apngan di Hudyu.