Ephesians
Hay Aat Ten Liblu
Hay Nangitudo' eten Liblu: hi Apostoles Paul (1:1).
Hay Nangitud'an Paul eten Liblu: nan kimmulug ad Ephesus (1:1).
Hay Pohdon nan Ngadan ten Liblun Ibaga: hiyay ngadan di ohan siudad hinan Provinciad Asia.
Hay Gutud hi Nangitud'anan ten Liblu: mid mapto' ya hidin 56 A.D. Ya nundehhan hi nangitud'anah nan tudo'nad Colosse.
Hay Teman ten Liblu: hay aat nan niddum hinan Himpampun an Tatagun Kristu.
Hay Outline ten Liblu:
Hay DOCTRINAH aat nan niddum hinan Himpampun an Tatagun Kristu (1:1—3:21)
Hay introduction di aat nan niddum hinan Himpampun an Tatagun Kristu (1:1-2)
Hay nanalimun hinan niddum hinan Himpampun an Tatagun Kristu (1:3-14)
Hay niluwaluan nan niddum hinan Himpampun an Tatagun Kristu (1:15-23)
Hay abaliwan nan niddum hinan Himpampun an Tatagun Kristu (2:1-10)
Hay nalammungan nan niddum hinan Himpampun an Tatagun Kristu (2:11-22)
Hay nangulgud hinan niddum hinan Himpampun an Tatagun Kristu (3:1-13)
Hay ATON nan niddum hinan Himpampun an Tatagun Kristu (4:1—6:24)
Hay atonda ni' ahan ya munhina"agida (4:1-16)
Hay atonda ni' ahan ya hukatanday ugalida (4:17-32)
Hay atonda ni' ahan ya mi'popohhodanda (5:1-5)
Hay atonda ni' ahan ya ipattigday aatda an ayda mapapatalan (5:6-14)
Hay atonda ni' ahan ya manomnomanda (5:15-17)
Hay atonda ni' ahan ya abulutonday niyo'odolan nan Na'abuniyanan an Lennawan dida (5:18-20)
Hay atonda ni' ahan ya ephodday niyatandah nan udumnan tatagu (5:21—6:9)
Hay atonda ni' ahan ya mi'buhuldah nan diyablu (6:10-20)
Hay atonda ni' ahan ya innilaonday aat nan numbino'ob'on an i'ibbadan kimmulug (6:21-22)
Hay atonda ni' ahan ya umanlada (6:23-24).
1
1 Heten tudo' ya nalpun ha"in an hi Apostoles*Hay pohdonan ibaga ya nahnag. Paul an hennag Jesu Kristu ta ul'ulgudo' nan Hapitna ti hiyah ne pohdon Apo Dios. Ya ten itud'a' da'yun tatagun Apo Dios ad Ephesus an un'unnud hinan iddumanyun Jesu Kristu.
2 Hay pohdo' ya hi Apo Dios an hi Ama tu'u ya hi Apu tu'un hi Jesu Kristu ya hom'on ya ipalenggop da'yu.†Inusal Apostoles Paul nan duwan kalahin di apnga eden gutud. Nan nahhun an inalina ya hom'on da'yu (unu charis) ya apngan di iGreece, ya nan netob an inalinan ipalenggop da'yu (unu shalom) ya apngan di Hudyu.
Hay Nanalimunan Apo Dios ay Ditu'u ti nan Idduman Tu'un Kristu
3 Hapiton tu'uy amaphodan Apo Dios an hi Aman Apu tu'un hi Jesu Kristu! Ti hinalimunan ditu'u ti idat Apo Dios an amin di nalpud abuniyan ay ditu'un niddum ay Kristu. 4 Ya din agguy nalmuwan tun luta ya pepento' ditu'un Apo Dios ta ditu'uy tatagunan middum ay Kristu. At hay pangibilanganan ditu'u ya mapatalan tu'un mi'id ah bahol tu'u. Ya dimmalat nan pamhodna 5 ya ninonomnomnah din hopapnan iyimbaluy ditu'un dumalat hi Jesu Kristu ti hiyah ne penhodnah atona. 6 At hapiton tu'uy amaphodana ti nidugah di homo'na. At do'do"ol di gohgohnan ditu'u ti niddum tu'uh nan Imbaluynan pohpohdona!
7 Ti hay na'at ya nibugha' di dalan Kristuh nan nilanhaanah nan krus ta way atonan mangibo'lah bahol tu'u ta ma'aliwan ti nidugah di homo' Apo Dios, 8 at nidugah goh di homo'nan ditu'u! Ya inilan Apo Dios an amin di logom, ya nidugah di anala'engna 9 ti impa'innilana mahkay ay ditu'u din ninomnomnah ma'at ay Kristu. 10 Ya din ninomnom Apo Dios an penhodna ya ipa'annungnah un madatngan nan gutudna. Ya hay ipa'amungna ya an amin di nalmun wad abuniyan ya tun luta ta lammungona dida ta ohay hakup an hi Kristuy mumpapto' ay dida.
11 An amin di aton Apo Dios ya hiyah ne ninomnomnah pohdona, at pento' ditu'u ta mi'godwa tu'uh nan ipatawidnan Jesus, ti hiyah ne ninomnomnah atonah din agguy nalmuwan an amin di logom. 12 Ya manu ay inatna ya ta da'min nahhun an manahalimid hinan aton Jesus ya hapitonmiy amaphodan di anabagtuna!
13 Ya inatna goh ay da'yu ti din nangngolanyuh nan Makulug an Hapit Apo Dios an nan Maphod an Ulgud an mangituduh atonyun mabaliwan ya kinulugyuh Kristu. At hennag Apo Dios nan Na'abuniyanan an Lennawan da'yu goh ta Hiyay pangimmatunan hi un da'yuy tataguna. 14 Ya nan Na'abuniyanan an Lennaway namatangnan ditu'u ta engganay un umannung din intulagna ta Hiyay pangimmatunan hi unna ipa'annung di abaliwan tu'u ta way ipabagbagtuana!
Hay Nangiluwaluan Paul hinan i'Ephesus
15 Hidin dengngol'uy aat di pangulugyun Apu tu'un hi Jesus ya nan pamhodyun‡Hiyah ne hapit an agape hinan hapit di iGreece. amin hinan tatagun Apo Dios 16 ya agguy'u indinong an gun nangiluwalun da'yun Apo Dios hi pundenola' ay da'yu. 17 Ya gun'u goh inluwalun Apo Dios an nabagbagtun hi Aman Apu tu'un hi Jesu Kristu ta badangan da'yuh nan Na'abuniyanan an Lennawa ta udmanay inilayu, ya ta ipa'innilana goh di aat Apo Dios ta way atonyun manginnila. 18 Ya gun'u goh inluwalu ay Hiya ta ipaphodnay nomnomyu ta innilaonyuy aat nen hahalimidonyu, ya ta innilaonyu goh nan na'abbagbagtun tawid nan tatagun Apo Dios an intulagna, 19 ya ta innilaonyun nidugah di abalinan Apo Dios an bumadang ay ditu'un mangunud. Ti hay aat nan abalinanan mamadang ay ditu'u ya nidugah an nipaddung hinan abalinanan 20 nummahun Kristuh din natayana ti impabunad abuniyan hinan tronon nan na'abbagbagtu, at nihodpeng hi agwana ta mumpapto'. 21 At hi Kristuy na'abbagbagtun ap'apu ya un nan a'anghel ad abuniyan, ya an amin hinan a'ap'apu, ya ta"on hi un an amin hinan numbino'ob'on an a'ap'apuh tun luta ya ad abuniyan. Ya umat ay hina at inyal'allana an na'abbagbagtuh Jesus an ap'apu ya un nan a'ap'apud ugwan ya nan mun'ap'apuh awni. 22 Ya impaboltan Apo Dios an amin di logom ay Jesus ta Hiyay okod. Ya iniddumnah Jesus hinan Himpampun an Tataguna, at hi Jesus di ap'apun an amin di logom. 23 Ya nilammung nan Himpampun an Tatagun Apo Dios ay Kristu an paddungnay diday odolna ta Hiyay ulu. At nan aat Kristu ya boltanon nan Himpampun an Tataguna, ya wadah Kristuh an amin hinan logom.
*1:1 Hay pohdonan ibaga ya nahnag.
†1:2 Inusal Apostoles Paul nan duwan kalahin di apnga eden gutud. Nan nahhun an inalina ya hom'on da'yu (unu charis) ya apngan di iGreece, ya nan netob an inalinan ipalenggop da'yu (unu shalom) ya apngan di Hudyu.
‡1:15 Hiyah ne hapit an agape hinan hapit di iGreece.