24
Hay Nipaddungan nan Limmatin Banga
1 Hidin miyapuluh algaw hinan miyapuluy bulan eden miyahiyam hi tawon hi awadanmid Babylon*Unu hidin January 15, 588 B.C. ya inalin goh Apo Dios ay ha"in di, 2 “Ezekiel, itudo'mu ni' heten petsa ti ad ugwan an algaw ya na'uy nan alid Babylon an didah nan titindaluna ta gubatonda nan i'ibbayun iJudah. 3 Ya ibaagmu ay danen mumpungngohoy an tatagu' heten nipa"el an alyo' an na'abbagbagtun Dios an alyom di,
Ittuwanyuh danum nan ongol an banga,†Hay ipa"elna ya ad Jerusalem.
ya impaluwagyu.
4 Ya intubungyu nan dotag an nan mun'aphod an umat hi ulpu ya tapi,‡Hay ipa"elna ya nan iJerusalem an nunnomnom an dumalat nan amaphodda ya mi'id di nappuhin ma'at ay dida ti agguyda ni'balud ay Alin hi Jehoiachin hidin 597 B.C.
ya ni'tubungyu goh nan mun'aphod an nun'atungalan,
ya tinano'yu ta engganah un malutu.
5 Ya tinunguwanyu nongkay nan nibobongat hi do'ol an ayiw§Hay ipa"elna ya nan almas ya titindalun nan iBabylon. ta engganah un matano',
mu hay paltionyu ya nan ma"aphod an kalnilu.
6 Ya Ha"in an na'abbagbagtun Dios ya alyo' di,
Mahmo' nan babluy an nido'lan di pumatopatoy an nipaddungan ten ulgud
ti heten babluy ya nipaddung hinan bangan nalatian.
Ya hanan dotag an nitubung hidi ya ma'ohha'ohhan ma'agaw hi engganah un mapuh.
7 Ti nan babluy an nipaddungan ten banga ya hinan mabinatun namatayandah nan tatagu
an unda ginulat an inyuy hidi ta adi magabunan nan dalada.
8 Ya tinnig'u nan dalada,
mu agguy'u ginabunan ti nidugah an umipabungot
an ayda mumbagah mangiyawit ay dida.
9 At hiyanan alyo' di,
Mahmo' nan babluyyud Judah
an nido'lan di pumatopatoy ti mapogpogda
ti Ha"in di paddungnay manimung hi mangupun hi ayiw ta panungu' enen babluy.
10 At agayu ta puntunguwanyu nan nibongat ta matano' nan dotag,
ya inudmanyuh mangipapolhat hi mihda.
Ya inagawyu nan lamoh,
ya inangangyu nan tungal ta engganay un moghob.
11 Ya imbongatyu nan banga an mi'id ah nittuh nan gimmagaban bala ta engganay un bumala
ta way aton nan latina an mun'a'ukal,
ya ta"on hi un nan immugtul an nun'ep'ot hinan banga.*Hay ipa"elna ya moghob ad Jerusalem.
12 Mu ta"on hi un nibongat nan bangah nan apuy
ya agguy damdama na'aan nan immugtul an nep'ot.
13 At da'yun iJudah ya nidugah an umipabain nan gunyu aton. Impadah'un nunleneh ay da'yu, mu nihimung an adiyu pohdon. At hiyanan gapuh nan baholyu ya moltao' da'yuh engganah un mabauy bungot'un da'yu.
14 Ya ten nadatngan di pummoltaa' ay da'yu. Ya immannung an ato' ti mi'id mahkay di homo"un da'yu ti nidugah ahan nan ato'atonyu. Ha"in an na'abbagbagtun Dios di nanapit ete.”
Hay Natayan nan Ahawan Ezekiel
15 Palpaliwan goh ya inalin Apo Dios ay ha"in di, 16 “Ezekiel, un himbumagga ya matoy nan pohpohdom an tagu. Mu adi' pohdon an ipattigmuy punlungdayaam, ya adi'a ni' ahan lumugwa. 17 Ya ta"on hi un'a lumugwa ya munlungdaya mu ta adim ahan ipatpattig. Ya adim ni' an'anon nan pongotmun turban†Nan ugalin di Hudyu ya inaanday turbandah uluda ta hupu'anday uluda. ya nan hapatusmu.‡Inaan nan Hudyuy hapatusdah unda ipattig di punlungdayaanda. Ya adim hophopan di angahmu.§Hinophop nan Hudyuy angahdah unda bumain (Mic. 3:7) unu waday palla'da (Lev. 13:45). Ya adi'a ni' mangan hinan onon di nabalu.”
18 Ya henen algaw ya immuya' ni'hahhahapit hinan tatagu, mu eden nahdom ya natoy hi ahawa'.*Natoy ad Babylon hidin August 14, 586 B.C. hinan algaw din nanghoban nan iBabylon hinan Timplun Apo Dios ad Jerusalem. At heden nabiggat ya impa'annung'un inat din inalin Apo Dios.
19 At palpaliwan ya inalin din tataguy, “Danen gunmu impattig hidin natayan ahawam ya undan waday pohdom an ipa'innilan da'mi?”
20 Ya inali' ay diday, “Waday impa'innilan Apo Dios an inalinay, 21 Adi anu madnoy ya pa"iona nan Timplun ipahiyayu ya paddungnay punhi'uganyu. Ya nan imbabaluyyun wadad Judah ya mun'a'atoydah gubat. 22 At hanan tinnigyun inat'uh natayan ahawa' ya hiyay atonyu. At adiyu ipatpattig di lumungdayaanyu, ya adiyu onon nan onon di nabalu. 23 Ya adiyu anon nan nepngot hi uluyu an turban, ya adiyu goh anon nan hapatusyu. Mu ta"on hi unyu adi ipatpattig di lumungdayaanyu mu ma"attig ti nun'a'ung'ung ayu. Ya manu ay ma'at hatun da'yu ya gapuh nan nun'appuhin ato'atonyu. 24 At henen inat'u ya hiyay pangiyunnudanyu. Ya ma'at ay hana ya hi Apo Dios mahkay di nomnomonyu.”
25 Ya inalin goh Apo Dios ay ha"in di, “Ezekiel, tigom adyaat adi madnoy man at pa"io' nan Timplu an paddungna nongkay hi ihi'ugan nan tatagu, ya ta"on hi un nan imbabaluyda ya ipapatoy'u dida. 26 Ya henen algaw goh ya waday ohan melwang ay dida an umalih nad Babylon an mangipa'innilah nan na'na'at. 27 Ya mabalin mahkay an humapit'a ta mi'hapit'an hiya. At hene nongkay an ma'at ay he"ay panginnilaan nan tataguh ma'at ay didah udum hi algaw ta olom ni' ya nomnomona' an Dios.”
*24:1 Unu hidin January 15, 588 B.C.
†24:3 Hay ipa"elna ya ad Jerusalem.
‡24:4 Hay ipa"elna ya nan iJerusalem an nunnomnom an dumalat nan amaphodda ya mi'id di nappuhin ma'at ay dida ti agguyda ni'balud ay Alin hi Jehoiachin hidin 597 B.C.
§24:5 Hay ipa"elna ya nan almas ya titindalun nan iBabylon.
*24:11 Hay ipa"elna ya moghob ad Jerusalem.
†24:17 Nan ugalin di Hudyu ya inaanday turbandah uluda ta hupu'anday uluda.
‡24:17 Inaan nan Hudyuy hapatusdah unda ipattig di punlungdayaanda.
§24:17 Hinophop nan Hudyuy angahdah unda bumain (Mic. 3:7) unu waday palla'da (Lev. 13:45).
*24:18 Natoy ad Babylon hidin August 14, 586 B.C. hinan algaw din nanghoban nan iBabylon hinan Timplun Apo Dios ad Jerusalem.