31
Hay Ipaddungan nan Ayiw an Cedar
1 Hidin hopap di algaw hinan miyatlun bulan hidin miyapulu ta ohan tawon*Unu hidin June 21, 587 B.C. hi niyayanmid Babylon ya inalin Apo Dios ay ha"in di, 2 “Ezekiel, alyom hinan alid Egypt ya hinan tatagunah ten ibaga' an alyom di,
Da'yun i'Egypt ya ongol di abalinanyu
an mi'id di nipaddunganyuh nan abablubabluy.
3 Ti nan nundongol an aatyu ya umat hidin nundongol an aat ad Assyria hidin hopapna
an umat hinan ayiw an cedar ad Lebanon an manaphapang an lidumana nan inalahan,
ya nidugah an ata'nang an umatam ad daya.
4 Ya waday adi matdu' an obob†Hay ipa"elna ya nan Wangwang an Tigris ya Wangwang an Euphrates an wad Assyria. hidih nan way awadana,
at hiyanan nanginhehe'on ya ta"on hi un nan udum an ayiw eden inalahan ya nadanuman.
5 At gapu ta waday danum hinan nitammana ya immata'ata'nang nongkay,
ya nanaphapang ya un nan udum an ayiw.
6 Ya do'ol di numbino'ob'on an hamutin numbuyah nan hapangna,
ya do'olday animal an na'lum hinan puuna,
ya do'olday tatagun umuy milidum hinan puuna.
7 Ya manu ay nongkay ma"aphod di tigaw nen ayiw ya manaphapang
ti linumnod an numpanga'atam di lamutnah nan awadan di do'ol an danum.
8 At hiyanan henen cedar ya mi'id di nipaddungan di amaphodna an ta"on hi un hidih nan galden'un Dios,
ya ta"on hi un hanan bolbol ya nan udumnan kalahin di ayiw ya adida umat enen cedar.
9 Ya manu ay umat hina ya Ha"in di nangipahapang ya nangipaphod enen ayiw ad Lebanon,
at hiyanan an amin nan ayiw hidih nan galden'ud Eden ya paddungnay umamohdan hiya.
10 Mu gapuat goh ta nangintata'nang at hiya ya anggay di ata'nang ya un nan udum ya mumpahiya. Ha"in an na'abbagbagtun Dios di nanapit ete. 11 At hiyanan iyabulut'un gubaton nan ohan nundongol an ali ta paddungnay malngoh ti nappuhiy pangatna. Ya din'ug'u ta okod heden alih atonan hiya ta hiyah ne moltana.‡Nan Pumpapto'an di i'Assyria ya nidugdugah di amabi'ahnan den gutud ya un nan udumnan pumpapto'an, mu gapuh pumpahiyaanda at hennag Apo Dios nan titindalun nan Alin hi Nabopolassar (626-605 B.C.) an nalpud Babylon ta ni'gubatdan dida, ya inabakda didad Carchemish hidin 609 B.C., at napogpogda mahkay. 12 At nan i'Assyria ya nipaddung enen ayiw an lengngoh nan immalin mun'abubungot an nalpuh ohan babluy. At hana ay an nun'ahpa' an hapangna ya awakilatdah nan duntug ya hinan nundotalanan natu"inana. Ya ta"on hi un nan tatagun nalpuh udum an babluy an gun munlidum hidi ya nuntaynanda. 13 At un punduldulmunan nan animal nan nun'aholpeng an i"itang an hapangna ya tubuna. Ya un hay pumpatpattu'an di hamuti nan agguy nahpa' an hapangna. 14 At hiyanan mete"an de ya mi'id mahkay di umata'nang hi ayiw ta umat enen immata'nang an ayiw an nitu'dud hi ad daya an ta"on hi un neheggon hi danum. Ti an amin mahkay di ayiw ya waday nagtud hi atayanda an umat hi tagu an matoyda ta umuydad dolom hi awadan di nun'atoy.”
15 Ya inalin goh nan na'abbagbagtun Dios di, “Hidin natayan den ayiw ya paddungnay tagun natoy, ya immuy nongkay hi awadan din nun'atoy. Ya tindu"un den gutud nan danum, at mi'id di umayuh. At gapun den ata'nang an ayiw ya paddungnay nunlangdu nan ayiw ad Lebanon ti na'uy an mumpumpi'yatoy nan udum an ayiw hidi. 16 At hanan wah udum an babluy ya wumogwogdah ta'otdah pangngolandah emog nen ayiw an matu"in. Ya umat hinan tagun matoy an umuy hi awadan di nun'atoy. Mu an amin nan nun'ahhun an immuy hidin umat enen ayiw an nalpud Babylon ya nan udum an nalpud Eden ya mun'am'amlongda ti ta"on hi un hiya ya immuy hidi. 17 Ya umat goh hinah nan wah udum hi babluy an nundenol enen babluy an nipaddungan nen ayiw ya natoyda ta nini'yuydah awadan di nun'atoy ta niddumdah nan udum an natoy hi gubat.
18 Ya ta"on hi un da'yun i'Egypt ya mipaddung ayu anu goh enen ayiw an ta"on hi un nundongol di amaphod di babluyyu ti adangyan ayu, ya ongol di abalinanyu, mu ma'at ay da'yu nan nibagan na'at hinan ayiw hi ad Eden. Ti paddungnay malngoh ayu ta umuy ayuh awadan di nun'atoy an agguy nibilang hi tagun Apo Dios. Ha"in an hi Apo Dios di nanapit ete.”
*31:1 Unu hidin June 21, 587 B.C.
†31:4 Hay ipa"elna ya nan Wangwang an Tigris ya Wangwang an Euphrates an wad Assyria.
‡31:11 Nan Pumpapto'an di i'Assyria ya nidugdugah di amabi'ahnan den gutud ya un nan udumnan pumpapto'an, mu gapuh pumpahiyaanda at hennag Apo Dios nan titindalun nan Alin hi Nabopolassar (626-605 B.C.) an nalpud Babylon ta ni'gubatdan dida, ya inabakda didad Carchemish hidin 609 B.C., at napogpogda mahkay.