2
1 Ya innayun goh Apo Dios an inali ay ha"in ta ibaga' hinan i'ibba' an i'Israel di, “Ditu'uy tatagun*Hiyah ne nibalin an ngadan Lo-Ammi. Apo Dios an pa'appohpohdona.”
Hay Nangipaddungan Apo Dios hi ad Israel hinan Babain Puta
2 Ya inalin goh Apo Dios ay ha"in di,
“Umat hinan inatmu ay ahawam an inalim hi bo'on mahkay ahawam di ato' ay da'yun i'Israel.
Ti mahapul an idinongyun mumpabadang hinan udum an madayaw.
3 Ti gulat ta adi ipogpog ahawam an me'yengha at la'tot ya benladam
ta umat hidin nitungawanan agguy nalubungan.†Hay ugalin di Hudyu ya nan lala'i di mangidat hi lubung di ahawana (Ex. 21:10; Ezek. 16:10), at hay pohdonan hapiton ya idinong Hosea an manalimun ay Gomer ta okod hiyan mumputah udum an linala'i.
At umat hinay ato' ay da'yuh unyu adi ipogpog an mundayaw hinan bulul.
Ti pumbalino' tun lutayud Israel hi mapulun,
at la'tot ya matoy ayuh inuwawyu.
4 Ya paddungnay imbabaluy da'yuh udum an lala'i,
at hiyanan adi' da'yu hom'on.
5 Undan adi ahan ababain an hiyah ne nawadaanyu.
Ti paddungnay mitnud hi inayuh nan linala'in namhod ay hiya
ti dida anuy mangidat hi onona, ya inumona, ya iyulohna,
ya nan mun'aphod an ilubungna, ya bayah, ya lana.‡Kinulug nan tatagu an hi Ba'al di nangidat ay dane ti hiya anuy nangipiyalih udan.
6 At hiyanan hawana' nan owonah hubit,
ya ihamad'un dedengon di nunlene'woh
ta mi'id mahkay di atonan lumahun.
7 At ta"on hi unna ilulud an mitnud hinan e'enghana
ya mi'id di atona ta umuyna anapon dida,
mu mi'id di abalinana.
At la'tot mahkay ya alyonay,
Unna' at mumbangngad hidin ahawa' tuwali
ti od'odolnay nitagua' hidin hopapna ya un ad ugwan!”
8 Ya inalin goh Apo Dios di,
“Mu engganad ugwan ya adina ahan abuluton an Ha"in
di nangidat ay hiyah paguy, ya bayah, ya lanan di olibo,
ya ta"on un nan silver ya balitu' an inyammadah nan bululdan hi Ba'al.
9 At hiyanan bangngado' nan nun'idat'un paguy hidin ahiboto'
ya nan pinahapah an bayah,
ya ta"on un nan mun'aphod an lo'ob ya lubung an indat'un panophopnah odolna.
10 Ta paddungnay bolada' hi hinagang nan e'enghana
an mi'id di mabalin hi mangipawan Ha"in.
11 Ya pogpogo' an amin nan pun'amlongana
an umat hinan tinawon ya binulan an behta,
ya ta"on un nan Habadun ngilin.
12 Ya pumpa"i' nan intanomnan greyp ya nan ayiw an fig
an alyonah imbayad nan linala'in nangelo' ay hiya.
Ya pahangawo' di do'ol an holo' eden nuntammana ta panganan nan atap an animal.”
13 Ya inalin goh Apo Dios di,
“Moltao' hiyan dumalat di nan'uganan Ha"in
ti nun'onong hi incense hinan do'ol an bulul an Ba'al
ya hay nangusalanah nan nun'abalul an umat hi hengheng
ta nangagay'aynah nan paddungnay e'enghana ta inaliwana' ay hiya.”
Hay Pangipaphodan Apo Dios hinan Holag Israel
14 Ya inalin goh Apo Dios di,
“Ta"on un umat hinay nipaddunganyu mu awniat ihapita' da'yu
ta itnud'u da'yuh nan mapulun ta ephod'un mi'hapit ay da'yu
ta way atonyun mumbangngad ay Ha"in.§Hatu ya ma'at hinan Hinlibuy Tawon.
15 At ibangngad'u da'yuh babluyyu,
ya pogpogo' mahkay di punligatanyu.
At mun'am'amlong ayu an umat hidin o'ommodyuh nanaynandad Egypt.
16 At hitun a'atan ne ya adiyu mahkay alyon hi un hi Ba'al*Hay pohdon ten ngadan di bulul an ibaga ya apu unu ahawa. Hiyah ne hanul di Hudyu.
di paddungnay ahawayu ti Ha"in ya anggay di unudonyu.
17 At pogpogo' hi punnomnomanyuh Ba'al
ta adi gun mahaphapit.
18 At malenggop di pi'taguanyu ti mi'id di aguhanyu
ti ta"on un nan atap an animal, ya nan hamuti,
ya nan mabuluh an dumalan ya mi'id di nappuhih atondan da'yu.
Ya umat goh an mi'id di mangubat ay da'yu
ti pa"io' an amin nan ma'usal hi gubat an umat hi hanggap ya pana.
19 Ya abuluto' da'yu ta ato' ay da'yuy maphod,
ya ipa'dam'u nan pamhod†Heten hapit an pamhod ya nitudo' hinan hapit di Hudyu, mu gulat ta nitudo' hinan hapit di iGreece at immannung an agape di nitudo' hitu an bo'on nan pamhod an phileo unu eros ti heten kalahin di pamhod ya minaynayun an madpol an ta"on un way malgom an ma'at. ya homo"un da'yuh enggana.
20 Immannung an adi' ibahhaw tun inali' an da'yuy tatagu'
ta wan abulutonyu an Ha"in hi Apo Dios.
21 Ya henen algaw ya donglo' mahkay di luwaluyu ta ipa'ali' di udan,
22 at humangaw di itanomyun paguy, ya greyp, ya olibo.
At hay pangalidah nan babluyyu ya ad Jezreel‡Hay pohdonan ibaga ya nan ipahangaw Apo Dios. an dumalat di ado'ol di ipahangaw'u.
23 At hitun pangibangngada' ay da'yuh nad Israel ya Ha"in mahkay di okod ay da'yu.
At da'yun nangalya' hi adi' pohdon§Unu Lo-Ruhamah (Hos. 1:6). di pangipattiga' hi pamhod'u,
ya da'yun nangalya' hi bo'on'u tatagu*Unu Lo-Ammi (Hos. 1:9). di pangalya' hi tatagu' da'yu mahkay.†Rom. 9:25.
Ya awniat alyonyu nongkay di Ha"in hi Apo Dios.”
*2:1 Hiyah ne nibalin an ngadan Lo-Ammi.
†2:3 Hay ugalin di Hudyu ya nan lala'i di mangidat hi lubung di ahawana (Ex. 21:10; Ezek. 16:10), at hay pohdonan hapiton ya idinong Hosea an manalimun ay Gomer ta okod hiyan mumputah udum an linala'i.
‡2:5 Kinulug nan tatagu an hi Ba'al di nangidat ay dane ti hiya anuy nangipiyalih udan.
§2:14 Hatu ya ma'at hinan Hinlibuy Tawon.
*2:16 Hay pohdon ten ngadan di bulul an ibaga ya apu unu ahawa. Hiyah ne hanul di Hudyu.
†2:19 Heten hapit an pamhod ya nitudo' hinan hapit di Hudyu, mu gulat ta nitudo' hinan hapit di iGreece at immannung an agape di nitudo' hitu an bo'on nan pamhod an phileo unu eros ti heten kalahin di pamhod ya minaynayun an madpol an ta"on un way malgom an ma'at.
‡2:22 Hay pohdonan ibaga ya nan ipahangaw Apo Dios.
§2:23 Unu Lo-Ruhamah (Hos. 1:6).
*2:23 Unu Lo-Ammi (Hos. 1:9).
†2:23 Rom. 9:25.