10
1 Ya inali' goh di,
“Ditu'un holag Israel ya umat tu'u ni' hinan greyp an nangimbubunga.
At un tu'u umadangyan,
mu unyuat goh tagan di ammah pun'onnganyu ya pundayawanyuh nan inyamman di tagu.*Gun immadangyan nan i'Israel hidin timpun di nun'alian Jeroboam II (793-753 B.C.).
2 At nan impa'enghayun layah ya ngohoy di pummoltan Apo Dios ay da'yu,
at ta"on un nan pun'onnganyu ya nan dayawonyu ya pumpa"ina.
3 At la'tot ya alyonyuy,
Din'ug tu'uh Apo Dios,
at hiyanan din'ug ditu'u mahkay ay Hiya,
at mi'id di ali tu'u.
Mu ta"on hi un wada ya adi ditu'u badangan damdama.
4 Ti do'ol di inaliyun hinohha, mu agguyyu inat.
At hiyanan mundidiklammuan ayu
an umat ayuh nan puma"i an holo' hinan payaw unu uma.
5 Ya da'yud Samaria ya inyammayuy balitu' an baka†I Ki. 12:28-33. hi bululyud Beth Aven,‡Hay pohdonan ibaga ya babluy hi pumbaholan (bahaom nan footnote di Hos. 4:15 ta innilaom di aat ten lugal).
mu la'tot ya ilayaw nan buhulyu,
at hiyanan kumila ayu ya tuma'ot ayun ta"on un nan papadi
6 ti iyuydad Assyria heden bululyu ta idatdah nan nidugah an alida.§Unu nan Alin hi Shalmaneser V (726-722 B.C.) an imbaluy nan Alin hi Tiglath-Pileser (II Ki. 17:3-5; 18:9-11). Hi Shalmaneser ya natoy hidin nunli'ubandah nan siudad ad Jerusalem, at nan Alin hi Sargon II (722-705 B.C.) an nipallog ay hiyay nangelpah hi tamunah nangilayawandah nan Hudyu ta nipiyuydad Assyria (Isa. 20:1).
At da'yun i'ibba' an holag Israel ya mabainan ayuh nan nundayawanyuh nan inyammayun bulul
an hay ayiw di udum hi niyamma.
7 Ya ta"on goh nan aliyud Samaria ya miyuy hi udum an babluy
an umat hinan it'ittang an hapang an gun miyanud hinan danum.
8 Ya umat goh an mapa"i nan pundayawanyuh nan duntug an Beth Aven*Hay pohdonan ibaga ya babluy hi pumbaholan. ta mahu'munan hi wa'al
ti didatuy dimmalat hi numbaholan tu'un holag Israel.
Ya alyon tu'u mahkay di,
Anaad ta adi matob nan duntug ta magabunan tu'u kaymu?ӠLk. 23:30.
9 Ya inalin Apo Dios di,
“Engganad ugwan ya gun ayu bumahobahol
an umat ayuh din o'ommodyud Gibeah.
At hiyanan mun'a'atoy ayuh nan gubat ad Gibeah.‡Judg. 19:1-20:48.
10 Ti iyal'allayun mangat hi adi maphod ya nginumhay ayu,
at hiyanan iyabulut'u ta ma'amungday tatagun nalpuh udum hi babluy
ta megobdan mangubat ay da'yu ta baludon da'yu
ta mumbalin ayu goh hi himbut.
11 Ya manuh din hopapna ti na'na'unnud ayu
an umat ayuh nan na'na'unnud an baka an mahlun mun'ili'.
Mu ad ugwan ya paddungnay ipaku' ay da'yu han madamot,
at Ha"in di manguyud ay da'yun i'Israel ya iJudah,
ya da'yuy mun'aladuh nan paddungnay ma'ulhin luta.§Hay pohdon nan ma'ulhin luta an hapiton ya nan babluy ad Assyria ya ad Babylon.
12 At uggoh mah tatagwa ta idinongyu nan nun'appuhin ato'atonyu
ta mumbangngad ayun mundayaw ay Ha"in
ta way ato' an munwagah ay da'yu?
Paddungnay umat ayuh nan na'aladun payaw an maphod di humangaw hi nitanom
ta way atonyun mun'apit hinan munnananong an pamhod.
Ya ibangngadyun mundayaw ay Ha"in
ta way ato' an mangipa'alih nan paddungnay udan an wagah'un da'yu.
13 Mu gapu ta nuntanom ayuh nan adi maphod
at hiyanan umat goh hinay ma'at ay da'yu,
at paddungnay inu'munyuy bungan di layahyu.
Ya hay oha goh ya nundenolanyuy bi'ahyu ya nan ado'ol di tindaluyu.
14 Mu hay immannung ya abakon da'yuh nan buhulyu,
at ta"on un nan allupyu ya pumpa"ida.
At umat hi nama"ian nan Alin hi Shalman*Agguy tu'u inilay aat ten tagu. ad Beth Arbel†Agguy tu'u inilay awadan ten babluy. hi nangubatanan nen babluy
an ta"on un nan binabai ya ung'ungungnga ya nunhaplatda dida ta nun'a'atoyda.
15 At umat hinay ma'at ay da'yun i'Israel an nundayaw ad Bethel‡Hiyah ne immannung an ngadan nan babluy ad Beth Aven (bahaom nan footnote di Hos. 4:15).
ti nidugah ahan di numbaholanyu.
At hinan pangigib'anyuh nan helhelong ya patayonda nan aliyu,
at hiyah ne pogpog di pun'alianyu.”
*10:1 Gun immadangyan nan i'Israel hidin timpun di nun'alian Jeroboam II (793-753 B.C.).
†10:5 I Ki. 12:28-33.
‡10:5 Hay pohdonan ibaga ya babluy hi pumbaholan (bahaom nan footnote di Hos. 4:15 ta innilaom di aat ten lugal).
§10:6 Unu nan Alin hi Shalmaneser V (726-722 B.C.) an imbaluy nan Alin hi Tiglath-Pileser (II Ki. 17:3-5; 18:9-11). Hi Shalmaneser ya natoy hidin nunli'ubandah nan siudad ad Jerusalem, at nan Alin hi Sargon II (722-705 B.C.) an nipallog ay hiyay nangelpah hi tamunah nangilayawandah nan Hudyu ta nipiyuydad Assyria (Isa. 20:1).
*10:8 Hay pohdonan ibaga ya babluy hi pumbaholan.
†10:8 Lk. 23:30.
‡10:9 Judg. 19:1-20:48.
§10:11 Hay pohdon nan ma'ulhin luta an hapiton ya nan babluy ad Assyria ya ad Babylon.
*10:14 Agguy tu'u inilay aat ten tagu.
†10:14 Agguy tu'u inilay awadan ten babluy.
‡10:15 Hiyah ne immannung an ngadan nan babluy ad Beth Aven (bahaom nan footnote di Hos. 4:15).