8
Hay Pangubatan nan i'Assyria hi ad Damascus ya ad Samaria
1 Palpaliwan ya himmapit goh hi Apo Dios ay ha"in an inalinay, “Ummal'ah ambilog hi puntud'an, ya inongolmun itudo' nan ngadan an Maher-Shalal-Hash-Baz.*Hay ibalinana ya himbumaggan maploh di gina'un di tatagu. Ya bahaom nan duwan footnotes di Isa. 5:9 ta innilaom di pohdon maher ya hash an ibaga ya anaad ta hiyay impingadana. 2 Ya inawitmu nan padin hi Uriah ya hi Zechariah an hina' Jeberekiah ta ihamadan ihtiguan heten itudo'mu.”
At hiyay inat'u.†Mid mapto' ya hiyah ne nungkasalan Isaiah.
3 Ya palpaliwan ya nawadaan hi ahawa'. At hidin nitungawan den lala'in imbaluymi ya inalin Apo Dios ay ha"in di, “Ngadananyu ta hi Maher-Shalal-Hash-Baz.‡Hay ipa"el nan ngadana ya nan apa"ian nan buhul Ahaz ti punnaudondan hamhamon nan babluyda. Mu mi'lagat nan babluy ad Judah ti mi'ligatda goh (verse 6-7). 4 An hay ipa'innilana ya adi ni' humapit nan ung'ungnga ya umalida nan i'Assyria ta pun'aladan amin nan inadangyandad Damascus§Hiyay kapitulyud Syria. ya ad Samaria*Hiyay kapitulyud Israel. ta iyuydah babluyda.”
5 Ya palpaliwan ya himmapit goh hi Apo Dios ay ha"in an inalinay,
6 “Daten tatagud Judah ya adida pohdon di maphod an pangipapto"u
an umat hinan danum hinan Ginnaw an Shiloah†Hiyah ne ginnaw ad Jerusalem. an mun'ul'ullay an umayuh.
Mu undaat goh mun'am'amlong hinan bumadangan nan a'ali an da Rezin ya nan imbaluy Remaliah.
7 Mu Ha"in an Dios ya honogo' nan ongol di abalinanan alid Assyria ya nan titindaluna
ta umalida ta gubaton da'yun tatagud Judah.
At paddungnay mundatong nan Wangwang an Euphrates,
8 ya e'wanah nad Judah,
ya he'nobonan amin nan a'abungyuh engganah bagangyu,
ya nun'iyanudnan amin.‡Nan gimmubatan da Sennacherib an alid Assyria ad Judah hidin 701 B.C. ya anggay nan kapitulyud Jerusalem di agguy na'abak.
Ya mipaddungda goh hinan hamutin pinayadnay paya'na ta mun'ohop,
ya numpatoy da'yu.
Mu Ha"in ya anggay an hi Immanuel§Hay pohdonan ibaga ya wadah Apo Dios ay ditu'u (bahaom nan verse 10). di mabalin hi mangibaliw ay da'yuh tun babluyyu.”
9 At ha"in an hi Isaiah ya alyo' ay da'yun Hentil hinan abablubabluy*Unu nan duwan babluy ad Assyria ya ad Babylon.
hi ta"on hi un ayu munlalammung an amin an gumubat
mu da'yu damdamay ma'abak ya mun'atoy,
at mun'iwa'at ayu.
10 Ya ta"on hi un ayu ma'amung ta hahapitonyuy atonyun mangabak
mu mi'id di hulbina nongkay ti hi Apo Dios an hi Immanuel ya wadan ditu'u.
Hay Namadanan Apo Dios ay Isaiah
11 Palpaliwan ya inhamad Apo Dios di nanapitnan ha"in an inalinay,
“Adim iyunnud hinan aat nan i'ibbam an iJudah,
12 ya adim ta'tan nan ita'otda†I Pet. 3:14.
13 ti Ha"in an nidugah di abalinanan Dios di ita'otmu
14 ti Ha"in di mangipapto' ay he"a.
Mu nan i'ibbam an i'Israel ya iJudah
ya paddungnay Ha"in nan batun ihali'dudanda ta magahda.
Ya paddungna goh di Ha"in nan lengon an a'naanda.‡Rom. 9:33; I Pet. 2:8.
Ya nan tataguh ad Jerusalem ya Hiyay umat hi bitu ya hulun mumpangna ay dida.
15 At do'ol ay diday mun'agah ta mapogpogda,
ya do'ol goh ay diday matiliw.”
Hiyah ne inalin Apo Dios ay ha"in.
16 At da'yun na'na'unnud an intudtuduwa'
ya halimunanyun ipapto' an amin nan impitudo' Apo Dios ay ha"in
ta gun mipa'innilah nan mahayhaynod an holag hi enggana.
17 Ad ugwan ya paddungnay din'ug ditu'un holag Israel ay Apo Dios,
mu Hiya damdama ya anggay di pange'koda' hi bumadang ay ditu'u.§Heb. 2:13a.
18 Undan adiyu tigon an ha"in ya tun imbabaluy'u an indat Apo Dios*Heb. 2:13b. di panginnilaan tu'un holag Israel hinan ma'at an malpuh nan nidugah di abalinanan Dios an wadah tun Duntug an Zion! 19 Mu anaad ta nan mun'utung ya nan mumbuyun an umabu'abu'ab ya umanut'utiyam di ayyu pummahmahan? Hi Apo Dios di pangibaganyu ta bo'on nan lennawan di nun'atoy di namnamaonyun mangipa'innilan da'yun mataguh nan ma'at hi udum di algaw! 20 At alyonyuat hinan tatagu ta nan tudtudun Apo Dios di donglonda ta bo'on hay ibagan nan mun'utung unu nan udum. Ti mi'id di ibadangdan ditu'u an dumalat hi agguy napatalan di punnomnomda.
21 At mamolta ayu ta lumane'le'od ayuh tun luta an mi'id di amlongyu, ya munhinaang ayu. Ya dumalat nan hinaangyu at bumungot ayu ta itangadyun mangidut hinan ali ya Dios tu'u. 22 At mi'id di nomnomnomonyuh pumpabadanganyu, ya mi'id di bumadang ay da'yu, at mamamay numanomnomanyu an paddungnay nibalud ayuh nan nidugah an munhehellong.
*8:1 Hay ibalinana ya himbumaggan maploh di gina'un di tatagu. Ya bahaom nan duwan footnotes di Isa. 5:9 ta innilaom di pohdon maher ya hash an ibaga ya anaad ta hiyay impingadana.
†8:2 Mid mapto' ya hiyah ne nungkasalan Isaiah.
‡8:3 Hay ipa"el nan ngadana ya nan apa"ian nan buhul Ahaz ti punnaudondan hamhamon nan babluyda. Mu mi'lagat nan babluy ad Judah ti mi'ligatda goh (verse 6-7).
§8:4 Hiyay kapitulyud Syria.
*8:4 Hiyay kapitulyud Israel.
†8:6 Hiyah ne ginnaw ad Jerusalem.
‡8:8 Nan gimmubatan da Sennacherib an alid Assyria ad Judah hidin 701 B.C. ya anggay nan kapitulyud Jerusalem di agguy na'abak.
§8:8 Hay pohdonan ibaga ya wadah Apo Dios ay ditu'u (bahaom nan verse 10).
*8:9 Unu nan duwan babluy ad Assyria ya ad Babylon.
†8:12 I Pet. 3:14.
‡8:14 Rom. 9:33; I Pet. 2:8.
§8:17 Heb. 2:13a.
*8:18 Heb. 2:13b.