30
Nan Padan hinan Adi Mi'yunnudan an Babluy
1 Hi Apo Dios ya inalinah nan tatagunay,
“Mahmo' ayun imbabaluy'un nangohoy ay Ha"in!
Ti pohpohdonyun umuy mumpabadang hinan i'Egypt an abohla'
ta omod unyu ud'udman di baholyu.
2 Ti agguy ayu nunhanhan ay Ha"in
an un ayuat goh immuy ad Egypt an numpabadang ta baliwan da'yuh nan alidah di.
3 Mu henen nangidenolanyun diday dumalat hi abainanyu,
ya ipa'ampaanyuh umangunuh.
4 Manu ti wadaday u'upihyal hi immuy ad Zoan
ya hi ad Hanes hidid Egypt,
5 mu mi'id ahan di imbadangdan da'yu
ti un at goh hay nabainanyu.”
6 Ya inalin goh Apo Dios di,
“Nan hennagyun mumbagah badang ya nun'ipitakaydah nan dongki ya kamilu
din nun'abalul an gina'un inyuydad Egypt
an ene'wadah nan mapulun ad Negev an atata'ot ti wah diday layon ya ulog an umat hi ha'u'u,
mu ta iyuydaat ahan hanan adawdah nan tatagun mi'id di ibadangdan dida.
7 Ti nan i'Egypt ya mi'id di hulbin nan inalidan ibadangdan da'yu.
At hiyanan nginadna' heden babluy hi,
Rahab an Mi'id di Abalinana.”
8 Ya inalin goh Apo Dios di,
“Itudo'muh nan libluy aat di anappuhin di ato'aton danen tatagu
ta adi ma'aliwan hi enggana
9 ti nidugah di anangohoydan
adida ahan pohdon an donglon nan itudtudu' an Dios.
10 Hay alyondah nan baal'un Dios an nan propeta ya alyonday,
Adiyu gun ulgudon ay da'mi nan alyonyun impa'innilan Apo Dios
ti hay pohdonmin donglon ya nan mun'aphod an ta"on hi un adi makulug!
11 At ipogpogyun gun mun'ulgud ay da'mih nan hinapit Apo Dios
ti adimi pohdon an donglon di malgom hi aat nan
alyonyun nahamad an Dios tu'un holag Israel!”
12 Mu hay nambal Apo Dios an dayawon tu'un holag Israel ya inalinay,
“Gapu ta pihulonyu nan impa'innila' ay da'yu
ta hay kulugonyu ya nan layah ya nan ipaligligatan
13 at hiyay ma'at ay da'yu.
At mapogpog ayu ta umat ayuh nan ata'nang an allup
an nunhiyan di nete"ah puunah engganah bagtuna.
At ag'aga ya matu"in an mungkakaludukud ya nidipat hinan luta.
14 At umat hinay ma'at ay da'yu ta umat ayuh nan uklit an bangan nagah ya nun'agimu',
at adi mabalin hi un mah ni' panaluduh bala unu pana'lung hi danum.”
15 Ya inalin goh nan na'abbagbagtun Dios an dayawon tu'un holag Israel di,
“Gulat ta muntutuyu ayuh baholyu ta Ha"in di pangedenolanyuh unudonyu ya mabaliwan ayu.
Ti hay alpuwan di bi'ah ya nan dumidinnganyu ti Ha"in di nangiyokodanyu.
Mu adiyu pohdon
16 an alyonyuy,
Adimi, ti badangan da'mih nan i'Egypt
an idatday ma'uwegeng an kabayu ta itakayanmin mi'gubat!
Mu adi umat hinay ma'at ti hay ma'uwegeng ya nan buhulyun mamdug ay da'yu!
17 At un ohan tindalun buhulyu ya ipalayawnay hinlibun da'yu.*Hiyah te nipa'annungan din inalin Moses hi ma'at hinan adi mangun'unud ay Apo Dios (Deut. 32:30).
Ti ta"on hi un anggay di lemah buhulyu ya ipalayaw da'yun amin
ta un anggay di nipado' hinan duntug an nitayunan di bantilayuy ma'angang.”
18 Mu inali' an hi Isaiah di,
“Ta"on hi un umat hinay ma'at
ya hohoddon damdaman Apo Dios di puntutuyuanyun i'ibbah baholyu
ta pangipattiganah homo'na ya nan pamhodnan da'yu.
Ti hi Apo Dios ya makulug di atonan mangipanuh hi tatagu,
at an amin di mumpabadang ay Hiya ya mipa'amlongda.
19 At da'yun i'ibba' an tataguh tun ad Jerusalem ya adi tu'u mahkay kumilah udum hi algaw.†Ma'at hinan Hinlibuy Tawon (verses 19-26). Ti hom'on ditu'un Apo Dios hi un tu'u mumpahmo' ay Hiya! Ya abulutonay alyon tu'u, at umannung an badangan ditu'u. 20 Manu ti paddungnay ipa'inuman ditu'u, ya pinangan ditu'un Apo Dios hinan nidugah an punligatan, mu Hiya an muntudun ditu'u ya wagwadan ditu'u. 21 At donglon tu'uy hapitnan alyonay, Hiyah te owon, at hituy pange'wanyu. 22 At pumpa"iyu mahkay an amin nan bulul an dayawonyun hay silver ya balitu' di niyamma, ya nun'itapalyu an umatdah nan aluluhnin.
23 Ya wa ay ta mun'oho' ayu ya ipa'alin Apo Dios di udan ta pumhod nan ihabalyu. At dumo'ol mahkay di ma'an, ya dumo'ol di onon nan animal tu'un umat hi baka. 24 At namamah nan pun'aladuonyun baka ya dongki ti hay ipa'anyun dida ya nan namahmah an wheat ya barle. 25 Ya dumo'ol di danum an malpuh nan atata'nang an duntug ya hinan dudunduntug hitun pangabakan tu'uh nan buhul tu'u, at do'olday mun'a'atoy. 26 Ya nan bulan ya ma"abnang an umat hinan algaw. Ya nan patal di algaw ya nidugah an ma'appattal an umat hi patal nan malammung an pitun algaw. At umat hinay ma'at hitun pangipa'adaogan Apo Dios hi paddungnay hugat tu'un tataguna.”
Nan Pummoltaan Apo Dios hinan i'Assyria
27 Mu awniat amangonyuh Apo Dios
an paddungnay na'uy an malpuh adagwin
umat hinan mundalang an apuy di bungotna an nele'woh ay Hiyay ma'ugtul an ahu'.
Ya nan hapitona ya umat hinan apuy an gumhob.
28 Ya mipaddung goh nan bungotnah
nan nundatong an wangwang an pun'iyanudnan amin nan buhulna ta mapogpogda.
Ya danen mumpahiyan tataguh abablubabluy an mi'buhul ay Hiya ya paddungnay yakayakona dida,
at umatdah nan kabayun impa'amelnay gumo' hi timidda ta iyuyna didah nan apogpoganda.
29 Mu ditu'u ay an tatagun Apo Dios ya mun'amlong tu'un mungkanta
an umat hinan pun'am'amlongan tu'uh un waday behtan pundayawan ay Apo Dios.
Ya umat goh hinan pun'am'amlongan tu'uh nan umayan tu'uh nan nabagtuh ad Jerusalem
an ipangulu ditu'uh nan manungngali
ta umuy tu'u nongkay hi awadan nan ay Batun mamaliw ay ditu'un holag Israel.
30 Ya ipadngol Apo Dios nan umipanoh'an hapitna ya nan atonan umubah
ta le'naon nan buhulnay bungotnan pun'agahnay apuy,
ya nidugah an idul, ya ilat, ya udan, ya dalallu, ya nan mabi'ah an puo'.
31 At nan i'Assyria‡Ituduna goh di aat nan titindalun AntiKristu. ya tumata'otdah pangngolandah nan hapit Apo Dios
ti nidugah di pummoltanan dida.
32 Ya an amin nan pummoltaan Apo Dios ay danen i'Assyria
ya gun ipagangoh nan i'ibba tu'un holag Israel di tambourine ya alpah pun'am'amlonganda.
Ti hi Apo Dios di mangubat hinan buhul tu'un i'Assyria.
33 Ya nidadaan tuwalid Topheth§Hiyah ne lugal hi luwal nan allup ad Jerusalem hi nanghoban nan Hudyuh imbabaluyda ay Molek an bulul di i'Ammon, at waday apuy hidi (II Ki. 23:10; Jer. 7:31-32; 19:6, 11-14; I Ki. 11:7). hidin penghana ta pangipuulandah nan alid Assyria.
Ya henen pangipuulandah nan ali ya ambilog
ya maluhung an naka'utan an munnononnong di apuyna ti do'ol ahan di tunguna.
Ya nan yahyah Apo Dios di mangipadaladalang.
*30:17 Hiyah te nipa'annungan din inalin Moses hi ma'at hinan adi mangun'unud ay Apo Dios (Deut. 32:30).
†30:19 Ma'at hinan Hinlibuy Tawon (verses 19-26).
‡30:31 Ituduna goh di aat nan titindalun AntiKristu.
§30:33 Hiyah ne lugal hi luwal nan allup ad Jerusalem hi nanghoban nan Hudyuh imbabaluyda ay Molek an bulul di i'Ammon, at waday apuy hidi (II Ki. 23:10; Jer. 7:31-32; 19:6, 11-14; I Ki. 11:7).