51
Nan Minaynayun an Abaliwan ad Jerusalem
1 Inalin goh Apo Dios di,
“Donglonyun amin an namhod an mabaliwan an umalin mumpabadang ay Ha"in.
Nomnomonyu din inat Abraham
an hiya din paddungnay ongol an batun na'upinganyu ta hiyay pangiyunnudanyu.
2 Ti adya nomnomnomonyuh Abraham an hi amayu ya hi inayun hi Sarah
ti hidin nangayaga' ay Abraham ya mi'id ah imbaluyna,
mu winagaha' hiya,
at dimmo'ol di holagna.*Gen. 12:1-3; 13:16; 15:5; 17:5; 22:17.
3 At ta"on hi un mapa"id Zion ya an amin nan babluyyun holag Israel
mu makulug an Ha"in an Dios ya hom'o' da'yu.
At mipaphod an amin nan nun'apa"i,
ya ta"on hi un nan mapulun ya paphodo' ta umat hinan Galden an Eden.†Ma'at hinan Hinlibuy Tawon.
At umamlongdan amin nan tatagu,
ya ikankantaday punyamananda.
4 Ya donglona' an da'yun tatagu'
ti nan intugun'u ya mipa'innilah nan Hentil hinan abablubabluy
ta hiyay paddungnay mangipapatal ay dida.
5 At adi madnoy ya mipattig di homo"u ta ibaliw'u da'yu‡Hiyah te hinamad Apo Dios an inalin Hiya ya ibaliwna nan tatagunan holag Israel an paddungnay balud ad Babylon. Hay oha goh hi ibalinana ya ibaliwna nan mangulug hinan Imbaluynan hi Jesu Kristu.
ti Ha"in di mangabak ta Ha"in di mun'ap'apuh abablubabluy.
Ti dumalat nan abalina' ya hehemlon di tatagun numpunhituh nan gagwan di baybay an ibaliw'u dida.
6 Adya tangadonyud daya ti awniat ma'ubah an umat hi ahu',
ya inittigyuh tun luta ti awniat madunut an umat hinan dadan an lubung.
Ya mun'atoy an amin nan tatagu an umatdah lalog,
mu nan pangat'un mamaliw hi tatagu ya minaynayun hi mid pogpogna.
7 At donglona' an da'yun tatagun nanginnilah nan makulug ya mangunud hinan Uldin'u,
at adi ayu tuma'ot hi un da'yu pihupihulon,
ya nun'ipabaholday layah hi pama"idan da'yu.
8 Ti danen umat hinay pangatna ya mun'a'ubahda
an umatdah nan lo'ob an pun'a'an di la'oy.
Mu nan makulug an pangat'un mamaliw hi an amin an tatagu ya minaynayun hi enggana.”
9 Ya inali' an hi Isaiah di,
“Paddungnay bumangon'a ni', Apo Dios,
ta ipattigmu nan nidugah an abalinam ta badangan da'mi!
Ta umat hidin inatmud Egypt
ti pinatoymu nan atata'ot an animal an hi Rahab hinan Wangwang an Nile.§Mid mapto' ya hiyah ne dinosaur an ma'alih leviathan.
10 Ya He"a goh di nanob'a' hinan danum hinan Mumbolah an Baybay*Unu Red Sea.
ta way nange'wan din tatagum an bimmad'ang ta nabaliwanda.†Ex. 14:21-22.
11 At danen binaliwam an tatagum ya umanamutda mahkay,
ya mungkantadah amlongdan dumatong ad Jerusalem.
At din ene'damdan lungdaya, ya numanomnoman, ya tumata'tan
ya mahukatan mahkay hi nidugah an amlong ya denol.”
12 Ya inalin goh Apo Dios di,
“Ha"in di nangipa'amlong ay da'yu.
At hiyanan adiyu ta'tanyu nan i'ibbayun tatagu
ti unda goh tagu an umatdah nan holo' an ag'aga ya mami'idda.
13 Mu inaliwana' an nunlumu ay da'yu,
ya nangibe'lag ad daya,
ya nangipognad hi nipabunan tun luta.
At hiyanan makulug an tumata'ot ayuh abigabigat
an dumalat nan nidugah an bungot nan buhulyu an gun mangipaligligat ay ditu'u.
Mu hanan buhul ya awniat mapogpogda.
14 Ya awniat nan nun'ibalud ya mun'ibo'tanda,
ya umadu"oy di pi'taguanda,
ya mawadan amin di ononda.
15 Ti Ha"in hi Apo Dios an dayawonyun holag Israel
an gun mangehal hinan baybay
ta munggongaah nan malupilupig an dalluyun.
Ya hay ngadan'u ya hi Apo Dios an nidugah di abalinana.
16 Ya Ha"in an nangibe'lag nongkay hi ad daya ya nangihamad hi nipabunan tun luta,
ya impa'innila' ay da'yuy hapitonyuh nan tatagu,
ya hinalimuna' da'yu.
Ya inali' ay da'yun iJerusalem di,
Tagu' da'yu.”
Hay Apogpogan di Punholholtapandad Jerusalem
17 Ha"in an hi Isaiah ya inali' di,
“Da'yun iJerusalem ya paddungnay bumangon ayu,
ya timma'dog ayun paddungnay nun'abutong
an impa'inuma' hinan nittuh nan bahun bungot Apo Dios.
At munhinaggaw ayu mahkay an paddungnay na'abbutong ayu.
18 Mu mi'id di mamdong ay da'yuh bumadang
ti napogpogda nan imbabaluyyun linala'i.‡Nan holag di manalimun hinan o'ommoddah unda mala'ay.
19 At duway punligatanyu an nan gubat ya batel,
ya mi'id mahkay di mammo' ay da'yu.
20 Ti nan imbabaluyyu ya nun'ali'uhdah nan kalata
an umatdah nan na'nah an ulhah nan bitu.
At nidugah an le'naonday bungot Apo Dios.
21 At hiyanan da'yun mun'abutong an bo'on hay bayah dumalat
an un hay punholholtapanyu ya donglonyuh te.
22 Ti nan na'abbagbagtun Dios ya inalinay,
Ha"in an dayawonyun Dios an mamaliw ay da'yu ya nomnomonyu
an awniat ano' nan paddungnay namutong ay da'yu
ta omod un ayu nipaligligat an dumalat nan nidugah an bungot'u
ta adi mahkay ma'at ay da'yu hana.
23 Mu ato' hinan gun mangipaligligat ay da'yu.§Nan mangipaligligat ay dida ya nan iBabylon.
Ti awniat diday mummandal ay da'yu ta munhippi ayu,
ya nun'igatinday bonogyuh nan luta,
at umat ayuh nan dalan an migatigatin.”
*51:2 Gen. 12:1-3; 13:16; 15:5; 17:5; 22:17.
†51:3 Ma'at hinan Hinlibuy Tawon.
‡51:5 Hiyah te hinamad Apo Dios an inalin Hiya ya ibaliwna nan tatagunan holag Israel an paddungnay balud ad Babylon. Hay oha goh hi ibalinana ya ibaliwna nan mangulug hinan Imbaluynan hi Jesu Kristu.
§51:9 Mid mapto' ya hiyah ne dinosaur an ma'alih leviathan.
*51:10 Unu Red Sea.
†51:10 Ex. 14:21-22.
‡51:18 Nan holag di manalimun hinan o'ommoddah unda mala'ay.
§51:23 Nan mangipaligligat ay dida ya nan iBabylon.