15
Nan Nidugah an Pummoltan Apo Dios hinan iJudah
1 La'tot goh ya inalin Apo Dios ay ha"in di, “Ta"on hi un da Moses ay Samuel*Daten duwan propetay nundengwa ahan an numpahpahmo' ay Apo Dios hinan historyn di Hudyu ta aliwan Apo Dios di bahol nan tatagu (Moses: Ex. 32:11-14, 30-34; Num. 14:13-23; Deut. 9:18-20, 25-29; Samuel: I Sam. 7:5-9; 12:19-25). di mumpahpahmo' ay Ha"in mu adi' damdama ahan hom'on daten tatagu! At pakakom daden holag Judah ta makakda! 2 Ya wa ay ta alyondan he"ay, Hay umayanmi mah? ya alyom ay diday, Umat hituy inalin Apo Dios:
Matoyday udum ay da'yun dumalat di dogoh,
ya nan udum ya matoydah gubat,
ya nan udum ya dumalat nan batel,
ya nan udum ya ilayaw di buhul hi udum an babluy.
3 Ya Ha"in an Dios ya ipa'ali' di opat hi numbino'ob'on an atata'ot hi mamatoy hinan tatagu: ti iyabulut'un waday gubat ta mun'a'atoyda, ya umaliday ahu ta pun'ilayawday odolda, ya hamuti ta punhobatda dida, ya nan a'animal hi inalahan ta pun'a'anda nan way ma'angang. 4 Ti nidugah ahan an nun'appuhiy ina'inat Manasseh an hina' Hezekiah hi ad Jerusalem hidin nun'alianad Judah.†Nan Alin hi Manasseh di na"appuhin alin numpapto' ad Judah (II Ki. 21:1-18; 23:26-27; 24:3-4; II Chron. 33:1-20). At nan tataguh nan abablubabluy ya nunheglay pamihuldan da'yu an dumalat hinan nidugah an pummolta' ay da'yu.
5 Ya hitun a'atan hana ya undan way mammo' ay da'yun tatagud Jerusalem?
Ya undan goh way munlungdaya ay da'yu?
Ya undan goh way mananhan hi aat di na'at ay da'yu?
6 Ti din'uga' ay da'yu ta innaynayunyun agguy nangunud ay Ha"in an Dios,
at hiyanan ad ugwan ya ubaho' da'yu
an mi'id mahkay di homo"un da'yu.
7 At pun'iwa'at'u da'yuh nan abablubabluy an umat ayuh dugi an mun'iyaddib,
ya pumpatoy'u nan imbabaluyyu ta ma'ahinut ayu
ti adiyu ipogpog nan nun'appuhin ato'atonyu.
8 Ya hay ma'at ya do'do"ol di mun'abaluh nan babluyyu
ya un nan ado'ol di panag hinan pingit di baybay.
At palpaliwanyu ya himbumagga ya himmawang di mi'gubat hinan tongan di algaw‡Bahaom nan footnote di Jer. 6:4. ta pumpatoyda nan ungungan linala'i,
at nidugah di punlungdayaan nan o'ommoddan binabai.
9 At nan babain ommod an amin nan pitun imbabaluynan natoy
ya ma'ulaw an ay matoy an dumalat di punha'itan di nomnomna,
at hay punle'nana ya ay munhehellong.
Ya ta"on un nan tatagun na'angang ya ipapatoy'uh nan buhulda.
Ha"in an hi Apo Dios di nanapit ene.”
Hay Nunlilian Jeremiah ay Apo Dios
10 Ya inali' di,
“Mi'id atog di amlong'u ti bumobohholday tatagun ha"in hitun babluy tu'u,
at odolnah unna' agguy nitungaw.
Mu mi'id ahan di ay'u inutang unu immutang ay ha"in,
mu tagwan an unna' pun'idutan hinan tatagu.”
11 Ya tembal Apo Dios an inalinay,
“Ha"in di mangipapto' ay he"a ti maphod di ipatamu' ay he"a.
Ya olom ni' ya waday denolmu ti hitun punligatanda
ya pumbalino' nan buhulmu ta mumpahpahmo'dan he"a.”
12 Ya inalin goh Apo Dios di,
“Undan way taguh abalinanan mangipung hi gumo'
unu nan gambang an nalpuh appit hi iggid hi un hagangon di buhu'an di algaw?
13 Ya dumalat nan do'ol an numbaholanyun himpamabluy ay Ha"in
ya idat'un amin nan inadangyanyuh nan buhulyu.
14 Ya iyabulut'un baludon da'yun dida
ta mumbalin ayuh baaldah nan babluy an agguyyu in'innila
ti nidugah mahkay ahan di bungot'un da'yu an ay apuy an dumalang.”
15 Ya inali' goh di,
“Apu, i'innilam di ma'ma'at,
at badangana' ni' ahan ta iballoh'un dida nan pangipaligligatandan ha"in.
Adim e'edpol ti la'tot ya pinatoya' ay dida
ti ha"in ya munligligata' an dumalat nan punhulbia' ay He"a.
16 Hidin ni'hapitam ay ha"in ya inun'unud'u an nidugah di amlong'u
an dumalat nan nidduma' ay He"an nidugah di abalinanan Dios.
17 Ya agguya' ahan nidniddum hinan way pun'am'amlongan nan tatagu
an unna' nun'o'ohhan§Hi Jeremiah ya agguy nalhin (Jer. 16:2). dumalat di pangun'unuda' ay He"a
ti nidugah an umipabohol ay ha"in nan gunda aton an pumbaholan.
18 Mu anaad ta adi dumindinong nan punholholtapa'
an paddungnay adi mapoypoyanan nan hugat'u?
Undan adia' badangan ay He"a
an umat'ah nan ginnaw an wa ay ta timmiyalgaw ya natdu' ya nan obob an matdu'?”
19 Ya tembal Apo Dios an inalinay,
“Gulat ta itutuyum henen ninomnommu ya hinapitmu
at mabalin an mumbangngad'ah puntamuo'.
Ya gulat ta nahamad di hapitom ta bo'on nan mid hulbinan hapit
at mabalin an he"ay punhapito'.
Ti maphod hi un nan hapitom ya pangatmun nahamad di pun'innomnoman nan tatagu
ta mumbangngaddan he"a ta bo'on nan pohdonday hapitom.
20 At ta"on hi un da'a gubaton ya adida pa"abak ay he"a ti ipapto"u he"a,
ya pabi'aho' he"a ta mipaddung'ah nan gambang an allup.
Ha"in an hi Apo Dios di nanapit ene.
21 Immannung an ibaliw'u he"ah nan tatagun nun'appuhiy pangatdan mun'abungot!”
*15:1 Daten duwan propetay nundengwa ahan an numpahpahmo' ay Apo Dios hinan historyn di Hudyu ta aliwan Apo Dios di bahol nan tatagu (Moses: Ex. 32:11-14, 30-34; Num. 14:13-23; Deut. 9:18-20, 25-29; Samuel: I Sam. 7:5-9; 12:19-25).
†15:4 Nan Alin hi Manasseh di na"appuhin alin numpapto' ad Judah (II Ki. 21:1-18; 23:26-27; 24:3-4; II Chron. 33:1-20).
‡15:8 Bahaom nan footnote di Jer. 6:4.
§15:17 Hi Jeremiah ya agguy nalhin (Jer. 16:2).