18
Hay Nipaddungan nan i'Israel hinan Uklit
1 Inalin goh Apo Dios ay ha"in an hi Jeremiah di, 2 “Umuy'ah abung nan munduwin ti waday ipa'innila' ay he"ah di.” 3 At immuya' hi abung nan munduwin, ya wah di an gun munduwin. 4 Mu wa ay ta duwinona nan uklit ta bo'on nan penhodnan bangay pumbalinana ya linumana ta ipidwana.
5 At inalin goh Apo Dios ay ha"in di, 6 “Ha"in an Dios ya waday abalina' an mangat ay da'yuh pohdo' an umat hinan aton nan munduwin hi banga. Ti nan uklit an miyammah banga ya okod nan munduwin hi pohdonah pangiyammaan, at umat goh hina ay Ha"in hinan ato' ay da'yun holag Israel. 7 Ti Ha"in ya inali' ay hi ubaho' nan ohan babluy unu pumpapto'an ya ato'. 8 Mu wa ay ta muntutuyuda nan tataguh di ta du'gonda nan nun'appuhin gunda aton ya adi' ituluy nan ninomnom'uh a'ubahanda.*Hay ohah na'atan te ya nan babluy ad Nineveh an kapitulyud Assyria (Jon. 3:1-10). 9 Ya umat goh an ta"on hi un'u inali an wagaha' di ohan babluy unu pumpapto'an ta umongol di abalinan nan tataguh di 10 mu gulat ta danen tatagun nen babluy ta inaynayunda nan gunda ato'aton an nun'appuhi ya adia' unudon at adi' aton nan ninomnom'un maphod ay dida.†Hay ohah na'atan te ya nan duwan pumpapto'an an ad Israel ya ad Judah.‡Ta"on un adi maluman nan aat Apo Dios (Num. 23:19; Mal. 3:6; Jac. 1:17) mu maluman di pangatna.
11 At hiyanan honogo' he"a, Jeremiah, ta umuymu alyon hinan iJudah di, Umat hituy hinapit Apo Dios an inalinay, Ninomnom'un waday nappuhih ma'at ay da'yuh un ayu adi muntutuyuh nan nun'appuhin pangatyu ta hay nahamad di unudonyu. 12 Mu inila' an hay pambal damdama nan tatagu ya alyonday, Mi'id di hulbin nan inalim ti ninomnommi damdama an nan pohdonmiy hiyay atonmi an ta"on un bahol.
13 At hiyanan inali' an hi Apo Dios di,
Henen baholyun i'Israel ya nidugah ahan.
Ti undan way gunyu donglon ni' mah hi umat hinah ma'ma'at hi udum an babluy?
14 Hinan duntug hi ad Lebanon ya mi'id di nami'idan nan immugtul hidin ay dalallu,
ya umat goh hinan ayhugin danum hinan ginginnaw hinan Duntug an Hermon an mi'id di ayna natdu'an.
15 Mu danen tatagu' ya adida umat hina ti din'uga' ay dida
ta nan bulul di nange'nongandah nan incense an genhobda.
At paddungnay tinaynanda nan nahamad ya maphod hi dalanon
ta nan pitluy an pumbahbaholan di inunudda.
16 At hiyanan minganuy heten babluyda ta an aminday maluh ya manoh'adah nan na'at
an himbumagga ya ninganuy,
at wumigiwigda.
17 At hitun umalian nan buhul an mangubat ay dida ya pun'ipiwa'at'u da'yun dida
ta umat ayuh nan hupu' an pun'iyaddib nan dibdib.
Ya hay a'atan ne ya adi' da'yu haggungon.”
18 Ya waday udum an tatagun alyonday, “Munnomnom tu'uh aton tu'un mangipadinong ay Jeremiah! Odolnaat wah nada nan padi, ya propeta, ya nan nun'anomnoman an muntudtudun ditu'u! At nomnomon tu'uy ipabahol tu'un hiya ta adi tu'u donglon nan gunna hapitona!”
19 At nunluwalua' an inali' di,
“Badangana' ni' ahan, Apo Dios,
ta ipadinongmu nan tatagun ipabaholdan ha"in di nun'appuhi!
20 Ti undan mabalin ta nan maphod ya hay nappuhiy ballohna?
Mu ta"on un umat hina ya nunluhu'da damdamah bituh pangnadan ha"in!
Mu He"a ya i'innilam an ha"in di gun numpahpahmo' ta adim ni' ubahon didan dumalat nan baholda!
21 At ad ugwan ya odowo' an mabtelda nan imbabaluyda,
unu matoydah nan gubat nan ungungan linala'i
ta mun'anguhu ya nun'abalu nan binabain a'ahawada.
Ya nan o'ommodda ya mun'a'atoydan dumalat nan pumatoy an dogoh.
22 Ya inalim ahan di ipa'alim di mangubat ay dida,
at waday madngol an ahikikilah nan a'abungda.
Ti nunluhu'dah bituh pangnadan ha"in,
ya nun'iyammada goh di ahulua'.
23 Mu He"a, Apo Dios, ya i'innilam nan ninomnomdan penhoddan patayona',
at adim ni' aliwan nan nun'appuhin gunda aton
ta unmuat ni' moltaon dida
ta ipa'dammun diday bungotmu an dumalat nan baholda.”