7
Hi Micah di Mehnod an Humapit hi Kulti
1 Ya ha"in an hi Micah ya ipidwa' goh an humapit hi kulti an alyo' di,
“Do'ol di umipalungdaya ahan ay ha"in!
Ti umata' hinan huminahinaang an tagun umuy mannig hi na'angang an bungan di a'ayiw ya greyp,
mu mi'id di inah'upa' ti na'amin an nun'apugah nan pa'appohdo' an bungan di greyp ya figs!
2 Ti mi'id ah ohan da'yun tataguh ma'ah'upa' hi makulug di pangatnah nan babluy,
ya mi'id ah nahamad hi mangunud ay Apo Dios!
Ti an amin ayun tatagu ya mumpumbota' ayun munhood hi patayonyu,
ya ta"on un didan himpamabluy ya mumpipinnatoyda!
3 Ya nala'eng ayun mangat hi agaga"ihaw ti mundehhan nan ngamayyun mangat hi nappuhi!
Ya da'yun u'upihyal ya huhuwis ya mumpabayad ayuh nan pangatanyuh agaga"ihaw,
ya da'yun adadangyan ya mandalonyuy tatagun mangat hi pohpohdonyun ma'at,
ya an amin ayu ya mumbabaddangan ayun mumplanun mangat hi agaga"ihaw!
4 Mu ta"on un waday mibilang ay da'yuh maphod ya umatda damdamah nan hubit.
At umannung an magadyuh an madatngan nan algaw hi pummoltaan Apo Dios ay da'yu,
at ad ugwan ya mid poto' di punnomnomanyu!
5 Ya adiyu goh kulugon nan heneggonyu,
ya adi ayu mundenol hinan nahamad an ligwayu!
Ya ta"on goh hinan ahawayu ya mid mapto' ya mibahhaw di hapitonan da'yu!
6 Ya nan lala'in imbaluy ya mi'id pange'gonan amana,
ya umat goh hinan babain imbaluy an boholonah inana!
Ya nan babain na'apu ya boholona nan babain ommod ahawana,
at hay buhulyu ya hanan tutulangyu!
7 Mu ha"in ya hi Apo Dios di pange'koda',
ya Hiyay hahalimido' hi mamaliw ay ha"in!
Ya kulugo' an hi Apo Dios an dayawo' ya donglonay luwalu'.”
Nan Tatagun Apo Dios di Mehnod an Humapit hi Kulti
8 Ya nan tatagun Apo Dios ya ipidwadan humapit hi kulti an alyonday,*Hinan verses 8-10 ya paddungnay muntutuyun Apo Dios nan tataguna ti abulutonday pumbaholanda ya nan amoltaandah awni an dumalat nan anappuhida.
“Da'yun buhul†Nan buhul di Hudyud Israel ya nan i'Assyria an immuy hidin 722 B.C., ya nan buhul di Hudyud Judah ya nan iBablyon an immuy hidin 586 B.C. ya adi da'mi abatlan
ti ta"on hi paddungnay nun'atu"in ami mu kulugonmin bumangon ami damdama,
ya ta"on hi paddungnay nahelngan ami mu kulugonmin hi Apo Dios di mangipapatal ay da'mi.
9 Immannung an numbahol amin Apo Dios,
at ta"on un nidugah di bimmungtanan da'mi ya abulutonmi ti awahmi.
Mu hitun umangunuh at baliwan da'mi ta nahamad di ma'at ay da'mi,
ya immannung an nan ipaligligatanmi ya mumbalin hi lenggop,
at tigonmi nan anahamad di pamaliwanan da'mi.
10 At da'yun buhulmi ya innilaonyuh awni nan abaliwanmi,
at nidugah di bumainanyuh nan ina'inatyu,
ya hinapihapityu ti inaliyuy,
Undan tuwali baliwan da'yuh nan Diosyu?
Mu tigonmih awni an da'yuy ma'abak ti mun'amolta ayu
an umat ayuh nan tatagun mun'igatin hinan kalata!”
Hi Micah di Mehnod an Humapit hi Kulti
11 Ya ha"in an hi Micah ya ipitlu' an humapit ti waday ipa'innila' an alyo' di,
“Da'yun i'ibba an holag Israel ya magadyuh nan gutud di ipaphodan nan babluy tu'u,
ya mipahlig nan igad ta umambilog nan lutan hakupon tu'u.
12 Ya henen gutud ya umalida nan malpud Assyria,
ya hinan numbino'ob'on an siudad ad Egypt,
ya hinan abablubabluy an neheggon hinan Wangwang an Euphrates,
ya hinan udumnan adadagwin babluy an malauhan di baybay,
ya hinan abulubuludna.
13 Mu hay mahhun an ma'at ya un mabalin an ma'at hana
ya mun'atawan nan abablubabluy an nunhituwan tu'u
an dumalat nan baholyun i'ibba' an numpunhituh tu.”
14 Ya mi'hapita' ay Apo Dios hi kulti an alyo' di,
“Apu, halimunan ni' anhan da'min pento'mun tatagum ta mihakup amin He"a,
at iyabulutmu ni' ta umuy ami munhituh nan lutan ma"almuy mihabal hi ad Bashan ya ad Gilead
an umat hidin inatdah din nadnoy!”
Hi Apo Dios di Mehnod an Humapit hi Kulti
15 Ya tobolona' ay Apo Dios an alyonay,
“Umat hidin nangekaka' hidin o'ommodyud Egypt di ato' an mamadang ay da'yuh
nan pangata' ay da'yuh nan do'ol an umipanoh'a.”
Hi Micah di Miyangunuh an Humapit hi Kulti
16 Ya ha"in tuwali an hi Micah di miyangunuh an humapit an alyo' di,
“Nan Hentil ya wa ay ta tigonda hanan ma'at at mabainanda,
ya madismayada,
at ma'etotda an adida humapit,
ya adi dumngol di ingada.
17 Ya mumpullu'bubdah nan hupu' an umatdah nan ulog,
ya umatda goh hinan ahi'ad'addapan hinan luta,
ya ahida wowogwog hinan numpunhituwandah ta'otda.
Ya manu ay atonda ti nidugah di tuma'tandan Apo Dios an Dios tu'u,
ya tuma'otda goh ay da'yu.”
18 At inali' ay Apo Dios di,
“Ngadan nen tagun umat ay He"a‡Hete ya hanul Micah ti imbaagnay ngadana tuwali an Micah ti hay pohdonan ibaga ya ngadan nen tagun umat ay Apo Dios? (bahaom nan footnote di Mic. 1:1 ta innilaom di aatna). Ya ta"on un adi umipakiki nan hanulnan ditu'u mu hanul di Hudyu damdama. an mangaliw hi bahol nan na'angang an tatagum?
Mi'id! He"a ya nidugah di pamhodmun da'mi!
19 Ya gunmu ipattig di pamhodmun da'mi
ti paddungnay pun'igatinmu nan baholmi,
ya intapalmuh nan baybay ta munlonong!
20 Ya inilami goh an ipattigmuy nahamad an pamhodmu
ya homo'mun da'min tatagum
ta mipa'annung din hinapitmuh din hi apumin da Abraham ay Jacob.ӤHay intulag Apo Dios ay dida ya ta dumo'do'ol di holagda an umatdah nan uyap di hupu' ya panag an wah tun luta (Gen. 17:5; 28:14).
*7:8 Hinan verses 8-10 ya paddungnay muntutuyun Apo Dios nan tataguna ti abulutonday pumbaholanda ya nan amoltaandah awni an dumalat nan anappuhida.
†7:8 Nan buhul di Hudyud Israel ya nan i'Assyria an immuy hidin 722 B.C., ya nan buhul di Hudyud Judah ya nan iBablyon an immuy hidin 586 B.C.
‡7:18 Hete ya hanul Micah ti imbaagnay ngadana tuwali an Micah ti hay pohdonan ibaga ya ngadan nen tagun umat ay Apo Dios? (bahaom nan footnote di Mic. 1:1 ta innilaom di aatna). Ya ta"on un adi umipakiki nan hanulnan ditu'u mu hanul di Hudyu damdama.
§7:20 Hay intulag Apo Dios ay dida ya ta dumo'do'ol di holagda an umatdah nan uyap di hupu' ya panag an wah tun luta (Gen. 17:5; 28:14).