2
Hay Awagahan nan Nanomnoman
1 Intuluy Solomon an nangulgud hi nipa"el hinan imbaluynan inalinay,
“Imbaluy'u, abulutom nan itudu',
ya adim ahan aliwan nan itugun'un he"a!
2 Ya adalom di aton an luma'eng
ta ipadahmuy abalinam an manginnilah aat Anomnoman.
3 Amnawam ahan Hiya ta luma'eng'a
ta way abalinam an manginnilah nan na'ahhamad.
4 Ipadahmuy abalinam an manganap hi luma'engam
an umat hinan atom an manganap hi balitu' hinan luta,
unu nan mapla'an an gina'un nipo"oy hi luta.
5 Ya gulat ta atom hanan amin at innilaom mahkay di aat Apo Dios
ya hay aton an mange'gon ay Hiya.
6 Ya manu ay umat hina ti hi Apo Dios ya anggay di alpuwan Anomnoman,
ya Hiya goh di alpuwan nan i'ibana an da Panginnila ay Pun'awat.
7 Ya Hiya ya anggay di bumadang hinan tagun nahamad di pangatna,
ya Hiya goh di bumaliw hinan nahamad an tagu.
8 Ya Hiya goh di mangipapto' hinan maphod di pangatna,
ya Hiyay manalimun hinan un'unnud ay Hiya.
9 Ya gulat ta unudom tun tugun'u at immannung an innilaom di nahamad an pangat,
ya nan makulug an aton hinan i'ibba,
ya ta mapapaddung di atom ay dida.
10 At he"a ya maphod hi un'a middum ay Anomnoman ta luma'eng'a,
ya maphod goh hi un'a mitnud ay Panginnila ta hiyay mangipa'amlong ay he"a,
11 ya ta"on un hi Abalinan an Manginnilah nan Na'ahhamad ya nan aginan hi Pun'awat
ya diday mun'adug an bumaliw ay he"a.
12 Hi Anomnoman ya itudunay maphod hi atom ta adim aton di nun'appuhin pumbaholan,
ya ibataan da'ah nan wadan di tatagun nappuhiy atondan humapit an umipagulu
13 an nan tatagun nan'ug hinan nahamad an pi'taguan
ta nan helong an wadan di pumbaholan di pohdonda.
14 Didan tatagu ya hay nappuhin ato'atonday iyamlongda,
ya ta"on nan numbino'ob'on an pangatdan lumihog ya iyamlongda.
15 Immannung an paddungnay napiku an numbino'ob'on di dalan hi dalanonda
ti mi'id ahan di nahamad hi egponganda.
16 Hi Anomnoman di bumadang ay he"a
ta adi'a mabalbaliyan hinan pangal'alu' nan babain nangilugtap hi ahawana
17 ti ta"on hi un waday nabayag an ahawana mu tinaynana hiya,
at agguyna inunud din intulagnan hiyah din nun'ahawaandah hinagang Apo Dios.
18 Ya gulat ta umuy'ah abungna at umannung an umuy'ah nan babluy an mungngadan ad Atayan
ti neheggon hidih nan babluy di nun'atoy.
19 Ya mi'id ahan ah ohah nan umuy an mangelo' ay hiyah mumbangngad hinan ay paddungnay nepto' an dalan,
ya manu ay adida ti mid ologdan manganap hinan dalan an mipluy hi wadan di pi'taguan.
20 At he"a ya mahapul an mitnud'ah nan mun'aphod an tagu
an paddungnay mundaldallanan hinan nepto' an dalan,
at nahamad di pi'taguam
21 ti nan tatagun nahamad di pangatda ya anggay di mumpunhituh tun luta,
ya minaynayunda.
22 Mu ma'innila an nan mangamangat hi nappuhi ya mapogpogdah tun luta,
ya nan adi mangipa'annung hinan intulagda ya ma'ubahda goh.”