5
Hay Adi Pangelo'an hinan Bo'on Ahawa
1 Ya intuluy Solomon an nangulgud hi nipa"el an inalinay,
“He"an imbaluy'u,
ihamadmun ingaon tun hapito' an nanomnoman ya nan maphod an tudtudu'
2 ta way atom an matugun,
at mihamad di pangatmu,
ya nala'eng'an mamilih nan hapitom.
3 Emayaam nan babain hi Umilugtap di ngadana
ti munlameeh an ay danum di alig nan timidna,
ya umal'alu' di hapitona.
4 Mu gulat ta ihi'almu hiya ya hay pumbalinanah umangunuh ya un hay punholholtapam
an umat hinan imminum hinan mun'aklit an akbu ya nan natubli' hinan hinalung.
5 At henen inatnay mangipiyuy ay hiyah nan wadan di nun'atoy,
ya he"a goh di mi'yuy ay hiyah nan wadan din nun'atoy!
6 Nan umat hinan babai ya mi'id nomnomonah nan ay owon an umuy hi pi'taguan di tagu
ti ta"on hi un na"appuhiy pangatna mu mi'id ma'awatanah aatna tuwali.
7 At hiyaat un hay alyo' ay he"an imbaluy'u*Bahaom nan footnote di Prov. 1:7 ta innilaom di aat ten translation.
ya mahapul an ihamadmun donglon heten itugun'u ta adim du'gon:
8 Bataanam hi Umilugtap an ta"on hi un nan nunhituwana,
ya adi'a meheggon ay hiya.
9 Ti undan pohdom an idat hi pamhodmuh nan umat hina an kalahin di tagu?
10 Undan pohdom hi un way tagun agguymu inilay paddungnay manamham hinan inadangyanmu?
Adi ahan maphod hi un hay intamum di bumadang hinan tagun mid ah pamhodnan he"a!
11 Hay adi' ahan pohdon hi ma'at ay he"ah agadyuhan di atayam
ya nan a'ulatam an mattig di tungalmu,
ya nan nidugah an punlungdayaam.
12 Ya alyom di,
Anaad ta ben'on'u nan nihingala',
ya anaad ta adi' pohdon an matugun?
13 Immannung an agguy'u inunud nan tugun din nun'anomnoman an nuntudtudun ha"in,
ya agguy'u inabulut din namhod an bumadang ay ha"in!
14 At ten ad ugwan ya mid hulbi' an tagu,
ya nidugah an bumaina' an amin hinan tatagu!
Hiyah ne inila' hi alyonyu!
15 Agguyyu dengngol nan nahamad an hapit an alyonay,
Uminum ayuh danum hinan bagiyu an obob an bo'on hinan obob di udumnan tagu?
Makulug ahan nan ituduna, at nan ahawayuy pa'appohpohdonyu, ya adiyu ilugtap.
16 Ti undan abulutonyu an miwa'at nan danum di obobyuh nan kalata
ya umayuh nan danumyuh nan lugal an a'amungan di tatagu?
17 Adi, ti dane ya bagiyu ya anggay,
at adi mabalin hi pahagubonyuy udumna.
18 Maphod at ni' hi unmu wagahan din inahawam hidin a'ungam,
ya maphod hi un'a umamlong ay hiya!
19 Ti hiya ya mapmaphod an umat hinan mahunghung an habhabung,
ya olom man ya nan tigaw di odolnay mangipa'amlong ay he"ah enggana,
ya gun da'a ipa'anlah nan pamhodnan he"a!
20 At he"an imbaluy'u ya adim ahan amnawan di udumnan babai,
ya adim ihihi'al nan babain way ahawana.
21 Ti nomnomom an hi Apo Dios ya titiggonan amin di ato'aton nan tagu,
ya i'innilanay malgom hi umayana.
22 Nan nappuhin ato'aton nan taguy paddungnay bituh mangna ay dida,
ya nan baholda ya ay talin an mamobod ay dida.
23 Ya matoyda ti adida patugun,
ya ma'ubahda ti nakudang di nomnomda.”