15
1 Nan pambal di ma'ma'ullay an taguh un way bimmungot ya uyahonay bungotna,
mu wa ay tuwali ta idalatnay pambalna ya miyal'allay bungotna.
2 Nan itudun nan nala'eng an tagu ya do'ol di maphod hi ma'adal hinan hapitona,
mu nan tagun nakudang di nomnomna ya mi'id di poto' di hapitona.
3 Hi Apo Dios ya titiggonan amin di ma'ma'at,
at Hiya ya inilanan amin nan mangamangat hi maphod ya nan gun mangat hi nappuhi.
4 Nan umal'alu' an hapiton ya immannung an hiyay dumalat hi ataguan nan mangngol,
mu nan hapiton nan nala'eng an bumalbalih nan ibbana ya umipab'on ay hiya.
5 Nan ungan mamahal hinan itugun amana ya un nakudang di nomnomna,
mu nan tagun mangabulut hinan hingalda ya nanomnoman.
6 Nan tagun nahamad di pangatna ya pumpumhod an amin di ato'atona an umat hinan abung an gun ma'ud'udman di numbino'ob'on an gina'unan mapla'an,
mu nan mangamangat hi nappuhi ya gun pumuhiy ato'atona an umat hinan bumo'la an gun mamanghan di bo'laona.
7 Nan nanomnoman an tagu ya gunna hapiton nan way ibadangnah nan i'ibbana,
mu adi umat hinay aton nan tagun nakudang di nomnomna.
8 Umipabohol goh ay Apo Dios nan e'nong nan tagun mangamangat hi nappuhi,
mu umipa'amlong ay Hiya nan luwalun nan tagun maphod di pangatna.
9 Umipabohol goh ay Apo Dios nan pangat di tagun mangamangat hi nappuhi,
mu pohpohdona nan tatagun nahamad di pangatda.
10 Nan tagun nanginnilah nan nepto' an umat hinan dalan mu mihalla damdamah dalanona ya nidugah di moltana,
ya gulat goh ta adina abuluton nan mitugun ay hiya ta hay mepto' di dalanona at hay angunuhna ya matoy.
11 Hi Apo Dios ya adi mabalin hi un waday mili"ud ay Hiya ti inilanan amin di logom an ta"on nan aat di wadan di nun'atoy,
at inyal'allanan ditu'un matagu ti inilanan amin di wah nomnom tu'u!
12 Nan mapihul an tagu ya adina pohdon an matugun,
at adi ahan mumpatugun hinan nun'anomnoman an tatagu.
13 Nan tagun waday amlongna ya ma'immatunan hi angahnan umeme'emeh,
mu nan tagun munlungdaya ya ma'immatunan an nidugah di problemana.
14 Nan nanomnoman an tatagu ya pohdondan ma'udman nan inilada,
mu nan tatagun nakudang di nomnomda ya adida pohdon an ma'udman nan inilada, at paddungnay galut di gunda gag'alon.
15 Umipalungdaya nan nitaguan nan tagun do'ol di ligatnah abigabigat,
mu umipa'amlong nan nitaguan nan tagun gun munyaman hinan ma'ma'at an umat hinan tagun gun me'egtad hi behta.
16 Onaynay nitaguan nan tagun manghan di gina'una ya gunna e'gonan hi Apo Dios
ya un nan tagun do'ol di gina'una mu awalitang.
17 Onayna goh hi un me"an nan taguh nan udumnan tagun pohpohdona an ta"on hi un halawhaw di ihdada ya anggay
ya un me"an hinan udumnan tagun pahiwona an ta"on hi un way do'ol an dotag hi ihdada.
18 Nan tagun mabanbannungot di dumalat hi pumpapattayan nan tatagu,
mu nan ma'ma'ullay an tagu ya padinngona nan mumpapattoy.
19 Nan napayad an muntamu ya immannung an do'ol di ligat hinan ataguna,
mu nan nahamad di pangatna ya nahamad di nitaguana.
20 Nan nanomnoman an unga ya umipa'amlong ay amana,
mu nan nakudang di nomnomna ya umipalungdayan inana.
21 Nan nakudang di nomnomna ya ma"am'amlong an mangat hinan nappuhin mi'id di hulbina,
mu nan nanomnoman an tagu ya ammunay maphod hi pa'appohpohdonah ipadenolna.
22 Nan tagun adi mundongol hinan maphod an tugun ya mi'id di pumbalinan di ninomnomnah aton,
mu nan tagun mumpatugun hinan nun'anomnoman ya maphod di pumbalinan nan way nomnomonah aton.
23 Ma"am'amlong nan tagun hay immannung di hapitonan waday ibadangnah nan mangngol
ti nan umal'alu' an hapit ya ongol di ibadangnah nan tatagu.
24 Hay ipaddungan nan nanomnoman an tagun mangun'unud hi aat di pi'taguan
ya melwang hi wadan din nun'atoy an ad imbelnu.
25 Pa"ion Apo Dios di nunhituwan nan mangipabagtuh odolna,
mu halimunanay igad di lutan nan umu'utun ta mi'id ah mangipahlig.
26 Umipabohol ay Apo Dios nan punnomnoman nan tagun mangamangat hi nappuhi,
mu umipadenol ay Hiya nan hapit nan tagun nahamad di pangatna.
27 Nan umam'am an bumalbalih nan heneggonay dumalat hi guluh nan pamilyana,
mu nan tagun adi mangabulut hi mili"ud an bayad ta atonay nappuhi ya malenggop di nitaguana.
28 Nan tagun nahamad di pangatna ya nomnomonah mahhun ya unna tabolon nan ibagadan hiya,
mu nan tagun nappuhiy ato'atona ya atobatobal, at nappuhiy panapitna.
29 Adi ihi'al Apo Dios di luwalun nan tagun nappuhiy pangatna,
mu donglonay luwalun nan tagun nahamad di pangatna.
30 Nan tagun umemeh ya pa'amlongonay i'ibbana,
ya namamah un hay ma"aphod di ulgudonan dida.
31 Maphod hi un abuluton nan taguy mitugun ay hiya,
at immannung an hiyay mibilang hinan nun'anomnoman an tatagu.
32 Ya nan tagun adina pohdon an mituduwan ya un hay odolnay binalbaliyana,
mu nan tagun mangabulut hinan maphod an hingal ya immannung an luma'eng.
33 Hay ma'at hinan tagun mange'gon ay Apo Dios ya umannung an luma'eng ta manomnoman
ti nan nanginnilan mangiyulay an mumpa'ampa ya hay umangunuh ya mipabagtun me'gonan.