17
1 On'onaynah un hay dalangdang di onon mu ta wadaat di lenggop ya mid al'ali
ya un nan panganan hinan numbino'ob'on an ma'an ya mihda an unta hay munhohongngel.
2 Nan nanginnilan tagala ya la'tot ya hiyay mumpapto' hinan umipabain an imbaluy di ap'apuna,
at la'tot ya ibilangda hiyah ohan hakup di pamilyada, at me'ebnoh hinan banohdan hina"agi.
3 Nan silver ya balitu' ya hay apuy di mun'anang ta mamahmahda,
ya umat hina goh di aton Apo Dios an mangihamad hinan aat di tagu ta mipattig di anahamadna.
4 Nan tagun nappuhiy ato'atona ya pohpohdonan donglon nan agaga"ihaw an hapiton nan i'ibbana,
ya umat goh hinan munlayah an tagu ti wa ay ta nan layah di ma'ulgud ya ihamadnan donglon.
5 Nan tagun mamihul hinan nawotwot ya hi Apo Dios an nunlumun hiyay pinihulna,
ya nan tagun mun'am'amlong hi un waday na'at hi nappuhih nan udumnan tagu ya umannung an mamoltah pidwa.
6 Nan nun'ala'ay ya iyamlongday a'apuda,
ya umat goh hinay pangiyamlongan nan ung'ungungngah nan o'ommodda.
7 Nan tagun mumpahiya ya mi'id hulbin di panapitna,
at iyal'allana nan punlayahan nan ap'apu!
8 Nan tagun bayadanay udum an tagu ta way aton nan pohdonan nibahhaw an ma'at
ya umat hinan hiwang an wan hiya ti gun ma'ma'at nan pohpohdonan aton.
9 Nan tagun mamhod hi un minaynayun di pamhod nan tatagun hiya ya aliwanah un way atondah nappuhin hiya,
mu nan tagun hay numbaholanay nonomnomona ta ulgudonay aat nan nappuhin inat di ibbana at hiyay mamahbah hinan punliligwaandan duwa.
10 Mamenghan ya anggay di uyap di pangihingalandah nan tagun nanomnoman ya un matugun,
mu adi umday hinggahut hi panoplatandah bonog di tagun nakudang di nomnomna ya un matugun.
11 Nan tagun nappuhiy pangatna ya un hay guluy umuyna ana'anapon,
mu la'tot ya waday atata'ot an pulis an mahnag ay hiya ta magilat mahkay.
12 Onaynah un nan mabmabbungot an animal hinan dalan an naplohan hi imbaluynay damuwon
ya un nan tagun nakudang di nomnomnan un malgom di atona.
13 Gulat ta hay nappuhiy pamalloh nan taguh nan maphod an inat nan ibbanan hiya
at mipabangngad goh nan nappuhih nan pamilyanah enggana.
14 Ete"an ay han tagun mi'tututut ya umat hinan muntudun naltut an danum an la'tot ya nadoldol, at mapa"i,
at maphod hi unna ipogpog an mi'hahannun ay hulatona ta adi mamaman umongol an ay mi'pattoy.
15 Umipabohol ay Apo Dios nan huwis an mangibo'tan hi baludan hinan nabaholan an tagu,
ya impibaludna nan tagun mi'id ah inatnah nappuhi.*Waday udumnan verses eten Liblu an Proverbs an mangituduh aat nan huwis an mumpapto': Prov. 17:23, 26; 18:5, 17-18; 21:15; 24:23-25; 28:21; 29:14.
16 Ma'adyuwan nan pihhun mibayad hinan adi mangngol hi pun'adalana
ti adina damdama pohdon an mituduwan!
17 Nan nahamad an gadyum ya minaynayun di pamhodna an ta"on un malgom di ma'at,
ya umat goh hinan pogtang an wada ay di munligat hi agina ya immannung an maphod di atona an ta"on hi un na'alligat di aatna.
18 Nan tagun adi umday punnomnomana ya nonongan ihapatana
an hiyay mamayad hi utang nan heneggonah un adi pa'abbayad.
19 Nan tagun hay pumbaholan di pohpohdona ya un hay pi'hohongngilanah nan tataguy pohpohdona,
ya nan tagun mangipiyammah ata'nang an pantaw di allupna ya un hay mangakaw di paddungnay awitona.
20 Nan tagun nappuhiy nomnomnomona ya adi pumhod di nitaguana,
ya umat goh hinan tagun nala'eng an bumalbalih nan ibbanan tagu ti atata'ot di ma'at ay hiya damdama.
21 Munlungdayay ommod di ungan nakudang di nomnomna
ti nan adi dumngol ya mi'id di umamlongan di ommodna.
22 Nan pun'am'amlongan di tagu ya ay agah an mangipaphod hi odolna,
mu nan tagun nidugah di punlungdayaana ya la'tot ya hiyay lummuh pundoghana.
23 Nan huwis an nappuhiy ato'atona ya abulutonay mili"ud an bayad hi midat ay hiya ta adi mamotta nan numbahol.
24 Nan nanomnoman an tagu ya gunna nomnomon di makulug hi ato'atona,
mu nan nakudang di nomnomna ya mi'id poto' di nomnomonah atona.
25 Nan nakudang di nomnomnan imbaluy ya umipaligat,
ya umipalungdayah nan o'ommodna.
26 Adi ahan maphod hi un nan mi'id di baholnan taguy mamolta,
ya nibahhaw ahan hi un magilat nan tagun nahamad di atonah nan udumnan tagu.
27 Nan nanginnilan tagu ya adi nonongan himmapit,
ya adi mabanbannungot ti hihidyay panapitna.
28 Ti ta"on un nan nakudang di nomnomnan tagu ya gulat ta dindinong
at mabalin an alyonday un nanomnoman ti ane'nongonay hapitona.
*17:15 Waday udumnan verses eten Liblu an Proverbs an mangituduh aat nan huwis an mumpapto': Prov. 17:23, 26; 18:5, 17-18; 21:15; 24:23-25; 28:21; 29:14.