20
1 Nan tagun uminum hi bumutong ta nangamung un mabutong ya la'tot ya pumihul hinan i'ibbana, ya mi'pattoy goh ay dida,
at nan uminum hi umat hina ya mibilang an hiya ya nakudang di nomnomna.
2 Nan bungot di ali ya atata'ot an umat hinan layon an humeeheel,
ya gulat ta way mangipabungot ay hiya at mid mapto' ya abalinanan mangipapatoy ay hiya!
3 Nan tagun adi mamhod an mi'hongngel ya e'gonanda hiya,
mu nan nakudang di nomnomna ya immannung an ag'agaan ni'hongngel.
4 Nan napayad ya adina tamuan an gaudon nan payawnah nan ahitanom,
at awni ta madatngan di iwang at hiyay mi'id ah bot'ona.
5 Nan na'unig an nomnomon di ohan tagu ya umat hinan danum an wah nan maluhung an bubun, at adagwih how'on,
mu nan tagun abalinanan innilaon nan na'ahhamad ya mabalin an pahapitonah den tagu ta bumuhu' di wah nomnomna.
6 Nan do'ol an tatagu ya alyondah un nahamad di pumpopohhodandah nan i'ibbada,
mu hay wadan di pangah'upan hi umat hinan tagu?
7 Nan lala'in nahamad di pangatna ya maphod di gunna aton,
ya immannung an mawagahan nan imbabaluyna.
8 Wa ay ta umbun nan alih nan umbunana ta mumpanuh hinan aat nan tataguna
ya hamadonah mahhun ta innilaonay maphod ya nan agguy immannung.
9 Ngadan nen tagun waday abalinana udot an mangalih,
“Na'ahhamad di nomnom'u ti mi'id inat'uh nappuhi, at agguya' numbahol!”?
10 Umipabohol ay Apo Dios nan mangudang hinan pungkiluna ya nan punlukudna.
11 Ta"on nan ung'ungnga ya nan pangatnay mangipa'innilah nan aatnah un nahamad unu nappuhi.
12 Nan inga an pundongol di tagu ya nan mata an pannigna
ya hi Apo Dios di nunlumun daten duwa.
13 Mawotwot nan taguh unna pohpohdon an molmolo',
mu gulat ta mahlu hiyan muntamu at waday mahawal hi tanudna.
14 Munlili nan nguminah un muntawal an alyonay un nanginah nen la'uana,
mu unat goh makak ya iting'ina an nalakay nungnginana.
15 Do'ol di nun'abalul an balitu' ya nan nun'anginan batu,
mu nabalbalul nan hapit di nanomnoman an tagu, ya na'alligat goh hi ma'ah'upan.
16 Mahapul an waday alanyuh gina'un nan tagun mangita'dog hinan tagun umutang ta waday pamatangna,
ya iyal'allanah unyu agguy in'innilah nen tagu.
17 Immannung an mapolhat hi onon nan ma'an an na'alah linaylayah,
mu awniat mumbalin hi panag hi timid.
18 Nu waday nomnomom hi ma'at ya maphod hi un'a mumpatugun hinan nun'ala'eng an nanomnoman hi mahhun ta adi mibahhaw,
ya iyal'allanan mahapul an mumpatugun'ah un ayu umuy mi'gubat.
19 Nan ma"ulgud an tagu ya mi'id upid di hapitona,
at maphod hi un du'gon nan tataguy umat hinan tagu.
20 Nan tagun mangidut hi ommodna ya adi madnoy di pi'taguana
an umat hinan hilaw an madop, at pa'ahhelong.
21 Nan inadangyan an nalakay na'alana,
ya mi'id hulbinah umangunuh.
22 Adi maphod hi un way mangalih, “Iballoh'u nan inatdan nappuhin ha"in!”
Ti hay maphod ya unna e'kod ay Apo Dios ta okod Hiyah atona.
23 Umipabohol ay Apo Dios nan kumuluk hi kiluan
ya nan kumuluk hi lukud di ila'una.
24 Hi Apo Dios di mangipapuut hi at'aton nan tagu,
at anaad ta gahin hi un tu'u innilaon di ma'ma'at hi nitaguan tu'u?
25 Atata'ot hi un nonong ya nunhapata nan tagun Apo Dios an waday idawatnan Hiya ti ini ya adi ma'at,
at maphod hi un hamadin hi mahhun ya un ihapata.
26 Nan nanomnoman an ali ya hamadonay tatagun mangamangat hi nappuhih pumpapto'ana
ta gilatona didan adina igohgohan.
27 Hi Apo Dios ya hamadonay wah nomnom di tagu an ta"on un nan agguy nipa'innila.
28 Mi'id al'alih nan alin mumpapto' hi un makulug di pangatna an napapaddung di atonan munhumalyah nan tatagu
ya nahamad di atonan mangipanuh ay dida.
29 Hay amaphod di ungunga ya nan amabi'ahda,
ya namamah nan nun'ala'ay ti hay amaphodda ya nan na'ubananda.
30 Nan numbino'ob'on an pangilat di dumalat hi pumhodan di tagu ta ma'aliwan di baholna,
at nan haplat di mangipaphod hi aatna.