25
Nan Udumnan Intugun Solomon
1 Hiya hatu goh di udumnan intugun Solomon an intudo' din numbino'ob'on an tagalan nan Alin hi Hezekiah*Hay aat Hezekiah ya nitudo' hinan II Ki. 18:1-20:21, ya II Chron. 29:1-32:33, ya Isa. 36:1-38:22. an nunhituh nan babluydad Judah.
2 E'gonan tu'uh Apo Dios ti nan ipo"oyna ya mid nanginnilah aatna,
mu e'gonan tu'u nan a'alih un way inadaldah nan agguy pay nipa'innila.
3 At maphod hi un hay anala'eng nan ali ya nidugah an umat hinan inata'nang ad daya
unu umat hinan linuhung di baybay.
4 Ma'innila an gahin un mahibug nan silver ta ma'aan di lugitna ya un maphod di tigawna
ya un waday maphod hi iyammaana.
5 Ya umat goh hinan ali an wa ay ta iyadagwiyu nan tatagun nibahhaw di nanugundan hiya
at pumhod nan babluy an pumpapto'ana.
6 Ya wa ay ta umuy'ah nan wadan di ali ya adim ipattig an he"a ya nabagtun tagu.
Ya adi'a goh umuy umbun hinan umbunan di nun'abagtuy haadna
7 ti onaynah un hiyay mangalih, “Umali'a mi'yibun'ah nan umbunan di nun'abagtu!”
ya un nan pamakakanan he"ah nan inumbunam ti hiyah ne ababain!
8 Wada ay di tinnigmuh inat di ohan tagu ya hamadom ta adi galagala ya eka nundalom
ti ini ya waday ohah mun'ihtigun mangalih nibahhaw nan imbagam,
at he"ay bainona!
9 Ya gulat ta mi'hongngel'ah nan heneggonmu ya adim ahan ipa'innila nan
nili"ud an ininnilam hi aatna.
10 Ti gulat ta donglona an imbaagmu nan nili"ud an nunhapitanyu at bainon da'a,
ya mid mangehdol ay he"ah enggana.
11 Nan mepto' an hapiton hinan gutud di punhahapitan
ya umat hinan numbino'ob'on an balitu' an bungan nihibug hinan silver an duyu.
12 Ya nan panugun di nanomnoman hinan ibbanan tagun mangabulut hinan intuguna
ya ay namahmah an balitu' an hingat, unu buung, unu hengheng.
13 Nan mabaal an makulug di atona ya umipa'amlong hinan nannag ay hiya
an umat hinan pa"ayhugin danum hi inumon nan ma'uwaw an mumboto' hinan tiyalgaw.
14 Nan tagun mangalih un waday idatnah ibadangna mu adina ipa'annung
ya umat hinan bunut ya nan tuyup an alyon unna iyali udan mu mi'id.
15 Nan tagun ma'ulay di panapitna ya mabalin an ma'al'alu' nan a'ap'apuh un hiya ya mehodan an mi'hapit ay hiya
ti immannung an nan immodhol an nomnom di tagu ya mabalin an ma'upol.
16 Gulat ta ah'upanyu nan danum di alig at ane'nongonyuy inumonyu
ti do'lonyu ay at mid mapto' ya umuta ayu.
17 Ya umat goh hinay atom an manghanom di umuymu pi'yib'ibunan hinan heneggonmu
ti la'tot ya ipahigam, at adi da'a pohdon an tigon.
18 Nan tagun un munlumuh apuhian di heneggona ya layah di pangihtigunah aatna
ya umat hinan matadom an hinalung, unu pang'ul, unu nan tulid di panan pumatoy.
19 Gulat ta e'kodmuh nan tagun adi medenol ta badangan da'ah un way ligatmu
at umat hinan mungwawod hi babay igag'almu unu umat hinan napilay an hu'iy idalanmu.
20 Gulat ta waday tagun nidugah di punlungdayaana, ya immuy'a ta ikantaam hiya
at umat hinan tagun umilayaw hi lubung nan mah'aw unu umat hinan mangiyagah hi ahin hinan hugat di nadinul.
21 Gulat ta munhinaang nan tagun mi'bohhol ay he"a ya idatmuy onona,
ya gulat goh ta ma'uwaw ya pa'inumam hi danum.†Rom. 12:20.
22 Ti atom ay di umat hina at mabainan hinan nappuhin inatnan he"a,
ya wada goh di idat Apo Dios ay he"ah lagbum hi udum di algaw.‡Rom. 12:20.
23 Wa ay ta pumuo' ya immannung an umiyalih udan,
ya wa ay ta waday mangulgud hi nappuhih aat nan i'ibbana ya immannung an hiyah ne dumalat hi bumungtan nan i'ibbanan hiya.
24 On'onaynah unta umuy miyohhan munhituh nan abadyaw
ya unta mi'hituh nan ahawan tumutututut.§Prov. 21:9.
25 Nan maphod an ulgud an malpuh nan adagwin babluy ya anonay higa
an umat hinan ayhugin danum an umaan hi inuwaw.
26 Unudon ay nan tagun nahamad di pangatnay panugun nan tagun nappuhiy ato'atona
ya nipaddung hiyah obob an na'anibul unu nalugit.
27 Adi maphod hi odol hi un do'lon di onon hi alig,
ya umat goh hinan a'e'gonan an adi maphod hi unmu pohdon un he"ay gunda e'gonan.
28 Nalaklakan ma'abak nan tagun adi pa"edpol hi bungotna
an nipaddung hinan babluy an nun'apa"iy allup an hanina.