5
Luwaluh Pun'adawan hi Abaliwan
Hete ya psalm an intudo' David, ya hay intud'ana ya nan ap'apun di muntudtuduh kanta, ya mahapul di do'ol an tungngali ya un tukalon.
1 Apo Dios, donglom' ni' ahan di luwalu'
ta hamadom nan nidugah an holtapo'!
2 Ya He"a ya anggay di pumbaga' hi badang
ti He"ay Ali' ya Dios'u, ya mi'id udum!
3 At abigabigat hinan helhelong ya gunmu ni' donglon nan luwalu' ay He"a,
ti hodo' di pambalmu.
4 Ya He"a, Apo Dios, ya adim pohdon nan nun'appuhin pangat,
ya adim abuluton an middum ay He"a nan gun mumbahol.
5 Ya adim pohdon an tigon nan mumpumpahiyan tatagu,
ya abohlam an amin nan gun mangat hi nappuhi.
6 Ya ubahom nan tatagun mumpunlayah,
ya boholom nan pumatoy ya nan bumalbali.
7 Mu dumalat nan nidugah an homo'mu ya mabalin an umalia'
an munluung ay He"ah nan Timplum an awadam.
8 Ituduwana' ni', Apo Dios, ta nan pohdom di ato',
ti do'olda nan mi'buhul ay ha"in!
9 Ya adi makulug nan gunda hapiton ti un hay puma"ianday pa'appohpohdondan aton.
Ya mipaddung di timidah nan nibughul an lubu' an ma"agub
ti nan nun'appuhiy gunda hapihapiton,
ya layalayahanday ibbadan tagu.*Rom. 3:13.
10 At moltaom didan nun'abaholan, Apo Dios!
Ya pumbalinom nan planudan nappuhih apa"ianda,
ya numpakakmu didah tun wadam ti ngohoyon da'a an nan pumbaholan di gunda aton!
11 Mu nan mundenol an mangihi'ug ay He"a ya minaynayun di gunda umamlongan an mungkanta,
ya ibaliwmu dida ti pa'appohpohdon da'a,
ya He"ay dumalat hi umamlonganda.
12 Ti immannung an He"a, Apo Dios, di mungwagah hinan nun'ahamad di aatda,
ya nan pamhodmuy paddungnay hapiawda.