16
Luwaluh Pange'kodan ay Apo Dios*Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
Heten psalm an intudo' David ya miktam.†Nan hapit an miktam ya hapit di Hudyu, ya ad ugwan ya mid nanginnilah pohdonan ibaga. Mu mid mapto' ya hiyah ne ohan aat di aton an muntukal an umat hi panglotan, unu mahaluyud, unu ul'ulodyon, unu gagalan.
1 Baliwana' ni', Apo Dios, ti He"ay ehdol'u.
2 Ya inali' ay Apo Dios di,
“He"ay Apu' ti an amin nan mun'aphod an wadan Ha"in ya He"ay nalpuwana!”
3 Ya nan nahamad di atonan mangunud ay Apo Dios
di pa'appohdo' hi pi'haphapita' ya idduma',
4 mu nidugah an gun ma'ud'udman di lumungdayaan nan tatagun mundayaw hinan bulul.
Mu Ha"in ya adia' middum ay didah nan onnganda,
ya adi' goh dayawon nan bululda.
5 He"a, Apo Dios, di paddungnay tawid'u,
ya idatmun amin di mahapul'u,
ya He"ay okod hi nitagua'.
6 Ya do'ol di amaphoda' hi impabnohmun Ha"in
ti maphod di indatmuh nitagua'.
7 At idaydayaw'uh Apo Dios an mangitudtuduh nan maphod hi ato'
an ta"on hinan mahdom ya gunna ipanomnom ay Ha"in nan Tuguna.
8 Ya inila' an hi Apo Dios ya wagwadan Ha"in,
at malenggopa' an mi'id al'alin Ha"in.‡Ac. 2:25.
9 At hiyaat unna' mun'am'amlong
ti minaynayun di alenggopa' an mi'id ah ma'at hi nappuhi§Ac. 2:26.
10 ti inila' an adim iyabulut di ataya',
ya umat goh an adim iyabulut di idduma' an baalmuh nan wadan di lennawan nan nun'atoy.*Ac. 2:27; 13:35.
11 Ya gunmu ipa'innilan Ha"in di ato' an mi'tagun He"ah mid pogpogna,
ya nidugah di pun'am'amlonga' ti wagwagda'an Ha"in.†Ac. 2:28.
*^ Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
†^ Nan hapit an miktam ya hapit di Hudyu, ya ad ugwan ya mid nanginnilah pohdonan ibaga. Mu mid mapto' ya hiyah ne ohan aat di aton an muntukal an umat hi panglotan, unu mahaluyud, unu ul'ulodyon, unu gagalan.
‡16:8 Ac. 2:25.
§16:9 Ac. 2:26.
*16:10 Ac. 2:27; 13:35.
†16:11 Ac. 2:28.