19
Hay Nipattigan di Anabagtun Apo Dios an Dumalat nan Limmuna
Hay intud'an David eten psalm ya nan ap'apun di muntudtuduh kanta.
1 Nan wad abuniyan an limmun Apo Dios di mangipa'innilah nan anabagbagtuna
ya nan udumnan numbino'ob'on goh an limmuna.
2 Ya abigabigat ya amahdomahdom ya wagwah didan mangipa'innilah nan anabagbagtuna,
3 ya madngol di hapitonda an amin hi alutaluta
4 ti nan aatday panginnilaan an amin nan tataguh tun lutah anabagbagtun Apo Dios,
mu paddungnay gunda humapit ta nangamung hinan pingit tun luta.*Rom. 10:18.
Ya limmun Apo Dios ad daya ta way ihinan nan algaw
5 an gun bumuhu' hi abigabigat an umat hi lala'in malhin an ma"amlong
unu umat hinan mi'yabbak an ihihi'alnay tumagtagana.
6 Ya bumuhu' nan algaw hinan buhu'ana,
ya innaynayunan mahlimahlig ta nangamung hinan a'unugana,
ya wa ay ta pumtang ya mi'id ah ohah adi munle'nah nan lahuna.
7 Nan Uldin Apo Dios ya na'ahhamad an ipaphodnay punnomnoman nan tagu,
ya nan tudtuduna ya medenol ti hiyay anomnoman nan tagun nakudang di nomnomna.
8 Makulug nan Tugun Apo Dios ya umipadenol,
ya makulug nan Mandalna ti paphodonay punnomnoman.
9 Hay pundayawan ay Apo Dios ya ma"aphod,
ya mid ahan apogpogana,
ya immannung nan intuguna an na'ahhamad.
10 Ya nabalul ahan hanan Tuguna ya un nan namahmah an balitu',
ya paddungnay ma'allameehda ya un nan namahmah an danum di iyu'an.
11 At nan Tugunmu ya hiyay namadan ay ha"in an baalmu, Apo Dios,
ya nan pangun'unada' ya ongol di alagbua'.
12 Mu umu'uddum ya mid ma'amtanmin taguan nibahhaw ami,
at aliwam ni' di bahol'u an nipo"oy.
13 Ya badangana' ta adi' aton nan inila' an ibahhawa',
ya adim ni' iyabulut an hanan impa'engha' an pumbaholan ya munnononnong ay ha"in
ti pohdo' ahan an mapogpog nan gun'u pangatan hi nappuhi!
14 Apo Dios an paddungnay batu an punhi'uga' ya baliw'u,
nan hapihapito' ni' ya nan gun'u nomnomnomon ya miyunnudan hinan pohdom an mangipa'amlong ay He"a.