26
Hay Luwalun David hi Aat di Anahamadnan Apo Dios
Hi David di nangitudo' eten psalm.
1 Apo Dios, ipa'innilam di aat di anahamad'u ti nan immannung di ina'inat'u,
ya adia' ahan munduwaduwah nan pangehdola' ay He"a.
2 At tapngana' ya hamadona', Apo Dios,
ta innilaom di aat'u ya nan wah nomnom'u
3 ti inila' an minaynayun nan nidugah an pamhodmun ha"in,
ya ten inaynayun'un unudon nan Tugunmu.
4 Ya adia' ahan middum hinan ahilalayah ya hinan bumalbali,
5 ya pahiwo' nan tatagun nun'appuhiy pangatda,
at adia' ahan umuy mi'yib'ibun ay dida.
6 Apu, ihua' di ngamay'u ta pangimmatunan an mid ahan inat'uh nappuhi,
ya unna' umalih nan pun'onngan an mundayaw ay He"a.
7 Ya it'u"uy kanta' hi pangipabagbagtua' ay He"a,
ya ulgudo' nan numbino'ob'on an mun'aphod an inatmu.
8 Immannung an pa'appohpohdo' nan Abung an ihinam, Apo Dios,
ti hidiy pannigan nan tataguh anidugah di abalinam.
9 Ya adia' ni' itagam an pi'yubah hinan nun'abaholan,
ya adia' goh iddum hinan amoltaan nan pumatopatoy
10 ti hanan gun mangat hi nun'appuhi ya mumpalagbudah nan pangatandah nappuhi.
11 Mu ha"in ya maphod di ina'inat'u,
at hom'ona' ni' ta baliwana'.
12 At ihamad'un umunud ay He"a an ta"on un way ma'at,
at hinan a'amungan nan tatagum an mundayaw ay He"a ya He"ay idaydayaw'u.