37
Hay Umatan nan Maphod ya Nappuhin Tatagu*Nan mahhun an letran di alphabet di Hudyu an A ya hiyay te"an di letrah nan mahhun an verse, ya nan miyadwan letran di alphabetda an B ya hiyay te"an di letrah nan miyadwan verse. Ya mahayhaynod nan hinohhan letran di alphabetda an mete"ah A ta engganah egpongana, ya duwampulu ta duway letran di alphabetda.
Hi David di nangitudo' eten psalm.
1 Adi ayu numanomnom an dumalat nan nappuhin pangat nan tatagu,
ya adiyu amohan dida
2 ti umatdah nan holo' an ag'aga ya nun'alyawda ya nalanguda,
at mun'atoyda.
3 Ehdolyuh Apu tu'u ta atonyuy maphod,
at malenggop ayuh nan babluy an punhituwanyu.
4 Atonyu nan pohdon Apo Dios,
at idatnan amin nan popohdonyun mahapulyu.
5 An amin di atonyu ya eyokodyun Apo Dios,
ya Hiyay ehdolyuh bumadang.
6 At nan anahamadyu ya nan pamapaddunganyun mumpanuh di attigan di amaphodyu
an umat hinan mabnang an potang.
7 At anuhanyu, ya e'kodyun amin ay Apo Dios,
ya adi ayu numanomnom hi umadangyanan nan udumnan tatagu ti atonday nappuhi ta hiyay pangngalanda.
8 Ya adi ayu bumubungot,
ya adi ayu goh bumobohhol
ti hiyay dumalat hi pumbaholanyu,
9 ti nan mangamangat hi nappuhi ya mapogpogda,
mu nan mange'kod hi nitaguandan Apo Dios ya diday mamnoh hinan luta.
10 Ya hanan nappuhiy pangatda ya adi madnoy at mun'a'ubahda,
ya anaponyu dida,
mu adi ayu pa"ah'up.
11 Mu nan ma'uya di mamnoh hinan luta,
ya diday pumhod di nitaguanda,
ya mid al'alin dida.
12 Ti nan munnomnom hi nappuhih atonah nan maphod di pangatna,
ya nan mamohol ay dida
13 ya abatlan Apo Dios dida ti inilanan adi madnoy at mamoltada.
14 Nan tagun agguy kimmulug an gun mangat hi nappuhi ya nun'idadaanday hanggapda ya panada
ta patayonda nan nun'awotwot,
ya nan agogohgoh,
ya nan nahamad di pangatda.
15 Mu diday mapatoy hinan hanggapda,
ya mun'a'ipung hinan panada.
16 Nabalbalul nan itang an gina'un nan nahamad di ugalina
ya un nan inadangyan nan do'ol an nun'appuhiy ugalida
17 ti nan abalinan nan nun'appuhiy ugalida ya ma'ubah,
mu ipapto' Apo Dios nan nahamad di ugalida.
18 Ya inilan Apo Dios nan un'unnud ay Hiya,
at nan impabnohnan dida ya bagidah enggana.
19 Ti mahalimunandah nan gutud di way punligatan,
ya ta"on hi un waday batel ya adida mapuhan hi ononda.
20 Mu nan nappuhiy ugalida ya ma'ubahda,
ya nan buhul Apo Dios ya umatdah nan habhabung di holo' an mun'a'ubahda an umatdah ahu'.
21 Nan nappuhiy ugalida ya umutangda ya adida bayadan,
mu nan nahamad di pangatda ya ma'abbadangda ya ma'an'anidatda.
22 Ya an amin nan tatagun wagahan Apo Dios ya diday mamnoh hinan luta,
mu nan inidutana ya mun'apatoyda.
23 Mun'am'amlong hi Apo Dios an manalimun hinan tatagun nahamad di pangulugdan Hiya,
ya itudunay maphod hi atonda,
24 at ta"on hi un waday topong ay dida
mu adida ma'abak ti halimunan Apo Dios dida.
25 Nete"ah din a'unga' ta nangamung ad ugwan an nala'aya'
ya mi'id ah tinnig'uh nan nahamad di pangulugnah ninganuy,
unu mi'id goh ah tinnig'uh nan imbabaluyda an immuy nun'ad'adaw hi ononda.
26 Ti diday gun omehmo' hinan udumnan tatagu an dumalat hi awagahan nan imbabaluyda.
27 At du'gonyu nan nappuhin gunyu aton ta nan maphod di atonyu
ta way atonyun mi'hituh tun lutayuh enggana
28 ti pa'appohpohdon Apo Dios nan tagun nepto' di pangatna,
ya adina inganuy nan un'unnud ay Hiya.
Ya ipapto'na didah enggana,
mu nan imbabaluy nan nappuhiy ugalida ya mun'a'ubahda.
29 At nan nahamad di ugaliday mamnoh hinan luta ta hidiy punhituwandah enggana.
30 Nan nahamad di ugalidan tatagu ya tumugun di hapitonda,
ya nepto' di panapitda.
31 Ya nunnonong hi nomnomda nan Tugun Apo Dios,
at adida mibahhaw an mumbahol ay Hiya.
32 Nan nappuhiy ugalida ya gunda bota'on nan tatagun nahamad di ugalida
ti pohdondan mamatoy ay dida.
33 Mu wagwadah Apo Dios ay dida,
at adi ma'at henen ninomnom nan nun'appuhiy pangatdan dida
unu baliwana didah nan way idolomanda.
34 Gunyu ehdol hi Apo Dios,
ya gunyu unudon nan Tuguna,
at ipaboltanan da'yu nan luta,
ya tigonyuy amoltaan nan nun'appuhiy pangatdah a'ubahanda.
35 Hinamad'un tinnig nan adi mangngol an tagu ya nan nappuhiy ugalina
an mumpahpahiyan ipaddungnay aatnah nan o"ongol an ayiw,
36 mu agguy nadnoy ya natoy an na'ubah ti pun'anap'u,
ya mi'id ah inah'upa' ay hiya.
37 At tigonyu adya nan aat di tagun nahamad di ugalina ya nan adi munlayah
ti immannung an mapmaphod di ma'ma'at hinan nitaguanah udum di algaw.
38 mu an amin nan mumbahol ya mun'atoyda,
ya ta"on nan holagdah pidwa.
39 Baliwan Apo Dios nan tatagun nahamad di ugalida,
ya Hiyay pangihi'ugandah nan gutud di way aligatanda.
40 Ya badangana goh didah nan nappuhin aton nan nun'appuhiy ugalidan tatagu ay dida,
ya baliwana dida ti Hiyay pangehdolandah bumaliw.
*^ Nan mahhun an letran di alphabet di Hudyu an A ya hiyay te"an di letrah nan mahhun an verse, ya nan miyadwan letran di alphabetda an B ya hiyay te"an di letrah nan miyadwan verse. Ya mahayhaynod nan hinohhan letran di alphabetda an mete"ah A ta engganah egpongana, ya duwampulu ta duway letran di alphabetda.