44
Hay Luwaluh Pumpabaddangan
Nan linala'in holag Korah di nangitudo' eten psalm, ya hay intud'anda ya nan ap'apun di muntudtuduh kanta. Ya maskil*Bahaom nan gloss di Psalm 32 ta innilaom di aat ten hapit. di stylena.
1 Apo Dios, dengngolmi nan inulgud din o'ommodmi an mun'aphod an inatmun didah
din nitaguandah din penghana.
2 Ti numpakakmu ya pinaligatmu din udum an tatagun adi umunud an nunhituh nan babluy
ta impaboltanmuh nan o'ommodmi nan luta.
Ya winagaham didan tatagum,
at pinumhod di nitaguanda.
3 Ya bo'on nan ni'pattayan din o'ommodmiy dumalat hi namoltanandah nan luta unu bo'on nan abalinanday nangabakanda
mu dumalat nan badangmun dida ya nan nidugah an abalinam ya amabi'ahmu di nangipattigam an pohpohdom dida.
4 Ya He"ay Ali' ya Dios'u goh hi bumadang
ta mangabak amin holag Israel,
5 ya dumalat nan nidugah an abalinam ya abakonmi nan buhulmi,
ya dumalat nan pangehdolanmin He"a ya abakonmi dida.
6 At adi' ehdol nan pana' ya ta"on nan hanggap'uh pamaliw'uh odol'u,
7 mu He"ay way abalinanan umabak hinan buhulmi,
ya He"a goh di dumalat hi abainanda.
8 Apo Dios, He"ay gunmi iyamlong hi abigabigat,
ya He"ay ipabagbagtumih mid pogpogna!
9 Mu ad ugwan ya din'ug da'mi ya binain da'mi
ti adi'a mahkay mitnud hinan umayanmin mi'gubat!
10 Ya hay inatmu ya impalayaw da'mih nan buhulmi
ta omod unda nun'ala nan gina'umi ya lutami!
11 Ya inyabulutmun numpattoy da'min ay ami kalnilu,
ya impiwa'at da'mih nan babluy di udumnan tatagu!
12 Ya inla'u da'min tatagum an un nalakay pallogmi
an ay mi'id di balulmin He"a!
13 At hiyanan hiwihiwitan ya inaba'abatlan da'mih nan tatagun heneggonmi
an dumalat nan inatmun da'mi!
14 Ya ta"on nan wah adadagwin babluy ya un dami hinhannulon,
ya mungwigiwigdah nan aatmih nangatmun da'mi!
15 At ten unna' malulugluh abigabigat,
ya immugtul tun angah'uh bain'u
16 ti gun'u da'mi hiwihiwitan ya pahapahalon hinan buhulmi
an gunda nonomnomon an umiballoh!
17 Ya na'at hatun amin ay da'mi an ta"on unmi agguy He"a inaliwan
unu agguymi goh imbahhaw nan ni'tulaganmin He"a.
18 Hay nomnommi ya agguymi He"a din'ug,
ya agguymi goh imbahhaw nan Tugunmu.
19 Mu pinaligat da'mi,
ya ingnganuy da'mih nan awadan di do'ol an atata'ot an animal hi inalahan
ta paddungnay un ami wah nan nidugah an pa'ahhelong.
20 Gulat ta naliwanmi an mundayaw ay He"an Diosmi
unu nan bulul an dios nan bunag di dinayawmi,
21 ya undan udot hene ya adim innilaon an Dios
an He"a ya inilam an amin di mipo"oy an wah nomnnom di tagu?
22 Mu dumalat nan pangunudanmin He"a ya waday gun mapatoy hi abigabigat
an umat amih nan kalnilun mapalti!†Rom. 8:36.
23 At ihi'almu ni', Apo Dios, ta baliwan da'mi!
Anaad ta un'a ay nonollo'?
Adi ni' ahan da'mi du'gon hi enggana!
24 Ya paddungnay un da'mi ipo"oyan,
at adim anhan inganuy tun ligat an holholtaponmi!
25 Paddungnay un ami natu"in hinan luta
an nun'luluppulup hinan hupu'.
26 At badangan ni' ahan da'mi
ta ipattigmu nan nidugah an pamhodmun adi mapogpog hinan pamaliwam ay da'mi!