49
Hay Ami'id Hulbin nan Pange'kodan hinan Inadangyan
Heten psalm ya intudo' nan linala'in holag Korah, ya hay intud'anda ya nan ap'apun di muntudtuduh kanta.
1 Da'yun amin an tatagun wah tun luta
ya ihamadyun donglon tun hapito',
2 an da'yun na'ampa unu nabagtun tagu,
ya da'yun adangyan unu nawotwot.
3 Ti nan hapito' ya bo'on hay atugunanyu ya anggay
ti an amin nan wah nomnom'u ya ipa'innila',
4 ya tukalo' nan alpa ta un'u ikanta nan tugun an ipa'innila' ay da'yuh innilaonyu.
5 Adia' tuma'ot hinan gutud di atapnga' hi punli'uban nan nun'abaholan an mamuhul ay ha"in,
6 ya ta"on hi unda ehdol hinan inadangyanda ya ehngelda goh hinan ado'ol di inadangyanda
ya adia' damdama tuma'ot.
7 Ya mi'id ahan di taguh mamla' hi ataguan di ohah tagu
unu mamayad ay Apo Dios hi ataguana
8 ti nabalul di pola' di ataguan nan tagu an mi'id ahan di pa"apla'
9 ta way atonan mi'taguh enggana ta adi matoy.
10 Ya inila tu'un ta"on nan tatagun nun'anomnoman ya matoy,
ya umat goh hinan manangpah ya nan agguy nanomnoman,
at puntaynanda nan inadangyandah tun luta,
at bonhon di udumna.
11 At nan lubu'da di munnonong hi abungda
an ta"on hi waday lutadah din amataguda an ningadan hi ngadanda mu mihukat di udumna ay dida.
12 Ya ta"on hi un adangyan ahan nan tagu mu ma'ubah damdama
ti matoy hiya an umat hinan a'animal an mun'atoyda.
13 At hiyah ne ma'at hinan tagun mangehdol hinan abalinana,
ya umat goh hinan tagun mangehdol hinan hapihapitona.
14 Ti mapogpogda an umatdah nan kalnilun mapalti an hi atoy di mangitnud ay didah lubu',
at abakon nan nahamad didah nan apitayan di odolda,
at taynanda nan abungda.
15 Mu baliwana' ay Apo Dios hinan ataya',
ya alana' ay Hiya.
16 At adi ayu numanomnom hi un umadangyan nan udum
an ta"on hi un do'ol di mun'apla'an hi gina'udah abungda.
17 Ti awni ta matoyda at mi'id di ita'inda
an adi mitnud ay dida nan inadangyandah nan lubu'da.
18 Ya ta"on hi un munlenot hinan inadangyana ya gun ita"eng nan udum an tagu
19 mu matoy hiya damdaman umat hidin o'ommodna,
at adida mahkay tigon di patal.
20 At ta"on hi un adangyan ahan nan tagu mu ma'ubah damdama
ti matoy hiya an umat hinan a'animal an mun'atoyda.