62
Hay Pange'kodan ay Apo Dios ta hiyay Mangipapto' ay Ditu'u
Hete ya psalm an intudo' David, ya hay intud'ana ya hi Jeduthun an ap'apun di muntudtuduh kanta.
1 Hi Apo Dios ya anggay di hohoddo' hi mamaliw ay ha"in,
2 ya Hiyay umat hi batun ihi'uga' ya mangibaliw ay ha"in,
ya Hiyay bumadang an mananggah nan buhul'u ta adia' ahan ma'abak.*Psa. 62:6.
3 Mu anuud mah nin di pangidinnganyun mangi'ingol ya mama"in ha"in?
Ten mid ahan bi'ah'u an umata' hinan allup an nabu'ut an magadyuh an matu"in!
4 Ya unyu ahan pohdon an pa"iona' ta mipa'ampa nan haad'u,
at hiyanan do'ol di alyonyuh layah hi aat'u,
ya ma'ulay di panapityun ha"in,
mu idutyun ha"in di wah nomnomyu.
5 Mu hi Apo Dios ya anggay di ehdol'uh mamaliw ay ha"in,
6 ya anggay goh Hiyah umat hi batun ihi'uga' ya mangibaliw ay ha"in,
ya Hiyay bumadang an mananggah nan buhul'u ta adia' ahan ma'abak.†Psa. 62:2.
7 Immannung an hi Apo Dios ya anggay di mamaliw ay ha"in,
ya Hiya goh dumalat hi a'e'gona' ti Hiyay umat hi batun ihi'uga'.
8 At da'yun tatagu ya gunyu e'kod ay Apo Dios ta Hiyay pangibaganyuh nan way aguguluwanyu
ti Hiyay na'ahhamad hi ihi'ugan tu'u.
9 Ditu'un tatagu ya umat tu'uh yahhiyah,
ya nan adangyan unu nawotwot an tagu ya numpapaddung an mi'id abalinan tu'u
ti makilu tu'u ay ya mi'id di damot tu'u an umat tu'uh nan dibdib.
10 Ya adiyu ehdol nan inaka'akawyu unu nan namlohanyuh gina'un di udumnan tatagu
an ta"on hi un ayu gun umadangyan,
ya adi maphod hi un hiyay ehngelyu.
11 Adi un namenghan ya anggay di nangngola' hi nangalyan Apo Dios
di Hiya ya anggay di nidugah di abalinana,
12 ya adi maluman di pamhodna.
Immannung an lagbuam nan hinohhan tagu an mipalpuh nan ina'inatna!