65
Hay Pundayawan ay Apo Dios
Heten psalm ya kantan intudo' David, ya hay intud'ana ya nan ap'apun di muntudtuduh kanta.
1 Apo Dios, hay atonmi ya dayawon da'ah nan wadam ad Zion,
ya atonmi nan intulagmin He"a
2 ti donglom di luwalumin He"a,
at an amin nan tataguh tun abablubabluy ya umalidan mundayaw ay He"a.
3 Ya nidugah di numbaholanmi,
mu inaliwam.
4 At mipadenol an amin nan tatagun pento'mu ta munhitu amih nan Timplum
ti idatmuy do'ol an wagah ay da'mi an malpuh nan Timplum.
5 Apo Dios, gunmu inabulut di luwalumi an dumalat hi nangabakanmi,
ya do'ol di umipanoh'ah inatmu ta binaliwan da'mi,
at hiyaat un He"ay pangedenlan an amin di tataguh tun abablubabluy,
ya ta"on goh nan wah nan adadagwin babluy hinan pingit di luta ya He"ay pundenolanda.
6 Ya limmum nan aduntuduntug an dumalat di abalinam
an diday nangipattig hinan anidugah di bi'ahmu,
7 ya ipadinongmuy gongaah nan dalluyun hinan baybay,
ya ta"on goh nan tu'u' di tatagu.
8 At wumogwog hi ta'ot an amin nan tatagun numpunhituh nan abablubabluy
an mete"ah pingit di lutah nan buhu'an di algaw ta nangamung di alimuhan di algaw hinan nidugah an inatmu,
ya hiyah ne dumalat hi tum'u'andah amlongda.
9 Halimunam tun luta ti ipa'alim di udan ta way mananum hinan numbino'ob'on an mitanom hitun luta ta pumhodda,
ya punnonngom di danum hinan ginnaw ta tumaguy mihabal hitun luta ti hiyah ne implanum hi ma'at.
10 Ya ipa'udanmu ta umunay nan lutan punhabalanmi,
ya wagaham nan mitanom ta pumhod.
11 Ta dumo'ol di ma'alamih nan ihabalmi an dumalat nan amaphodmu, Apo Dios,
an ta"on hi un malgom di pumbabluyanmi.
12 Ya ta"on un nan mapulun ya do'ol di pumpahtulan,
at paddungnay nidugah di amlong hinan dudunduntug,
13 ya ninapnapan nan kalniluy pumpahtulan,
ya nalonapan nan numpundotal hi paguy,
at an amin ya ahi'ap'aphodda an umat hinan tatagun muntu'u'da ya kumantadah amlongda.