76
Hi Apo Dios an Mangab'abak
Heten psalm ya kantan intudo' Asaph, ya hay intud'ana ya nan ap'apun di muntudtuduh kanta, ya matukalan hinan instrumenton way gadengna.
1 Hi Apo Dios ya nundongol ad Judah,
ya nidugah an me'gonan di ngadanad Israel.
2 Ya hay nunhituwana ya ad Jerusalem hidih nan Duntug an Zion,
3 ya nun'ipungnah di din mun'elat an panan nan buhulna,
ya ta"on din hapiawda,
ya hanggapda,
ya an amin din gina'un di mi'gubat.
4 Nidugah ahan di anabagbagtum, Apo Dios,
ya un nan mun'aphod an aduntuduntug an nido'lan di a'animal!
5 Ya inabakmu nan mun'abi'ah an tindaluda ta nunhamhammiy gina'uda,
ya ad ugwan ya nun'atoyda,
at mi'id mahkay hulbin nan bi'ahda ti adida usalon nan almasda.
6 Ya un ammuna nan nangihingalam ay dida, O Dios an dayawon din hi Jacob,
ya himbumagga ya nun'atoy din numpuntakay ya kabayuda.
7 At hiyah ne attigana, Apo Dios, an nidugah an mata'tan'a,
at mi'id di way abalinanan He"ah un'a bumungot!
8 Ya hidin nangipa'innilaam hidid abuniyan an mahumalya nan tataguh tun luta an dumalat nan baholda
ya dimminong an amin din tatagu ti nunheglay ta'otda
9 ti humalyaom nan nun'appuhiy pangatda
ta ibaliwmu nan mipaligligat an tataguh tun luta.
10 Ya immannung an wa ay ta bumungot'ah nan tatagu ya hiyay dumalat hi ipabagbagtuam,*Wada goh di ohan mabalin an translation ten verse: “Immannung an nan amabungot nan tataguh tun luta ya hiyay dumalat hi pangulgudan hinan a'al'alyam, ya nan bungotda ya paddungnay hanggapmu.”
ya nan na'angang an namadah hinan bungotmu ya umunudda mahkay ay He"a.
11 At ipa'annungyun aton nan intulagyun Apo Dios an dayawonyu,
ya umidat ayun tataguh nan abablubaluy hi adawyun Hiyan mata'tan
12 ti mi'idonay tulid nan a'ap'apu,
ya pata'tona nan a'alih tun luta.
*76:10 Wada goh di ohan mabalin an translation ten verse: “Immannung an nan amabungot nan tataguh tun luta ya hiyay dumalat hi pangulgudan hinan a'al'alyam, ya nan bungotda ya paddungnay hanggapmu.”