79
Hay Pangiluwaluan hinan Tatagu ta Mabaliwanda
Hete ya psalm an intudo' Asaph.
1 O Apo Dios, nan tatagun nalpuh nan numbino'ob'on an babluy an agguy kimmulug ya ten inameh da'mi,
ya penlohda tun babluy an banohmu,
ya ten pinuhida nan me'gonan an Timplum,
ya numpa"ida nan a'abu'abung hitud Jerusalem,
at pimmuhi ahan.
2 Ya nun'ipahbatday odol din baalmun numpatoydah nan hamuti,
ya nan odol di udum ya impa'andah nan atata'ot an animal hi inalahan.
3 Ya nan dalan din tatagun nun'atoy ya hino'napana nan lutad Jerusalem,
ya mi'id ah na'angang hi mataguh mangilubu' hinan nun'atoy.
4 At nan tatagun wah nan nunlene'woh hinan wadanmi ya gun da'mi hinhannulon,
ya gun da'mi abatlan.
5 O Apo Dios, unmu dan inaynayun nan bungotmun da'mih mid pogpogna?
Ya undan adi duminong nan annelmu an umat hi apuy an adi madmaddop?
6 Hay pangipuhayam hinan nidugah an bungotmu ya nan Hentil an adi mange'gon ay He"a
ya nan babluy an bo'on He"ay dayawonda
7 ti numpatoyda nan tatagum,
ya numpa"ida tun babluymu.
8 Ya bo'on da'mi ni' di pangiballoham hinan bahol din o'ommodmi,
mu hom'on ni' da'mi ti ten agogohgoh ami ahan!
9 Badangan da'mi ni', O Apo Dios, ta mi'id al'alin da'mi,
ya elwang da'mi ta mabaliwan ami, ta way atom an ma'ul'ulgud,
ya aliwam ni' nan baholmi ta way ipabagbagtuam.
10 Ta mi'id lummuh pangalyan udot nan agguy kimmulug an bunag ay da'miy,
“Hay wadan mah nan Diosdan mamaliw ay dida?”
At punnaudom ni' an mangiballoh ta tigonmiy awit din numpatoydan baalmu.
11 Donglom ni' di alengeng nan nun'abalud an i'ibbami ti nahahapit an mapatoyda,
mu nidugah di abalinam,
at baliwam dida ta mibo'tandah nan baludan.
12 O Apu, iballohmuh mumpapituh nan tatagun nunhituh nan heneggonmi
an gun namahapahal ay He"a ta mapahalda goh.
13 At da'min immannung an tatagum an ay kalnilum an ipapto'mu ya munyaman amin He"ah enggana,
ya ta"on un nan holagmin mitungaw hi udum di algaw ya inaynayunmin ul'ulgudon nan ipabagbagtuam!