81
Hay Mikantah nan Way Behta
Hete ya psalm an intudo' Asaph, ya hay intud'ana ya nan ap'apun di muntudtuduh kanta, ya hay stylena ya gittith.*Bahaom nan gloss di Psalm 8 ta innilaom di aat ten hapit.
1 Ikantaan tu'uh Apo Dios ti umipa'amlong an mangipabi'ah ay ditu'u,
at olton tu'un mangit'u' hi pundayaw tu'un Hiya an Dios Jacob!
2 At ete"ayun mungkanta,
ya tukalonyu nan tambourine ya nan maphod di gangohna an lyre†Nan it'ittang an alpa. ya alpa.
3 Ya ipagangohyu nan talampet hinan Akayangan di Bulan ya nan tumabaana goh
hinan gutud di algaw di behta tu'u
4 ti hiyah ne ohah nan uldin hi mahapul an aton tu'un holag Israel an inyuldin nan Dios Jacob.‡Num. 10:10. Mid mapto' ya hiyah ne tulun nahayhaynod an behta: (1) Behtan di Talampet (Lev. 23:23-25), ya (2) Algaw hi Ahanian di Bahol (Lev. 23:26-32), ya (3) Behtan di A'ab'abbung (Lev. 23:33-43).
5 Ya inyuldinah ne ta way unudon nan holag Joseph hidin nakakandad Egypt
an hiyah ne din nangngolanmih nan hapit an agguymi na'awatan§Hay alyon nan udum hi pohdonan ibaga ya nan hapit di i'Egypt, hiyaat un pinaligat Apo Dios didah nan numbino'ob'on an ligat (Ex. 7:14-12:30). Mu inalin din udum di hiyay alin Apo Dios an dengngoldah nan Duntug an Sinai (Ex. 19:16-19; 20:18).
6 an inalinay,
“Len'ah'u nan madamot an impipi'ugyu,
ya pinogpog'u nan papangdonanyuh nan madamot an bahkit.
7 At hidin na'unglanyu ya numpahmo' ayu,*Ex. 3:7-10.
ya binaliwa' da'yu,†Ex. 12:17-22.
ya tembal'u da'yuh din wada' hidih nan ma'ugtul an mangmangitit an bunut.‡Ex. 19:16-19.
Ya agguy nadnoy ya tinapnga' di pangulugyuh din wadanyud Meribah.§Ex. 17:1-7.
8 At da'yun tatagu' ya ihamadyun donglon tun pamadan'un da'yu!
O Israel, maphod ni' hi unyu ihamad an donglon!
9 Ma'ahhapul an adiyu dayawon nan bulul,
ya adiyu goh dayawon nan dios di udum an babluy!
10 Ti Ha"in ya anggay hi Apo Dios hi immannung an Diosyuh nangibaliw ay da'yud Egypt ta enekak'u da'yu,
at Ha"in di pun'adawanyuh badang hi un way mahapulyu,
at umannung an idat'un da'yu.
11 Mu nan tatagu' an holag Israel ya agguyda inunud din inali' ay dida
ti unna' at goh din'ug ay dida.
12 At okodda ta atonda nan pohpohdondan aton,
ya nan itugunda ya hiyay unudonda.
13 Gulatna ahan ta donglona' ay da'yun tatagu' an holag Israel
ta unudonyu nan pohdo' hi atonyu
14 at punnaudo' an ipa'abak nan buhulyu ta diday pangidalhina' hinan pummolta' ay da'yu.
15 Ta hanan bumobohhol ay Ha"in ya dayawona' mahkay an dumalat di ta'otda,
mu nan moltada ya mi'id di apogpogana.
16 Mu da'yu ya nan ma"aphod an ma'an di ipa'an'u,
ya pa'inuma' da'yuh nan danum di iyu'an an ma'allameeh an nalpuh nan daplah ta nangamung hi un ayu mahengla.”
*^ Bahaom nan gloss di Psalm 8 ta innilaom di aat ten hapit.
†81:2 Nan it'ittang an alpa.
‡81:4 Num. 10:10. Mid mapto' ya hiyah ne tulun nahayhaynod an behta: (1) Behtan di Talampet (Lev. 23:23-25), ya (2) Algaw hi Ahanian di Bahol (Lev. 23:26-32), ya (3) Behtan di A'ab'abbung (Lev. 23:33-43).
§81:5 Hay alyon nan udum hi pohdonan ibaga ya nan hapit di i'Egypt, hiyaat un pinaligat Apo Dios didah nan numbino'ob'on an ligat (Ex. 7:14-12:30). Mu inalin din udum di hiyay alin Apo Dios an dengngoldah nan Duntug an Sinai (Ex. 19:16-19; 20:18).
*81:7 Ex. 3:7-10.
†81:7 Ex. 12:17-22.
‡81:7 Ex. 19:16-19.
§81:7 Ex. 17:1-7.