83
Hay Iluwalu ta Ma'abak nan Binuhul di i'Israel*Heten psalm ya niddum hinan kalahin di psalm an ma'alih Pun'adawan hi Balloh an Psalms ti imbagan nan ad psalm ay Apo Dios hi unna iballoh di nappuhih nan nangat hi nappuhin hiya. Mu hi Apo Dios ya anggay di way biyangnan mangiballoh (Deut. 32:35; Rom. 12:19), hiyaat un imbagan nan munluwalu ta adina aliwan an mangat.
Heten psalm ya kantan intudo' Asaph.
1 O Apo Dios, adi'a ni' umu'ugong!
2 Ti un adya tigom an daden mi'bohhol ay He"a ya bumubungotda,
at iyal'allanah nan mangabohol ay He"a an ngohoyon da'a.
3 Ya waday nili"ud an hinahapitdah nappuhih atondah nan tatagum an pa'appohpohdom,
4 ya hiyah te hinanapitda:
“Umuy tu'u pumpatoy an amin nan holag Israel ta mi'id ah ma'angang hinan babluyda
ta ma'aliwan nan ngadan Israel hitun luta!”
5 Ya inabulut daden nunhahapit nan hinahapitdan atondan da'yu
6 an danen nunhahapit ya nan holag Edom, ya nan holag Ishmael,
ya nan holag Moab, ya nan holag Hagar,
7 ya nan holag Gebal, ya nan holag Ammon, ya nan holag Amalek,
ya nan iPhilistia, ya nan tatagud Tyre.
8 Ya niddum goh nan i'Assyria an din namadang hinan holag Lot.
9 At mahapul an atom din inatmuh nan iMidian†Judg. 7:1-8:21. Hene ya na'at hidin amatagun Gideon.
ya din inatmu goh ay da Sisera ay Jabin hidih nan Wangwang an Kishon,
10 an numpatoymu didad Endor,
at nun'apitay di lamohda,
at ayda galut hitun luta.‡Judg. 4:1-5:31. Hene ya na'at hidin amatagun da Deborah ay Barak.
11 Hay atom hinan a'ap'apuda ya umat hidin inatmu ay da Oreb ay Zeeb,
ya numpatoymun amin nan imbabaluy nan a'ali an umat hi inatmu ay da Zebah ay Zalmunna
12 an din nangaliy,
“Polhon tu'u nan lutan Apo Dios ta hakupon tu'u!”§Daten opat an tatagu ya a'alin di iMidian an inabak da Gideon (Judg. 7:25-8:21).
13 O Apo Dios an dayawo', pun'iwa'atmu didan ay da hupu',
ya pun'iyaddibmu didan ayda dugi.
14 An umat goh hinan apuy an manghob hinan bubulung,
ya umat goh hinan munggeladaw an apuy hi mihunul hinan duntug,
at gumiyab.
15 Ya pata'tom didah nan mabi'ah an puo' ta mumpangalayawda,
ya impata'otmu didah nan mun'apalin udan,
16 ya bainom didah nidugah ta engganah un da'a haggungon ta mundayawdan He"a, Apo Dios.
17 Ya pun'abakmu dida ta way atondan tuma'ot hi enggana,
ya mun'atoyda an nidugah di bainda
18 ta way panginnilaanda an He"a ya anggay di ma'alih Dios,
ya He"a ya anggay di na'abbagbagtun mumpapto' an amin hitun luta.
*^ Heten psalm ya niddum hinan kalahin di psalm an ma'alih Pun'adawan hi Balloh an Psalms ti imbagan nan ad psalm ay Apo Dios hi unna iballoh di nappuhih nan nangat hi nappuhin hiya. Mu hi Apo Dios ya anggay di way biyangnan mangiballoh (Deut. 32:35; Rom. 12:19), hiyaat un imbagan nan munluwalu ta adina aliwan an mangat.
†83:9 Judg. 7:1-8:21. Hene ya na'at hidin amatagun Gideon.
‡83:10 Judg. 4:1-5:31. Hene ya na'at hidin amatagun da Deborah ay Barak.
§83:12 Daten opat an tatagu ya a'alin di iMidian an inabak da Gideon (Judg. 7:25-8:21).