87
Hay Pangulgudan hinan A'al'alyan ad Jerusalem
Heten psalm ya kantan intudo' nan linala'in holag Korah.
1 Ya heden me'gonan an duntug di pinilin Apu tu'uh numbalinonah babluyna,
2 ya pa'appohpohdonan mihinah ad Jerusalem ya un nan udumnan babluy nan holag Jacob.
3 At hiyaat un do'ol di mun'aphod an na'ulgud hi aat nan babluy Apo Dios.
4 Ya iddum'u ad Egypt ya ad Babylon hi un'u itudo' di ngadan nan babluy an nanginnilah aat'u,
ya daten babluy an ad Philistia, ya ad Tyre, ya ad Sudan ya alyon nan tataguh di an nihakupdad Jerusalem ti nitungawdah di.
5 Ya hay ulgudondah aat ad Zion ya alyonday,
“Heten tagu ya heden tagu ya hidiy napu'agana!”
Ya makulug an hi Apo Dios an na'abbagbagtu ya wagahana dida.
6 Ya bilangon Apo Dios di ngadan nan tatagunah nan pangitud'ana, ya inalinay,
“Heten tagu ya ad Jerusalem di napu'agana.”
7 At nan tatagun wah di ya nan muntuktukal ya manayawda an iyamlongdan ikankantay,
“Hituy alpuwan an amin di awagahan tu'u!”