90
Hay Inluwalun Moses an Baal Apo Dios
Hete ya luwalun nan baal Apo Dios an hi Moses.
1 O Apo Dios, nete"ah din penghana ta nangamung ad ugwan ya He"ay nanalimun ay da'mi.
2 Ta"on hidin ami'idan tun duntug unu hidin agguymu nunlumuwan hitun luta
ya He"ay Dios an munnananong an mid di te"ana ya mid pogpogna!
3 Ya inalim ay da'min tataguy,
“Mumbangngad ayuh nan lutan na'ammanyu!”
at immannung an na'at.
4 Nan hinlibun tawon ay da'mi ya un hin'algaw ay He"a,
ya ad ugga an naluh ya un ay hin'olas hinan mahdom ay He"a.
5 Ya un himbumaggay apogpoganmi an un ami ay mun'en'enap,
ya umat ami goh hinan holo' an humangaw hinan helhelong,
6 ya ag'aga ya immongol,
mu unat goh mahdom ya nalyaw.
7 Umat hinay atom an mangubah ay da'mih nan bumungtam,
at hiyaat un nidugah di tuma'tanmi.
8 Ya i'innilam an amin di baholmi
an ta"on un nan nili"ud an mid nanginnila.
9 Ya dumalat nan bungotmu ya hemme'he'dod di pi'taguanmi ya umale'alengeng ami,
ya mid poto' di gutud hi apogpogan di pi'taguanmi an ay yahyah.
10 Ya un napitu unu nawalu ya anggay di tawonmih un mabi'ah di odolmi,
mu heten pi'taguanmi ya waday lungdaya ya ligat hi holholtaponmi ya anggay,
ya napogpog di nitaguanmi.
11 Ya mid nanginnilah aat nan nidugah an bungotmu
ti nan boholmu ya nipaddung hinan pangita'tandan He"a.
12 At un ni' at da'mi ituduwan ta nan pohdom di hiyay atonmi eten he'he'dod an ataguanmi.
13 Apo Dios, adim ni' punnonngon di bumubungtam ay da'mi,
mu hom'on at ni' da'mi an tatagum!
14 Ta hay ipattigmun da'mih abigabigat ya nan mid pogpogna an pamhodmu
ta umamlong ami eten nitaguanmid ugwan.
15 At ipa'amlong da'mi ta mihukat hinan gunmi nunligatan an inyabulutmu,
16 ya ipattigmun da'min baalmuy nidugah an abalinam hinan imbabaluymi.
17 O Apo Dios an Apumi, maphod ni' un minaynayun di wagahmun da'mi
ta an amin di gunmi aton ya maphod di pumbalinana.