102
Hay Luwalun nan Maliligatan an Tagu*Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
Hete ya iluwalun nan lala'in maligligatan, at wa ay ta adina abalinan nan holholtapona ya pun'ibagana nan ligatnan Apo Dios.
1 Apo Dios, donglom ni' nan iluwalu',
ya atom nan odowo' an badang ay He"a.
2 Ya adia' ni' du'gon hinan gutud di punluwalua' ta unmuat ni' ihamad an donglon,
ya nunnaudom an mamadang ay Ha"in
3 ti ten umat hinan ahu' di a'ubahan di nitagua',
ya tun tungal'u ya magbu an umat hi bimmabalan uleng.
4 At ten munlunglungtuya' an umata' hinan nalyaw an holo',
at hiyanan ahihigah angana',
5 ya ammunah unna' umale'alengeng,
ya la'tot ya na'ung'unga' an mun'attig di tungal'u.
6 At umata' hi hamutin akup an wah nan mapulun,
ya hamutin nunhituh nan nabukawa an babluy.
7 Ya unna' tumutu'al
an umata' hinan hamutin budeng an mun'oh'ohhan numpatpattu' hinan atap di abung.
8 At padngopadngolana' hinan buhul'uh abigabigat,
ya hinhanulona',
ya nan ngadan'uy pangidutda.
9 Ya nan dapul di paddungnay itanud'u,
ya nan lugwa' di paddungnay inumo'
10 ti dumalat nan nidugah an bungotmu,
ya paddungnay intapala' hinan adagwin lugal.
11 At tun nitagua' ya umat hinan ngauh nan mun'a'ahom,
ya umata' goh hinan nalyaw an holo'.
12 Mu He"a, Apo Dios, ya minaynayun an mid pogpog di pumpapto'am,
ya an amin di aholaholag ya gunda nomnomon nan aatmuh enggana!
13 At ihi'almu ta hom'om ad Jerusalem ti ad ugwan di gutud hi pammo'am hidi,
ya ad ugwan di gutud hi intulagmuh pamadangam!
14 Ti pa'appopohdonmin tatagum henen babluy an ta"on un nun'apa"i,
ya waday hom'onmi damdama.
15 Ya an amin nan Hentil hi abablubabluy ya ta'tan da'a, Apo Dios,
ya nidugah di pangita'tan an amin nan a'alih tun lutah nan nidugah an abalinam.
16 At mattig di anidugah di abalinam hi pangipaphodam ad Jerusalem,
17 ya donglom mahkay nan luwalun nan nun'awotwot an tatagu,
ya adim pahiwon nan ibagadan He"a.
18 At mahapul an mitudo' hanan na'na'at ta way panginnilaan nan agguy pay nitungaw an holag tu'u
ta dayawondah Apo Dios.
19 Ya umat hituy itudo'yu:
“Wah dih Apo Dios hinan me'gonan an wadanad abuniyan an u'uhdungana tun luta,
20 at dodonglonay alengeng nan nun'ibalud,
ya pun'ibo'tana nan magadyuh an mapatoy.”
21 At muntembag ya midayaw di ngadanad Zion hidid Jerusalem
22 hinan gutud di a'amungan nan do'ol an tatagun malpuh nan numbino'ob'on an babluy
an mundayaw ay Hiya.
23 Apo Dios, unna' ahan unga',
ya pogpogona',
ya ho'ho'dodom di pi'tagua'!
24 Mu nunluwalua' ay He"a an inali' di,
“Apo Dios, adia' ni' agagon an alan ad ugwan ti ten ungaa'
ti adia' umat ay He"a an mattataguh enggana!
25 Ti hidin penghana ya limmum tun luta,
ya ta"on ad abuniyan ya He"a goh di nangamma.†Heb. 1:10.
26 Ya ma'ubahdan amin hana,
mu He"a ya minaynayun an wagwada'ah enggana,
ya madunutdan amin an umatdah nan lubung ti ubahom an amin hatun limmum ta hukatam hi balu.‡Heb. 1:11-12.
27 Mu He"a ya adi malumluman di aatmu,
ya adi goh mapogpog nan tawonmu.§Heb. 1:12.
28 Ya nan holag nan tatagum ya minaynayundan He"a,
ya umat goh hinan a'ap'apuda ti halimunam dida.”