116
Hay Pundayaw nan Tagun Nabaliwan ta Agguy Natoy*Heten psalm ya niddum hinan kalahin di psalm an ma'alih Hallel an Psalms ti hallel (unu hallelujah) di mahhun an mahapit hinan mahhun an nalammung an hapit unu hiyay angunuh an mahapit hinan angunuh an nalammung an hapit (verse 19).
1 Pa'appohdo' He"a, Apo Dios,
ti dengngolmu ya inabulutmu nan inluwalu'.
2 Ya gapuh nan nangngolam hinan luwalu'
at He"ay punluwalua' eten atagu' hi engganay ataya'.
3 Ya ma'atta'ota' ti hi'itangan an matoya', at milubu'a'.
Ya immannung an nidugah di ta'ot'u ya numanomnoma'!
4 At nunluwalua' an inali' di,
“Apo Dios, baliwana' ni' ahan!”
5 Ma"aphod ti ma'ulay'a, Apo Dios!
Immannung an ma'ahhimo"a!
6 Ya baliwam nan tagun mi'id di abalinana,
at hiyanan hidin agadyuhan di ataya' ya binaliwana' ay He"a.
7 At hiyanan munlenota' mahkay ti ma"aphod'a an Dios ay ha"in.
8 Imbaliwa' ay He"a, Apo Dios, hi atoy,
ya pinogpogmu nan dimmalat hi limmugwalugwaa',
ya agguymu inyabulut an abakona' hinan buhul'u.
9 At ad ugwan mahkay ya He"ay aptan hi unudo' eten atagu',
10 mu innaynayun'uy pangulug'un He"a an ta"on un hidin gutud di nunholholtapa'.†II Cor. 4:13.
11 Ya umu'uddum hinan aid di poto' di punnomnoma' ya inali' di,
“An amin nan tatagu ya munlayahda!”
12 Hay idat'u mah ay He"a, Apo Dios, hi punyamana' ay He"a
an gapuh nan amaphodmun ha"in?
13 At hay ninomnom'u ya onnga' He"ah ma'inum hi pangipattiga'
hi punyamana' ay He"ah namaliwam ay ha"in.
14 Ya ipa'annung'uh nan way hinagang nan na'amung an tatagum
an amin din inali' ay He"ah ato'.
15 Inila' an munlungdaya'ah un way matoy hinan tatagum
ti nabalul di nitaguandan He"a.
16 Ya immannung an ha"in di baalmu, Apo Dios,
at ihamad'un aton nan tamu' an umat hi nangat ina ti imbaliwa' ay He"a.
17 At munluwalua' ay He"a,
ya e'nong'un He"ay punyamana'.
18 Ya ipa'annung'un amin nan intulag'un He"a an Dios
hinan hinagang an amin nan na'amung an tatagunah
19 nan way gettaw di Timplum Apo Dios ad Jerusalem.
Madayaw hi Apo Dios!‡Hete ya hapit di Hudyu an hallelujah.
*^ Heten psalm ya niddum hinan kalahin di psalm an ma'alih Hallel an Psalms ti hallel (unu hallelujah) di mahhun an mahapit hinan mahhun an nalammung an hapit unu hiyay angunuh an mahapit hinan angunuh an nalammung an hapit (verse 19).
†116:10 II Cor. 4:13.
‡116:19 Hete ya hapit di Hudyu an hallelujah.