128
Hay Mikantah nan Punti'idan ad Jerusalem*Heten psalm ya niddum hinan kalahin di psalm an ma'alih Kantan di Munti'id ti hidin nunti'idan nan Hudyun immuy ad Jerusalem an mi'gotad ya hiyah te kalahin di kantan nundedehhandan nangikantah nan dalan.
Hiyah te kantan ingkantan nan Hudyuh din nunti'idandan numbiyahen immuy ad Jerusalem.
1 Mawagahan nan tagun ipa'anhanay pangatanah nan pohdon Apo Dios
2 ti nan nanablayana ya mun'olog hi pangngalanah nan mahapulna,
at hiyanan mun'am'amlong,
ya maphod di nitaguana.
3 Nan ahawana ya umat hinan nitanom an mamunga,
ya nan linala'in imbabaluydan ma'amung hinan pangananda ya umatdah nan do'ol an hapeng di olibo.
4 Umat hinay awagahan nan tagun nahamad di umunudanan Apo Dios.
5 Maphod at ni' hi un ditu'u wagahan hi enggana ay Apo Dios an wagwadah Zion!
Ya ad ugwan ni' an atagu tu'uh tun luta ya tigon tu'uy pumhodan ad Jerusalem.
6 Ya umadu"oy ni' di pi'taguan tu'u ta tigon tu'uy a'ap'apu tu'uh pidwa.
Hay lenggop ni' di munnononnong hitud Israel!
*^ Heten psalm ya niddum hinan kalahin di psalm an ma'alih Kantan di Munti'id ti hidin nunti'idan nan Hudyun immuy ad Jerusalem an mi'gotad ya hiyah te kalahin di kantan nundedehhandan nangikantah nan dalan.