144
Hay Kantan David
Hi David di nangitudo' eten psalm.
1 Dayawon da'a, Apo Dios, an paddungnay batun ihi'uga'!
He"ay nangitudun ha"in an mi'gubat,
ya He"ay nangidat hi abalina'.
2 He"a goh di ligwa' an mamadang ya mangibaliw ay ha"in,
ya He"ay ihi'uga',
ya numbalinona' an ap'apun di tataguh nan abablubabluy.
3 Apo Dios, ngadan di ni'atan di tagu
ta pa'ippapto'om an halimunan?*Job 7:17; Psa. 8:4; Heb. 2:6.
4 Hay nitaguanda ya umat hinan yahyah ya anggay
unu umat hinan maluh an ngau!
5 Apo Dios, uggoh mah ta ibughulmud abuniyan ta mun'ohop'a
ta dapoom nan aduntuduntug ta way atondan umahu'!
6 Ya ipa'ilatmu ta miwa'atda nan buhulmu,
ya pumpanam dida ta lumayawda.
7 Uggoh mah ahan ta He"an wad abuniyan ya uyadom nan ngamaymu
ta baliwana' hi aton di buhul'un nalpuh udum an babluy,
ya ten paddungnay wadaa' hinan maluhung an danum!
8 Danen tatagun nalpuh nan udum an babluy ya ma'aladyahda
an ta"on unda nunhapata ya munlayahda damdama.
9 Ikantaa' He"a, Apo Dios, hinan balbalun kanta,
ya iddum'un tukalon nan lyre†Hete ya it'ittang an alpa. hi pundayaw'un He"a.
10 Ti dumalat nan badangmu ya nangabak di a'alih nan gubat,
ya He"ay nangibaliw hidin baalmun hi David.
11 Apu, baliwana' hinan aton di buhul'un nalpuh nan udum an babluy ta adia' patayon!
Ma'aladyahdan tatagu!
Ya ta"on hi unda nunhapata an hay makulug di hapitonda
mu wa ay ta humapitdaan un hay layah.
12 Nan holagmi ni' an linala'in ung'ungungnga ya umilogdan umatdah nan malubong an nitanom,
ya nan imbabaluymin binabai ya umilogdan ahi'ap'aphod an umatdah nan napa'ot
an mun'aphod an tu'ud an ni'al'altih nan abung di ali.
13 Ya mamapnu ni' di a'alangmih nan bot'onmi,
ya mapnu ni' goh nan pumpahtulanmih nan linibu an kalnilu,
14 ya nan bakami ya madamot di guyudondah nittuh nan kalesa.
Apu, adim ni' ahan iyabulut an hogpon di buhulmi tun babluymi,
ya adim ni' goh iyabulut an waday ilayaw di buhulmi ay da'mi,
ya mi'id ni' di atata'ot an ma'at hitun babluymin dumalat hi pumkawan di tatagu.
15 Wa ay ta ipa'annungmun ma'at an amin hanah nan ohan babluy
at nidugah an mawagahan nan bimmabluy,
ya umamlong nan tatagun hay Diosda ya nan Ap'apu.