147
Hay Pundayaw ay Apo Dios an Nidugah di Abalinana*Heten psalm ya niddum hinan kalahin di psalm an ma'alih Hallel an Psalms ti hallel (unu hallelujah) di mahhun an mahapit hinan mahhun an nalammung an hapit (verse 1) unu hiyay angunuh an mahapit hinan angunuh an nalammung an hapit (verse 20).
1 Madayaw hi Apo Dios!†Hete ya hapit di Hudyu an hallelujah.
Maphod un tu'u ikantay pundayaw tu'uh nan Dios tu'u!
Immannung an maphod hi un tu'u dayawon Hiya!
2 Hi Apo Dios ya pun'ipiyammana din nun'apa"id Jerusalem
ti ibangngadnah di nan tatagunan nibalud hinan udum an babluy.
3 Al'alu'ona nan munlungdaya,
ya paphodona nan hugatda.
4 Hi Apo Dios ya ninomnomna tuwaliy uyap di bittuan an ihinah ad daya,
ya nginadnana didan amin.
5 Na'abbagbagtu ya nidugah di abalinan nan Ap'apu tu'u,
ya inilanan amin,
ya adi malukud di anala'engna.
6 Hi Apo Dios ya pa'abbaddangana nan nun'awotwot,
mu hana ay an mumpahpahiya ya ipa'ampana dida.
7 Mungkanta ayuh punyamanan,
ya iddumyun tukalon nan alpah pundayawyun Hiya an Dios tu'u.
8 Inhaninay bunut ad daya,
ya limmunay udan an pananum hi luta,
ya limmunay holo' hinan dudunduntug.
9 Idatnay tanud di a'animal
ya nan imbabaluy di gayang hi unda pumiyapiyak.
10 Adi umipa'amlong ay Apo Dios di mabi'ah an kabayu
ya nan natulid an titindalu
11 ti hay umipa'amlong ay Hiya ya nan tatagun ipa'anhanday pangatandah nan pohdona
ya nan mundenol hinan adi maluman an pamhodna.
12 Da'yun iJerusalem,
dayawonyu nan Ap'apu an Dios tu'u
13 ti pa'ahhalimunan ditu'un tatagunan paddungnay inhamadnay pantaw di babluy tu'ud Jerusalem
ta adi mabalin an hogpon ditu'uh nan buhul tu'u.
Ya winagahan ditu'un tataguna,
14 ya palenggoponay babluy tu'u,
ya paphodonay inhabal tu'u an umat hi paguy ta do'ol di bot'on tu'u.
15 Wa ay ta impiyuynay Uldinan amin hinan babluy hitun luta
ya un mamengpenghan ya ma'unud nan inyuldina.
16 Ya pun'ogahnay dalalluh tun luta ta ay na'ap'apan hi uloh
ya ay nagab'unan hi dapul.
17 Ya paddungay i"itang an batu nan dalallun pun'ogahna,
ya mi'id di pa"edpol hi a'ayhugin nan ipa'alina.
18 Wa ay ta imandalna ya umaliy dibdib
ta ma'ubah nan dalallu ta mangenolwang nan wangwang.
19 Impa'innilanay Tuguna ya tudtudunah nan holag Israel an tataguna.
20 Dida ya anggay di nangatanah umat hina,
at hiyanan agguy inilan di udum an tatagu hanan Tuguna.
Madayaw hi Apo Dios!‡Hete ya hapit di Hudyu an hallelujah.
*^ Heten psalm ya niddum hinan kalahin di psalm an ma'alih Hallel an Psalms ti hallel (unu hallelujah) di mahhun an mahapit hinan mahhun an nalammung an hapit (verse 1) unu hiyay angunuh an mahapit hinan angunuh an nalammung an hapit (verse 20).
†147:1 Hete ya hapit di Hudyu an hallelujah.
‡147:20 Hete ya hapit di Hudyu an hallelujah.