5
Hay Aat din Nali'up an Papel ya nan ay Uyaw an Kalnilu
1 Palpaliwan ya tinnig'u han nali'up an pepel hinan agwan hi ngamay nan inumbun an Mumpapto'. Ya natud'an di numbinallin, ya pituy ammidna ta adi nonongan nabe'lag. 2 Ya palpaliwan goh ya tinnig'u han mabi'ah an anghel an enlotnan nuntu'u' an inalinay, “Goh nin di way biyangnan mangaan hi ammid ten nali'up an pepel ta be'lagona?” 3 Mu mi'id di ohad abuniyan, ya hitun luta, ya ad dolom an waday biyangnan mame'lag hinan nali'up an pepel ta tigonay nitudo'. 4 Ya awni ya nidugah di lugwa' ti mi'id di ohan way biyangnan mame'lag hinan nali'up an pepel.
5 Ya inalin nan ohan ap'apuy, “Adi'a lumugwa. Ti abalinan ahan nan alyondan Layon an holag David an holag din hi Judah.*Impa'innilan Jacob hidin agadyuhan din atayana an nan holag Judah ya umatdah nan layon (Gen. 49:9), ya namamah nan na'abbagbagtun holag Judah an hi Kristu. Ya nan holag Judah ya hay layon anuy nilatlatuh nan bantilada (bahaom nan footnote di Num. 2:1). Hiya ya inabaknan amin di nun'appuhi, at Hiyay waday biyangnan mangaan hinan pitun ammid nan pepel ta be'lagona an Hiyay nabagbagtun ad holag ay David an Hiyay nangameh hinan nun'appuhi!”†Bahaom nan footnote di Num. 2:9 ta innilaom nan ipattigna.
6 Ya tinnig'u goh nan alyondan imbaluy di Uyaw an Kalnilun Apo Dios hi awadan nan tronon di Mumpapto' an timma'dog hinan gagwan nan opat an matagu ya nan a'ap'apu. Hiya ya mattig an pinatoydah din hopapna. Ya waday pituh ha'gudna ya pitun matanan didana nan pitun abalinan nan Lennawan Apo Dios an nahnag hitun luta. 7 Ya immuy, ya innalna din nali'up an pepel hinan agwan an ngamay nan inumbun an Mumpapto'. 8 Ya heden nangngalanah nan pepel ya nunlu'bub din opat an matagu ya din duwampulu ta opat an a'ap'apuh hinagangna, ya dinayawda. Ya inodnandan hinohhay alpa ya duyun balitu' an napnuh incense an hiyah ne luwalun nan tatagun Apo Dios. 9 Ya palpaliwan ya nungkantadah balbalun kantan alyonday,
“He"ay way biyangnan mangngal hinan nali'up an pepel ta anom nan ammidna
ti hay namatayandan He"ay nangibo'laam hi bahol di tataguh numbino'ob'on an babluy
an nan ahimpahimpangapu, ya nan numbino'ob'on di hapitda, ya nan numbino'ob'on di aat di nitaguanda ta numbalindan tatagum an Dios.
10 Ya iniddummu didah nan pumpapto'am
ta ayda papadin mangat hi pohdon Apo Dios an dayawon tu'u,
ya hi awniat diday mumpapto' hinan abablubabluy hitun luta.”‡Bahaom nan footnote di I Pet. 2:9.
11 Ya hidin intigaw'u goh ya waday dengngol'uh hapit nan a'anghel an adida mabilang. Ya timma'dogdah nan nunlene'woh hinan inumbun an Mumpapto', ya hinan duwampulu ta opat an a'ap'apu, ya hinan opat an matagu. 12 Ya enlo'enlotdan nungkantan inaliday,
“Din ay Uyaw an Kalnilun napatoy ya waday biyangnan
way abalinana, ya inadangyana, ya la'engna, ya bi'ahna!
Ya biyangna goh an waday a'e'gonana, ya anabagbagtuna, ya amakulugna!”
13 Ya dengngol'un mungkantan amin nan wad abuniyan, ya hitun luta, ya ad dolom, ya nan wah baybay an alyonday,
“Nan inumbun hi tronon di Mumpapto' ya nan ay Uyaw an Kalnilu
ya mipabagbagtuda, ya me'gonanda, ya nidugah di abalinanda,
ya nidugah goh di bi'ahdah mid pogpogna!”
14 Ya tembal nan opat an matagun inaliday, “Amen!”§Hay pohdonan ibaga ya heneat ni' ta ma'at! Ya din a'ap'apu ya nunlu'bubdan nundayaw ay dida.
*5:5 Impa'innilan Jacob hidin agadyuhan din atayana an nan holag Judah ya umatdah nan layon (Gen. 49:9), ya namamah nan na'abbagbagtun holag Judah an hi Kristu. Ya nan holag Judah ya hay layon anuy nilatlatuh nan bantilada (bahaom nan footnote di Num. 2:1).
†5:5 Bahaom nan footnote di Num. 2:9 ta innilaom nan ipattigna.
‡5:10 Bahaom nan footnote di I Pet. 2:9.
§5:14 Hay pohdonan ibaga ya heneat ni' ta ma'at!