Zephaniah
Hay Aat Ten Liblu
Hay Nangitudo' eten Liblu: hi Zephaniah.
Hay Nangitud'an Zephaniah eten Liblu: nan Hudyud Judah.
Hay Pohdon nan Ngadan ten Liblun Ibaga: duway pohdonan ibaga ti nan oha ya hi Apo Dios di mangipo"oy, ya nan miyadwa ya hi Apo Dios di manalimun.
Hay Gutud hi Nangitud'anan ten Liblu: hidin 640 B.C. nin.
Hay Teman ten Liblu: hi Apo Dios di mumpapto' hitun luta an ta"on hi un way magugulu ti Hiyay munhumalyan amin hinan tataguh tun luta an ta"on hi unda Hudyud Judah.
Hay Outline ten Liblu:
Hay aat di MOLTAON Apo Dios (1:1—3:7)
Hay moltaona ya nan iJudah (1:1—2:3)
Hay moltaona ya nan iPhilistia (2:4-7)
Hay moltaona ya nan iMoab ya nan i'Ammon (2:8-11)
Hay moltaona ya nan iCush (2:12)
Hay moltaona ya nan i'Assyria (2:13-15)
Hay moltaona ya nan iJerusalem (3:1-7)
Hay aat di PUMPAPTOꞋAN Apo Dios (3:8-20)
Hay aatna ya abakon Apo Dios nan tatagu ta mihamad di pumpapto'ana (3:8)
Hay aatna ya baliwan Apo Dios nan tatagu ta mihamad di pumpapto'ana (3:9-13)
Hay aatna ya ipapto' Apo Dios nan tatagu ta mihamad di pumpapto'ana (3:14-17)
Hay aatna ya ipaphod Apo Dios nan tatagu ta mihamad di pumpapto'ana (3:18-19).
1
1 Hiyah te hinapit Apo Dios hi impa'innilanan ha"in an hi Zephaniah* Hay pohdonan ibaga ya hi Apo Dios di mangipo"oy unu hi Apo Dios di manalimun. hidin gutud di nun'alian Josiah† Hay nun'alianad Judah ya hidin 640-609 B.C. Ya hay udumnan mataguh din nun'aliana ya hi Jeremiah, ya da Nahum ay Habakkuk an propetadan tulu. an hina' Amon hidid Judah. Ha"in ya nalpua' hinan holag Cushi an hina' Gedaliah an imbaluy Amariah an hina' Hezekiah.‡ Hay nun'alian Hezekiah ad Judah ya hidin 715-686 B.C. At hi Zephaniah ya ohan holag di ali.
Nan Gutud di Punhumalyaan Apo Dios
2 Inalin Apo Dios ay ha"in an hi Zephaniah di,
“Ha"in an hi Apo Dios ya ubaho' an amin nan wah tun luta
3 ti ubaho' an amin nan tatagu,
ya nan animal,
ya ta"on nan do'ol an hamutid daya,
ya nan wah baybay
ta way aton nan adi umunud ay Ha"in an mun'a'ubah.”
Hay Panumalyaan Apo Dios ad Judah
4 Ya innaynayun Apo Dios an himmapit ay ha"in an hi Zephaniah an inalinay
“Ha"in an hi Apo Dios ya moltao' nan tatagud Judah ya ad Jerusalem an kapitulyuda,
ya ubaho' goh nan way na'angang hinan mundayaw hi bulul an Ba'al eten babluy
ta mi'id di gun umuy an mundayaw ya ta"on hanan papadi.
5 Ya ubaho' goh nan tagun umuy hi atap di abungdan mundayaw hinan abittubittuan ad daya,
ya nan mundayaw an mangihapatah nan amakulugdan Apo Dios,
ya nan munhapata goh hinan bulul an hi Molek.§ Hi Molek di bulul nan i'Ammon. Hay udum an ngadana ya Molok, ya Milcom, ya Malcam. Ya hay pohdonan ibaga ya nan mun'ali.
6 Ti ubaho' nan nangidinong an umunud ay Ha"in
ya nan adi mamhod an umalin mumpabaddang ay Ha"in.
7 Ha"in an na'abbagbagtun Dios ya magadyuh an madatngan di gutud hi punhumalyaa' ay da'yu,
at duminong ayu ti ay paddungnay e'nong'un da'yun iJudah
ti ayaga' nan buhulyun iBabylon ta way atondan mamatoy ay da'yu
an ayda me"an hinan me'nong.
8 Ya henen gutud an punhumalyaan ya moltao' an amin nan mumpangipangpangulu,
ya nan linala'in imbabaluy nan ali,
ya an amin nan mangiyengngoh hinan ugalin nan bunag.
9 Makulug an moltao' nan middum an mi'dayaw hinan dayawon nan agguy kimmulug,
ya nan lumayalayah,
ya nan pumatopatoy ta punuwonda nan timplun nan diosdah nan hamhamonda.”
10 Ya inalin goh Apo Dios di,
“Henen gutud ya donglonyu nan nidugah an kumanilah nan way Pantaw an Ekan hidid Jerusalem,
ya ahi'e'ebel hinan Balbalun Barangay* Unu New Quarter. hidid Jerusalem,
ya wada goh di ahingungulngul hinan nunlene'woh an dudunduntug.
11 Da'yun numpunhituh neheggon hinan way palengke ya kumila ayu
ti an amin nan mumpungkumildu ya mun'atoyda!
12 Ya paddungnay tolga' di dilag ta pundilaga' ad Jerusalem† Hay alyondah na'at hidin nangamehan nan iBabylon hinan iJudah ya hidin 586 B.C. ya inhamhamaddan nanganap hinan iJudah hinan nipo"oyandah nan abung, unu kulha, unu lubu', unu ad dolom, ya inusalday dilag ta tigonday awadanda.
ta moltao' nan u'umbun an hay nomnomonda ya malenggopdan inaliday,
Hi Apo Dios ya mi'id maphod unu nappuhih atonan ditu'u!
Hiyah ne inalida.
13 Mu mun'ahamham damdama nan mun'apla'an an inadangyanda,
ya mun'apa"i nan a'abungda.
Ya gunda munha"ad hi abungda,
mu bo'on diday munhitu.
Ya muntanomdah greyp,
mu bo'on diday manamtam.”
Nan Atata'ot an Gutud Apo Dios
14 Ya inalin goh Apo Dios ay ha"in an hi Zephaniah di,
“Magadyuh ahan an madatngan di algaw hi pummoltaa' hinan tatagu,
ya nidugah an atata'ot di ma'at,
at ta"on nan nun'atulid an tindalu ya kumilada.
15 Ya henen pangipuhaya' hinan nidugah an bungot'u
ya hiyah ne goh di punligatan nan tatagu,
ya numanomnomanda,
ya apa"ianda,
ya a'ubahanda,
ya henen gutud goh ya nidugah an munhehellong.
16 Ya henen timpu ya madngol di gangoh di talampet hi ipa'innilaan di gubat,
ya madngol di bugaw nan titindalun manggop hinan nahamad an allupna an siudad
ya nan ata'nang an abung an pungguwalyaan hinan babluy.
17 Ya paligato' hi nidugah nan tatagu ta ayda nabulaw an ahi'ap'apu'ap ti numbaholdan Ha"in,
at hiyanan mun'ibu'yag di daladan ay danum,
ya mabulu' di odoldah nan luta.
18 Ya henen gutud an pangipattiga' hinan ay apuy an bungot'u
ya hanan adadangyan ya adi ibaliw nan silver ya balitu'da dida
ti mamengpenghan an pogpogo' an amin nan wah tun luta.”
*1:1 Hay pohdonan ibaga ya hi Apo Dios di mangipo"oy unu hi Apo Dios di manalimun.
†1:1 Hay nun'alianad Judah ya hidin 640-609 B.C. Ya hay udumnan mataguh din nun'aliana ya hi Jeremiah, ya da Nahum ay Habakkuk an propetadan tulu.
‡1:1 Hay nun'alian Hezekiah ad Judah ya hidin 715-686 B.C. At hi Zephaniah ya ohan holag di ali.
§1:5 Hi Molek di bulul nan i'Ammon. Hay udum an ngadana ya Molok, ya Milcom, ya Malcam. Ya hay pohdonan ibaga ya nan mun'ali.
*1:10 Unu New Quarter.
†1:12 Hay alyondah na'at hidin nangamehan nan iBabylon hinan iJudah ya hidin 586 B.C. ya inhamhamaddan nanganap hinan iJudah hinan nipo"oyandah nan abung, unu kulha, unu lubu', unu ad dolom, ya inusalday dilag ta tigonday awadanda.