1 JOHN
Hini omaꞌ-atan tay an libju
Hini nangtulaꞌ ay tay ja hi John an oha an adalan Hesus an ninitnud ay hija chin agawwachaana heto lota. Intolong na hitay an tulaꞌ na hachi namati an numpanguy hachi apfuglapfuglay hichi provincian chi Asia. Lakay hija chin nangtula-ana ay tay an tulaꞌ.
Hini khapo na an nuntulaꞌ hi John ja gwa hachi khun meꞌmeha an nakak cha ja icha khun itudtuchu hana achi umannung an omaꞌ-atan Hesus. Ituchu cha an, an amin chi gwa ay tay lota ja na-alinan hi napukhit, anong un hitay achor ta-o. Hotti achi cha apfuluton an numpfalin hi Kristo hi takhu an gway achor na. Ja khun cha khu itudtuchu an hi Hesus, ja pfu-un hija hini Hennag Apo Jos an Mamahhod. Ja pfu-un hini tudtuchu cha ja angkhay chi nehahalla, ti nidchum hini khun cha aton, ti allon cha hi achi khahin un ta-o chuꞌkhon hana pfahor.
Hotti hitay an tulaꞌ John ja epanomnom na hana mamaha an hi Hesu Kristo ja umannung an empfalay Apo Jos an numpfalin hi takhu. Ja inali na khu ay tay tulaꞌ na an hana mamhod ay Apo Jos ja podpodhon cha khu hini padchung cha an takhu ja inunud cha khu hana tukhun Apo Jos.
1
Hini arpugwan chi piꞌtakhuwan
1-2 Tayya an muntulaꞌ ami ay chaꞌju ta ipa-innila mi hi Hesu Kristo an hija hini ma-ali an Hapit Apo Jos, an gawwacha an ninidchum ay Apo Jos chin hunhunana ja un marmu hitay lota. Hitay an Hapit Apo Jos ja hijay arpugwan chi piꞌtakhuwan an ma-id chi pogpogna. Numpfalin hi takhu ja niꞌtakhu ay tay lota, ja khun miꞌhapit ay chaꞌmi, ja immannung an tinnig mi ja mapfalin an ma-ugnan hija. Hini piꞌtakhuwana ja ma-id teꞌte-aana ja ma-id pogpogna, ti gawwacha hija an ninidchum ay Apo Jos an Ama ta-o. Hitay an tinnig mi ja hijah tay chi khun mi tihtikhuwan. 3 Hotti tayya an ipa-innila mi ay chaꞌju hay hato tinnig mi ja chengngor mi ta gway aton ju an midchum ay chaꞌmi an meꞌ-oh-ohha ay Apo Jos an Ama ta-o ja ay Hesu Kristo an Empfalay na. 4 Intulaꞌ mi hay hato ta makhotop hitay pun-an-anlaan ta-o.
Miꞌtakhu ta-o ay ni mumpapattar
5 Hitay ipa-innila mi ja hijay chengngor mi ay tay Empfalay Apo Jos, an hi Apo Jos ja hijay hilaw ja ma-id munhehellong ay hija. 6 Nu khulat ta gway oha hi mangali hi un neꞌ-oh-ohha ay Apo Jos muti hini piꞌtakhuwana ja munhehellong, ja un munlahlah hija, ti agkhuy na inunud hini umannung an hapit Apo Jos. 7 Ja khulat ta nehamad hini piꞌtakhuwan ta-o ta nahilagwan ta-o an amat ay Apo Jos an gawwa ay ni mumpapattar, hot maphod hini pun-oh-ohhaan ta-o an namati. Ja midchum khu an ma-ulahan hato pfahor ta-o khapo ay ni chalan Hesu Kristo an immajuh chin natajana. 8 Nu allon ta-o hi ma-id oh-ohha hi pfahor ta-o ja un ta-o lahlahan hitay achor ta-o, ti agkhuy ta-o inapfulut hini umannung an hapit Apo Jos. 9 Muti nu ipudnu ja empakawan ta-o hana pfahor ta-o ay Apo Jos, ja pakawanona, ja ulahana khu an amin hana napukhit ay tay piꞌtakhuwan ta-o. Atona hitay an inali na, ti magpong hija. 10 Nu allon ta-o hi ma-id pfahor ta-o, ja un ta-o ipatikhaw an agkhuy limmamot hini hapit Apo Jos ay tay piꞌtakhuwan. Ja un ta-o pumpfalinon hi Apo Jos hi munlahlah, ti achi amat hetoy allon ni hapit na.