1 An amin hana mamati an hi Hesus ja hija hini Hennag Apo Jos an Mamahhod, ja chichay empfapfalay Apo Jos. Ja hana gway pamhod na ay Apo Jos an Ama ta-o ja gwacha khu hini pamhod cha hana tatakhu an empfapfalay na. 2 Hotti nu gway pamhod ta-o ay Apo Jos ja khun ta-o unuchon hana urchina, ja hitay chi panginnilaan an gway pamhod ta-o khu hana i-ibpfa ta-o an empfapfalay Apo Jos. 3 Ti hini atikhan ni pamhod ta-o ay Apo Jos ja hija hini pangunuchan ay ni urchina. Ja achi nalikhat hini urchina, 4 ti gway apfalinan ta-o an empfapfalay na an mangapfak hana napukhit an gwah to lota an mipfuhur ay hija. Hay pangapfak ta-o ja hini pammati ta-o ay Hesu Kristo. 5 Ti ma-id chi hay mangapfak hana napukhit an gwah to lota nu pfu-un hana namati an hi Hesus ja hija hini Empfalay Apo Jos.

6 Hitay an hi Hesu Kristo ja numpabautisar hi chanum chin agawwachaana heto lota ja immajuh khu chin chala na hi natajana. Pfu-un chin numpabautisarana ja angkhay chi panginnilaan an hija chi Kristo muti chin khu immajuhan chin chala na. Ja tihtikhuwan ni Espiritu Santo an hi Hesus ja hija hini Manakhu, ti umannung an amin hini ituchun ni Espiritu Santo. 7 Tolo cha hana muntihtikhu ay ni omaꞌ-atan Hesu Kristo. 8 Hini mahhun ja hini Espiritu Santo, ja hini me-aggwa ja chin numpabautisarana hi chanum, ja me-atlo chin immajuhan chin chala na hi natajana. Ja mumpapadchung hini impa-innilan tay an tolo. 9 Nu pattiyon ta-o hana tihtikhun chi tatakhu, ja om-omod koma an pattiyon ta-o hini tihtikhuwan Apo Jos an amatan ni Empfalay na, ti napfagto hi Apo Jos an nangali. 10 Hini mangapfulut ja mamati ay ni omaꞌ-atan ni Empfalay Apo Jos ja munchomoꞌ hija an umannung hitay an tinihtikhuwan Apo Jos. Hini ayya achi mamati ay ni inalin Apo Jos ja amat hi pumpfalinona hija hi munlahlah, ti achi na pattiyon hini inalin Apo Jos an amatan ni Empfalay na. 11 Ja hay umannung ja inchat Apo Jos ay chita-o hini piꞌtakhuwan an ma-id chi pogpogna, ja hitay an piꞌtakhuwan ja chakngan ta-o ay Kristo an Empfalay na nu mamati ta-o ay hija. 12 Hotti hini takhu an neꞌ-oh-ohha ay Hesus an Empfalay Apo Jos ja miꞌtakhu ay hija hi ma-id chi pogpogna. Hini ayya achi mamati ja achi miꞌtakhu.

13 Chaꞌju an namati ay Hesus an Empfalay Apo Jos, intulaꞌ u hay hato ta ma-emamad ju an gway piꞌtakhuwan ju hi ma-id chi pogpogna. 14 Munchomoꞌ ta-o an mungkalalag ay Apo Jos, ti anila ta-o an chonglona hana epfokha ta-o nu meꞌ-annolot ay ni penhod na. 15 Ja nu anila ta-o an chonglona hana epfokha ta-o ja pattiyon ta-o khu an ichat na.

16 Hay alloꞌ ay chaꞌju, ja hay aton nu gway ibpfa hi namati an pfimmahor ja amat heto. Nu anila ju an mapakawan hini pfahor na ja ekalalakhan ju hija, hot pakawanon Apo Jos ta etoloy na an miꞌtakhu. Muti gwacha han pfahor an mamogpog ay ni piꞌtakhuwan ni takhu ay Apo Jos ja achiꞌ allon hi ekalalakhan ju hana pfumahor hi amat heto. 17 An amin hana napukhit an aton ja pfahor ay Apo Jos. Muti achi an amin hana pfahor ja pogpokhonay piꞌtakhuwan ay Apo Jos.

18 Anila ta-o an hana empfapfalay Apo Jos ja achi cha etoloy an khun pfumahor, ti hi Hesus an Empfalay Apo Jos ja halimunana chicha, hotti ma-id aton Satanas an mamaꞌ-i. 19 Anila ta-o khu an empfapfalay chita-o ay Apo Jos, muti hana ayya tatakhu ay tay lota an agkhuy namati ja hi Satanas chi khun mun-ap-apo ay chicha. 20 Ja anila ta-o khu an immali hini Empfalay Apo Jos heto lota ja hinilagwanay nomnom ta-o ta gway enat ta-o an nanginnila ay ni umannung an Jos. Ja meꞌ-oh-ohha ta-o ay hija, ja meꞌ-oh-ohha ta-o khu ay ni Empfalay na an hi Hesu Kristo. Hija hini umannung an Jos an arpugwan chi piꞌtakhuwan an ma-id chi pogpogna.

21 Chaꞌju an impfilang u hi empfapfalay, hay me-ang-angonoh hi itukhun u, ja achi ju dayawon hana achi umannung an jos ta hi Apo Jos ja angkhay chi dayawon ju.