1 Hitay chi omaꞌ-atana, an hini ung-ungnga an mamanoh an amin ay ni enachangjan ama na, ja un mipadchung chamchama hi himpfut. 2 Ti gwacha hana pfantay na, ja gwacha hana mangpaptoꞌ ay ni pfanoh, ingkhana hi machakngan chin arkhaw an eneꞌchan ama na an pipulangan ni pfanoh ay hija. 3 Amat hina khu ay chita-o chin agkhuy ta-o namatiyan, an un ta-o amat hi unga, an cho-or chi un-unuchon ta-o an ugalin chin a-ammod ta-o. 4 Muti unot nachakngan chin timpo an eneꞌchan Apo Jos ja hennag na hini Empfalay na ta etoꞌkhong han ohan pfupfai. Niꞌtakhu hija an khun miꞌ-unud hana urchin Moses, 5 ta matoy an mangpfu-aan hana napfalud hi urchin, ta gway aton cha an mipfilang hi empfapfalay Apo Jos. 6 Ja hay enat Apo Jos an nangpatikhaw hi nang-empfalajan chita-o ay hija, ja hennag na hini Espiritu Santo an ingkarin Hesu Kristo an Empfalay na ta meꞌgawwacha ay chita-o. Hijaot un ta-o allon hi “Ama” ay Apo Jos. 7 Hotti pfu-un aju mahpay himpfut, ti empfapfalay chaꞌju ay Apo Jos, ja meꞌpfanoh aju hana pfanoh an michat hana empfapfalay na.

8 Chin agkhuy ju pay nanginnilaan ay Apo Jos ja himpfut aju hay hachi khun ju daydayawon an pfu-un umannung an jos. 9 Muti ad ugwani ja inannila ju hi Apo Jos, an hijay nangiꞌ-innila ay chaꞌju. Ja anagkha ta podhon ju an pfangngachon hay hachi khun ju dayawon an ma-id herpfi cha ja ma-id apfalinan cha an manakhu ay chaꞌju? Un ju chah podhon an mumpfalin khu hi himpfut cha? 10 Alloꞌ hitay, ti niya an khun ju unuchon hay hana urchin chi Hudju an khun mungngilin hi arkhaw, ja pfulan, ja pfehta, ja tagwon! 11 Gwacha han ta-ot u, ti unchani ja ma-id pfungan chin pfinlay u an nangtudtuchugwan ay chaꞌju.

12 A-akhi, tayya han ilulud u an itukhun ay chaꞌju. Aton ju koma hitay enat u an anong unaꞌ Hudju, ja numpfalinoꞌ hitay achor u an amat ay chaꞌju an Hentil an agkhuy nakha-utan ay ni urchin chi Hudju. Ja ma-id chi hay pukhitoꞌ ay chaꞌju. 13 Anilaꞌ an agkhuy ju nalichuwan chin nun-agwaaꞌ hina gwachaan ju khapo ta nunchokhohaꞌ. Ja hichuy chin pengpenghan chi nangkasabaaꞌ ay chaꞌju ay ni Ebanghelyo. 14 Anong un aju nalikhatan khapo ay chuy nunchoghaꞌ ja ma-id impatikhaw ju hi napukhit an agkhujaꞌ enenghay ay chaꞌju. Minangiliyaꞌ an amat hi angher Apo Jos ja amat khu ay Kristo Hesus. 15 Ja tihtikhuwaꞌ hini otong an pamhod ju, an un ad-achi hot u-iton ju hinuy mata ju ta ichat ju ay ha-in. Ngay chimmalat ta napfau chin pamhod ju? 16 Un aju chah pfimmuhur ay ha-in khapo ay ni umannung an khun u allon? Achi adniꞌ amat hina. 17 Hay hana khun muntudtuchu hi nehahalla ja inaku-akuy chaꞌju, muti nange-enchallomot hini napukhit an nomnom cha. Podhon cha pay an mi-achawwiyaꞌ ay chaꞌju ta chichay tangachon ju. 18 Achi napukhit chi mangakuy hi takhu nu ma-id chi hay napukhit hi nomnom cha. Ti maphod hinuy enat ju ay ha-in chin agawwachaaꞌ hina, ja alom ja etoloy ju ad ugwani. 19 Chaꞌju an empfapfalay u, nunhegla chin nunlikhataꞌ ay chaꞌju an amat ay ni punlikhatan chi pfupfai hu-un tomoꞌkhong, ta gway enat ju an namati ay Kristo. Ja tan amat hi un u ipiggwa an amat hi tomoꞌkhong, ti tan etoloy u an munlikhat ingkhana hi matikhaw ay ni piꞌtakhuwan ju hini omaꞌ-atan Kristo. 20 Gawwachaaꞌ koma hina gwachaan ju ta ma-uyyad hitay nomnom u, ti tayya an ma-id maptoꞌ hi ujaꞌ aton ay chaꞌju.

21 Chaꞌju an mamhod an miꞌ-unud hay hana urchin Moses ta gway aton ju an miꞌtakhu ay Apo Jos, anila ju chah hini podhona an hapiton? 22 Ti allona ay ni hapit Apo Jos an chugwa chin empfalay Abraham an linala-e. Chin oha ja empfalay na chin himpfut an hi Hagar, ja chin ayya aha ja empfalay na ay Sarah an ahagwana an pfu-un himpfut.*4:22 Chin enat Ismael an empfalay Hagar an nituꞌkhung ja mapfaha ay ni Genesis 16:1-16; chin enat Isaak an empfalay Sarah an nituꞌkhung ja mapfaha khu ay ni Genesis 21:1-7. 23 Chin ayya empfalay na hi himpfut ja nihapfin khapo hi nomnom chi takhu. Chin ayya empfalay na ay ahagwa na an hi Sarah ja nihapfin an meꞌ-annolot ay ni ingkarin Apo Jos. 24 Gwa han ituchun tay an na-at. Hay hato pfinapfai ja ipatikhaw cha chin chugwa an neꞌtobpfalan Apo Jos hi tatakhu. Hi Hagar ayya ja ipatikhaw na chin neꞌtobpfalan Apo Jos ay Moses hichi pfuludna an Sinai ad Arabia an nangchatana chin urchin chi Hudju. Ja hana ayya holag Hagar ja chicha chi himpfut chin urchin Moses. 25 Hi Hagar ja mipadchung ay ni pfuludna an Sinai ad Arabia. Ja mipadchung khu ay ni pfuglay an Jerusalem ad ugwani, ja amat hi ammod an amin chi Hudju an khun munhochor ay ni pangunuchan cha hi urchin Moses ta miꞌtakhu cha ay Apo Jos, hotti himpfut cha hi urchin.

26 Hi Sarah ayya an pfu-un himpfut ja ipatikhaw na hini na-ilangitan an Jerusalem an amat hi hija chi ina ta-o an namati an nawaya-an ay ni urchin an namabpfalud ay chita-o. 27 Ti allon ni hapit Apo Jos hi,

28 A-akhi, chita-o an namati ay Kristo, ja omaꞌ-at ta-o ay Isaak, an numpfalin ta-o hi empfapfalay Apo Jos khapo chin kari na. 29 Amat khu chin na-at ay Isaak an nihapfin khapo ay ni apfalinan ni Espiritun Apo Jos, an pinalikhat chin ibpfa na an hi Ismael an un nihapfin khapo hi nomnom chi takhu. Niꞌpadchung ad ugwani, an pfuhulon hana pfinalud chi urchin hay hana numpfalin hi empfapfalay Apo Jos khapo hi namatiyan cha ay Kristo. 30 Muti nomnomon ta-o hitay nitulaꞌ an Hapit Apo Jos hi nangarjana hi, “Pakakom hini pfupfai an himpfut ja hini empfalay na. Ti achi meꞌpfanoh hini empfalay chi himpfut ay ni pfanoh ni empfalay chi pfu-un himpfut.”‡4:30 Genesis 21:10 31 Hotti chita-o ayya, a-akhi, an namati ja achi ta-o ma-ali hi empfalay chi himpfut, ti empfapfalay chita-o hi pfu-un himpfut.