1-2 Inalin khu Hesus hi, “Umannung hitay alloꞌ ay chaꞌju. Nu khulat ta gway kular chi karnero, ja hini takhu an manggwa ay ni pantaw, ja hija hini umannung an khun mumpahtor. Hini ayya omajat an manggwa ay nuy alad ja un mangakaw wenno pomatoy. 3 Hini khun mumpfantay an gwa ay ni pantaw ni kular ja ipahikhop na hini khun mumpahtor ja angkhay. Ja imatunan hana karnero hini hapit na ja oha-ohaona an ajakhan chicha ta mitnud cha an miꞌpfutay. 4 Napfalin an impfutay na an amin hana karnero ja impangpangullu na. Mangunud hana karnero ti imatunan cha hini hapit na. 5 Achi cha unuchon hini agkhuy cha anila, an un chaot lomajaw, ti achi cha imatunan hini hapit na.” 6 Inalin Hesus hitay pangngarig ja agkhuy cha na-awatan hini podhona an hapiton.

7 Hotti inalin khu Hesus hi, “Umannung hitay alloꞌ ay chaꞌju. Ha-in hini pantaw ni kular chi karnero, an hijay agwun an humikhop. 8 An amin hana uchumna an nahhun mu ha-in an immali, ja chicha hana mangakaw ja mamatoy hana karnero. Muti achi chonglon hana karnero chicha. 9 Ha-in hini pantaw an agwun cha. Hana humikhop ay tay an pantaw ja takhuwoꞌ chicha. Halimunaꞌ chicha an amat ay ni khun mumpahtor an halimunana hana karnero hi pfumutajan cha hi icha anganan ingkhana hi humigpan cha. 10 Hini omakaw, ja ma-id uchumna hi nomnomona nu pfu-un hini atona an i omakaw, pomatoy ja pumaꞌ-i. Ha-in ayya ja immaliyaꞌ ta hana tatakhu an ipadchung u hi karneroꞌ ja miꞌtakhu cha hi nahamad an ma-id chi pogpog na.

11 Ha-in hini maphod an khun mumpahtor. Ti nehahagkhanaaꞌ an matoy khapo ay chicha. 12 Hini ayya khun mapfajachan an mumpahtor ja taynana hana karnero nu gway umali hi khenger. Taynana ti pfu-un hijay nangheꞌ-a. Hot pun-alat ni khenger hana karnero ja nun-apfur cha ja nun-ahijaꞌ cha. 13 Taynan nuy khun mumpfantay ti un hini pfinoꞌla na chi podhona ja angkhay, ja achi na ihi-ar hana karnero. 14-15 Ha-in hini maphod an khun mumpahtor. Anilaaꞌ ay Ama ja anilaꞌ khu hija. Amat hina khu an anilaꞌ hana karneroꞌ ja anilaaꞌ ay chicha. Halimunaꞌ chicha, ja nehahagkhanaaꞌ an matoy khapo ay chicha.

16 Gwacha hana uchumna an karneroꞌ an agkhuy pay niꞌhikhop ay tay an kular. Mahapor an piꞌpahikhop u chicha. Me-egngor cha ay ni hapit u ja meꞌ-oh-ohha cha hay hana nahhun an na-ajakhan. Ja ohaaꞌ an khun mumpahtor ay chichan amin. 17 Podpodhonaꞌ ay Ama, ti apfulutoꞌ chi atajaꞌ ta gway atoꞌ an mummahu. 18 Ma-id mangpagpong hi atajaꞌ, an ha-in chi nangapfulut hi atajaꞌ. Ti gwa ay ha-in an mangpagpong ay ni atajaꞌ ja gwa khu ay ha-in hini apfalinan ta mummahuwaꞌ. Hitay hini inalin Ama hi atoꞌ.”

19 Chimmalat chin inalin Hesus ja na-a-aggwa khu chin Hudju. 20 Cho-or cha an nangali hi, “Un mangkay ay chita mun-angaw hitay an takhu ti nahuhuꞌlungan! Anagkha ta i ta-o chodchonglon hija?” 21 Muti allon chin uchumna hi, “Nu allon ju hi nahuhuꞌlungan, ja un chah amat hinay panaphapit na? Ja un chah olog khu chi napukhit an ispiritu an mangakhahan hi napfulaw ta tumikhaw?”

22 Nachakngan chin pfehtan chi Hudju an pangnomnoman cha chin arkhaw an Nidatunan chin Templo ad Jerusalem. Ja netongor an ahitungnin. 23 Gawwacha hi Hesus hichi Templo an khun chumalan ay chuy Pfarkon Ari Solomon. 24 Na-amung hachi Hudju ja lini-ub cha hija ja inali cha hi, “Epfaag mu gwot hini ohto, ti tan ma-id maptoꞌ hi i mi punnomnoman. He-a chah hini Hennag Apo Jos an Mamahhod wenno pfu-un?” 25 Tempfar Hesus ja inali na hi, “Ina-alliꞌ ay chaꞌju muti achiyaꞌ chamchama pattiyon. Hi Ama chi nangchat ay ni apfalinaꞌ ta ma-at hay hana khun u aton, ja hay hato chi panginnilaan ju nu ngay omaꞌ-ataꞌ. 26 Muti tan achiyaꞌ chamchama pattiyon ti pfu-un chaꞌju hini karneroꞌ. 27 Hay ipfilang u hi karneroꞌ ja hana mangkhongahan ay ni alloꞌ. Anilaꞌ chicha ja unuchonaꞌ. 28 Ichat u ay chicha hini nahamad an piꞌtakhuwan an ma-id chi pogpogna, hot achi cha ma-utaw, ja ma-id chi hay oha hi gway apfalinana an mamloh ay chicha ay ha-in. 29 Ti hi Ama chi napfagpfagto an amin ja hijay nangchat ay chicha ay ha-in. Ja ma-id olog chi uchumna an mamloh ay chicha ay hija. 30 Ti ha-in ja hi Jos Ama ja un ami oh-ohha.”

31 Chengngor hachi Hudju hichuy an inali na ja pimmichit cha khu hi pfato ta ipuhit cha ay hija. 32 Inalin Hesus ay chicha hi, “Cho-or chi maphod hi enat u hi inalin Ama hi atoꞌ ja tinnig ju. Ngachah ay cha tay enat u chi i ju panghiꞌ-ingan hi pangajangan ay ha-in?” 33 Tempfar hachi Hudju ja inali cha hi, “Pfu-un hay maphod hi enat mu chi pangajangan mi ay he-a muti hini pangpadchungam ay ni achor mu ay Apo Jos. Un ta-o numpapadchung an tatakhu ja un chah achi mipfuhur hitay ay Apo Jos?” 34 Ja inalin Hesus hi, “Un ju chah nalichuwan chin nitulaꞌ an Hapit Apo Jos hi nangarjana hachi a-apo ta-o an Hudju chin hophopapna hi, ‘Inaliꞌ hi, amat aju hi jos.’*10:34 Psalms 82:6 35 Hotti hachi tatakhu an enajakhan Apo Jos an i mangpa-innila ay ni Hapit na, ja ma-ali cha hi jos. Mapfaha hitay ay ni Hapit Apo Jos ja achi ma-ub-upfah. 36 Hotti un chah achi om-omod ay ha-in an inumlaan Apo Jos ja hennakhaꞌ an immali heto lota? Anagkha ta allon ju hi un mipfuhur ay Apo Jos hini pangpfaakhaꞌ an ha-in hini Empfalay na? 37 Nu achiꞌ aton hini khun aton Ama hot mapfalin an achiyaꞌ pattiyon ay chaꞌju. 38 Muti tayya an khun u unuchon hi Ama. Hotti hay hato khun u aton chi pattiyon ju nu achi ju pattiyon hana khun u allon. Hot annilaon ju an gawwacha hi Apo Jos ay ha-in jagawwachaaꞌ khu ay hija.”

39 Chengngor hachi Hudju hitay an inali na ja henlenom cha khu an maniliw ay hija muti nun-irpfut na ja tenaynana chicha.

40 Amat hichi ja pfimmad-ang hi Hesus chin gwanggwang an Jordan ta numpfangngad chin khun pumbautisaran John Bautista hachi tatakhu. Ja nihihidchi hija. 41 Cho-or chin tatakhu an immuy ay Hesus ja inali cha hi, “Ma-id en-enat John hi milagro muti umannung an amin hini impa-innila na an omaꞌ-atan tay an takhu.” 42 Ja cho-or chin tatakhu hichi an namati ay Hesus.