1 Empa-opoh Hesus an nungkalalag ja empacheh cha ay cha chuy adalana. Pfinad-ang cha hini henge an Kidron an na-alu-an ja immuy cha ay chuy chammangna an natamman hi ajiw an olibo. 2 Hi Judas an nangngina ay Hesus, ja aniꞌ-ila na hichuy an na-alu-an ti hichuy chi emmengha hi khun omajan Hesus ja hachi adalana. 3 Hotti initnud Judas han hempfontog an hinchalo ja hachi khun munggwarja hichi Templo an pfinaar hachi a-ap-apon chi papachi ja hachi Farisee, ja immuy cha ay chuy an na-alu-an. Numpunchilag cha ja numpun-ochon cha hi pfangid ja pang-or. 4-5 Hi Hesus an nanginnila an amin hana ma-at ay hija, ja i na chinittum chicha. Ja gwa hi Judas an niꞌtataꞌchug ay chicha. Ja inalin Hesus hi, “Ngay ngachan nuy hingiton ju?” Tempfar cha ja inali cha hi, “Hini hingiton mi ja hi Hesus an eNazaret.” Ja inali na hi, “Ha-in.” 6 Ay chuy nangarjana hi, “Ha-in” ja nun-ipfugnud cha ja agkhuy cha naleꞌna ja nun-atuꞌ-in cha. 7 Ja impiggwan Hesus an nangali hi, “Ngay ngachah nuy hingiton ju?” Ja inali cha khu hi, “Hi Hesus an eNazaret.” 8 Ja inalin Hesus hi, “Ti inaliꞌ mit an ha-in hi Hesus. Nu ha-in ayya hini hingiton ju an tiligwon, ja tojaꞌ ja. Muti achi ju pi-idchum hay hato numpun-ibpfaꞌ.” 9 Inali na hitay ta mipa-annung chin inali na ay Ama na an, “Ma-id oh-ohhah ujaꞌ inutaw ay cha tay an tatakhuꞌ an impulang mu ay ha-in.” 10 Inuꞌnoh Simon Peter chin pfangid na ja enhegwat na, ja na-aan chin agwan an ingan ni ohan takhalan chin Natakhay an Pachi. Ja hini ngachan chuy an takhala ja hi Malkus. 11 Ja inalin Hesus hi, “Peter, ehe-ot mu hinuy pfangid mu. Un mu chah chamchama epagwa an un u inapfulut hini eneꞌchan Ama an ujaꞌ punlikhatan.”

12 Amat hichi ja hachi hinchalo ja chin ap-apo cha ja hachi gwarja an Hudju, ja tiniliw cha hi Hesus ja pfina-ud cha chin ngamoy na. 13 Hay nahhun hi nang-ajan cha ja ay Anas an ammod chin ahagwan Kayfas an Natakhay an Pachi ay chuy an timpo. 14 Hitay an hi Kayfas chin nangali hachi a-ap-apon chi Hudju hi, “Mapmaphod un gway oha hi matoy ta achi ta-o matoy an amin an Hudju.”*18:14 John 11:50

15 Hi Simon Peter ja han oha an nun-ibpfa na an adalan ja nangunud cha ay cha Hesus. Hichuy oha an adalan ja an-annilan chuy Natakhay an Pachi, hotti niꞌhikhupon cha ay chuy na-alad an partug an nunhitugwan ni Natakhay an Pachi. 16 Hi Peter ayya ja agkhuy cha an-annila hotti nataynan hichi pfutayna. Muti niꞌhapit chin nun-ibpfa na han pfupfai an khun mumpfantay ay chuy pantaw ja niꞌhikhupona hi Peter. 17 Ja inalin chin pfupfai ay Peter hi, “Oha a jaꞌ an disipolon chuy lala-e an tiniliw cha.” Ja inalin Peter hi “Pfu-un mangkay ha-in.” 18 Tungnin ay chuy an lapfi, hotti nun-apoy hachi takhala ja hachi gwarja ta gway pun-anichuwan cha. Timmataꞌchug cha an nalili-ub ay chuy apoy ja niꞌtataꞌchug hi Peter an khun miꞌ-anichu.

19 Amat hichi ja ente-an chin Natakhay an Pachi an hi Anas an munhanhan ay Hesus nu ngay amatan hana disipolo na ja ngay ngachah hana khuna itudtuchu. 20 Ja inalinot Hesus hi, “Hini enat u an nuntudtuchu ja chengngor an amin chi tatakhu. Khunaꞌ muntudtuchu hay hana sinagoga ja hichi Templo an khun pa-amungan an amin chi Hudju, ja ma-id oh-ohhah intuchuꞌ hi agkhuy cha chengngor. 21 Hotti anagkha ta epfokham ay ha-in? Hay koma pangpfokhaam ja hay hana nangngor ay ni intudtuchuꞌ, ti anila cha.” 22 Unagkhu inalin Hesus hitay ja henoplat han ohan gwarja ja inali na hi, “Un chah ma-id pfa-in mu ta amat hinay pampfar mu ay tay Natakhay an Pachi?” 23 Tempfar Hesus ja inali na hi, “Allom adchiya tugwali nu ngay inaliꞌ hi nehahalla. Ma-id ayya ja anagkha ta hoplatonaꞌ?”

24 Amat hichi ja impi-uy Anas hi Hesus an napfabpfa-ud ay Kayfas an natakhay an pachi ta hijay munhumarja nu gway machakngan hi panghiꞌ-ingan an pangchaloman ay hija.

25 Ja gawwacha pay hi Peter an niꞌtataꞌchug an khun miꞌ-anichu hichi pfutayna. Ja gwa hana nangali ay hija hi, “He-a khuh niꞌ hini oha an disipolon chuy lala-e an tiniliw cha.” Ja enhaot Peter ja inali na hi, “Pfu-un mangkay ha-in.” 26 Ja gwa khu ay chuy han ohan takhalan ni Natakhay an Pachi, an akhin ni takhala an khiningahan Peter. Ja inali na hi, “Un chah pfu-un he-a chin tinikhaw u hichi na-alu-an an ninitnud ay hija?” 27 Enhaot khu Peter ja timmalanuwot chin agwitan.

28 Napfalin an nahumarja hi Hesus hichi achaan Kayfas ja naꞌ-arkhaw. Ja in-uy hachi a-ap-apon chi Hudju hija ay Gobernador Pilato. Muti agkhuy himmikhop hachi Hudju ay chuy pfalay na, ti podhon cha an meꞌ-an ay chuy Pfehtan chin Nalohan chin Angher Apo Jos an khun cha ngilinon.†18:28 Hay oha hi urchin chi Hudju nu timpon chi pfehta ja paniyaw ay chicha chi miꞌhikhop hi pfalay chi pfu-un Hudju. 29 Hotti hi Pilato chi pfimmutay ja inali na ay chicha hi, “Anagkha? Ngay i ju pangchaloman ay tay an takhu?” 30 Tempfar cha ja inali cha hi, “Ti nu ma-id pfahor na hot agkhuy mi in-ali ay he-a, Apo Gobernador.” 31 Ja inalin Pilato hi, “Gway urchin ju an Hudju, hotti ekak ju ta chaꞌjuy manugi.” Tempfar hachi Hudju ja inali cha hi, “Achi, ti matoy koma hija, muti achi ju mit apfuluton an chaꞌmi an Hudju chi mamatoy hay pfimmahor.” 32 Na-at hitay ta mipa-annung chin inalin Hesus an omaꞌ-atan ni atajana.

33 Himmikhop khu hi Pilato ay chuy punhumarjaan ja empa-ajag na hi Hesus, ja inali na hi, “Un chah he-a hini arin chi Hudju?” 34 Ja inalinot Hesus hi, “Narpu chah ay he-a hinuy inalim wenno ngay nangali ay he-a ja un mu allon?” 35 Ja inalin Pilato hi, “Pfu-unaꞌ Hudju, hotti ngay nanginnilaaꞌ ay he-a? Hachi i-ibpfam an Hudju ja hachi a-ap-apon chi papachi chi nang-ali ay he-a. Hotti ngachah tugwali chi im enat?” 36 Tempfar Hesus ja inali na hi, “Hini pun-ap-apugwaꞌ ja pfu-un heto lota. Ti nu khulat ta gwah to lota hini pun-ap-apugwaꞌ, hot meꞌpapattoy hana tatakhuꞌ ta achiyaꞌ ichat hay hana Hudju. Muti achiyaꞌ amat ay chicha.” 37 Ja inalin Pilato hi, “Hotti umannung chah an ari a?” Tempfar Hesus ja inali na hi, “Ti niya mah an inalim. Hitay chi khapo na hi immaliyaꞌ heto lota an netoꞌkhong, ta tihtikhuwaꞌ hini umannung. An amin hana mamhod an manginnila ay ni umannung, ja chonglon cha hana alloꞌ.” 38 Ja inalin Pilato hi, “Ngay ngachah nuy umannung an khun mu hapiton?”

Amat hichi ja pfimmutay khu hi Pilato ja inali na hay hachi Hudju hi, “Ma-id chi machakngaꞌ hi hay panghiꞌ-ingan hi pangchaloman ay hija. 39 Hotti hay aton ta-o ja hini emmengha an khun ta-o aton, an machakngan ayya hitay Pfehta hon impfu-aaꞌ hay oha hi pfalud an penhod ju an mipfu-aan. Hotti podhon ju ayya ja ipfu-aaꞌ hitay Ari ju an Hudju.” 40 Ja iniꞌgwap cha gwot an nangali hi, “Achi, pfu-un hija chi penhod mi hi ipfu-aam ta hi Barabas!” Hitay an hi Barabas ja oha an pemmatoy.