2 Chronicles
Ya meippanggep eyan libluh ni 2 Chronicles
Huyyan libluh ni meikkadwan Chronicles ey peamta tu e hi Apu Dios ey eleg tu iwalleng ida tuu tun helag Israel. Humman ida etan hahhakkey ni hi-gadan nambangngad di Israel ni nalpud Babilon e neihbutan da. Yan nunman ni nambebleyan da mewan di Israel ey nedismayah ida tep dakel hu buhul da. Anin ida etan eleg mengullug nan Apu Dios ni nekibebley ni hi-gada et ida kamekibbuhul ni hi-gada.
Nem impenemnem etan ni nengitudek eyan libluh ni hi-gada e peyaggud ida mewan Apu Dios heni lan nunman. Et yan ebuh hu kayyaggud ni pehding da ey medinnel idan hi-gatun memaddang niya mengippaptek ni hi-gadan nunya et yallin edum ni aggew.
Ya neitudek eyad libluh:
1. Impeyaggud Apu Dios hu ammed idan helag Israel ni nengidwatan tun hi-gada etan ni Tempol ni daka penaydayawin hi-gatu niya ya nemutukan tun Solomon ni patul da et idwat tu hu laing tun man-ap-apun hi-gada. (chapters 1–9)
2. Iddawat Apu Dios idan hu gun-uden etan nanengtun kamengu-unnud ni hi-gatu, nem kastiguen tudda etan eleg mengu-unnud ni hi-gatu. Ya pengi-ang-angan e makulug huyya ey ya etan di impahding tuddan patul di Judah niyadda tutu-udda lan nunman. (chapters 10–36)
1
Ya laing hu imbagan Solomon e patul di dasal tu
(1 Kings 3:1-15)
1 Hi Solomon e u-ungngan David e patul ey neihammad law hu nan-ap-apuan tud Israel tep binendisyonan Apu Dios e Dios tu niya indawtan tun et-eteng ni kabaelan tu.
2 Ineyagan tun emin hu tutu-ud Israel, yadda eta-gey ni ap-apun sindalu, yadda huwet, yaddan emin hu opisyal ni gubilnu, niyaddan emin hu ap-apun pamilyah da 3 et ipengulu tuddad kapenaydayawid Gibeon, tep yadman kad-an ni Tabernacle Apu Dios ni kinapyan eman lan bega-en tu e hi Moses di eleg mebebleyi. 4 Ya etan Kaban Apu Dios ey inha-ad David e patul di neatepan ni tuldah ni ingkapya tud Jerusalem eman ni tu nengal-an nunman di Kiriat Jearim. 5 Nem ya etan di giniling ni altar ni kinapyan Besalel e u-ungngan Uri ey inap-apun Hur ey nanengtudman Gibeon di hinanggan etan ni Tabernacle nan Apu Dios. Et mukun limmaw diman di Solomon niyaddan emin hu tutu-u ma-lat ida mandayaw nan Apu Dios. 6 Et man-appit idan hanlibun animal ni kagihheba etan di giniling ni altar diman di hinanggan Tabernacle ni penaydayaw dan Apu Dios.
7 Yan nunman ni hileng ey nampeang-ang hi Apu Dios nan Solomon et kantuy “Hipa pinhed mun iddawat kun hi-gam?”
8 Himmumang hi Solomon ey kantuy “Impeenang-ang mu et-eteng ni neminhed mun ama e hi David, ey yan nunya ey impambalin muwak ni neihullul ni hi-gatun mampatul. 9 Hi-gam e Ap-Apu e Dios, peamnum anhan ni ippahding hu insapatah mun ama. Impambalin muwak ni patul eyaddan dakel ni peteg ni tutu-un eleg mebillang, 10 et humman hu, idwasi muwak anhan ni laing ma-lat amtak pehding kun man-ap-apun hi-gada. Tep kaw hipa tuun kabaelan tun man-ap-apu eyan dakel ni peteg ni tutu-um?”
11 Hinumang Apu Dios hi Solomon ey kantuy “Beken ni ya kinedangyan winu ya keiddeyyawan winu ya ketteyyan idan buhul mu winu ya andukkey ni biyag hu kindew mun hi-gak, nem ya laing mun man-ap-apu eyaddan tutu-uk, 12 et humman hu, iddawat kun hi-gam huttan ni muka kekdewa. Niya iddawtan daka pay ni kinedangyan niya dayaw ni eggak idwat idan edum ni patul lan nunman, niyaddalli meihhayned ni hi-gam.”
Ya et-eteng ni kabaelan niya kinedangyan nan patul e hi Solomon
(1 Kings 10:26-29)
13 Entanni et hi-yanen Solomon hu Gibeon e kad-an ni Tabernacle et mambangngad di Jerusalem. Et yadman nanha-adan tun nampatulan tud Israel. 14 Inemung Solomon hu hanlibu et epat ni gatut ni kalesah ni kameussal di gubat niya hampulut dewwan libun kebayyu et ilaw tuddad kinapya tun bebley ni keihha-adan da, ey inha-ad tu edum di Jerusalem. 15 Yan nunman ni nampatulan tu ey dakel ni peteg hu silber niya balituk di Jerusalem henin kadinakkel ni batu, niya dakel ni peteg hu keyew ni sedar henin kadinakkel ni keyew ni sycamore di hengeg idan duntug di Judah. 16 Yadda kebayyun Solomon ey gintang idan ahenteh tud Egypt niyad Silisia e nebayadan meippuun di kemeunnud ni kapemeyyad. 17 Yan nunman ni tsimpuh ey enem ni gatut ni silber hu bayad ni hakey ni kalesah ni meussal di gubat e neidteng di Jerusalem ni nalpud Egypt. Ey ya hakey ni kebayyu ey hanggatut et neliman silber hu bayad tu. Kagettangaddan ahenteh Solomon ida humman di Egypt ni han da inggatang damaddan patul idan Hittite niyadda patul di Syria.